(វៀតណាម)៖ ម្ចាស់សាលាអន្តរជាតិអាមេរិកាំងវៀតណាម (AISVN) ត្រូវបានចាប់ខ្លួនពីបទរំខានសណ្តាប់ ធ្នាប់សាធារណៈ និងញុះញង់ឱ្យមានការបំផ្លិចបំផ្លាញនៅមុខខ្លោងទ្វារសាលា។ ប៉ូលិសទីក្រុងហូជីមិញ បាននិយាយថា ង្វៀន ធីអ៊ុត អេម អាយុ ៦២ ឆ្នាំ ម្ចាស់សាលា និងមនុស្សពីរនាក់ទៀត ឈ្មោះ ដូ លីនភឿង និង ង្វៀន ថាញ់ ទ្រីវ កំពុងស្ថិតក្រោមការស៊ើបអង្កេតលើការចោទប្រកាន់ពីបទ "រំខានដល់សណ្តាប់ធ្នាប់សាធារណៈ"។អ្នកស៊ើបអង្កេតបានចោទប្រកាន់ថា កាលពីចុងខែមីនា ចំពេលមានជម្លោះលើការគ្រប់គ្រងសាលា អេម និងបុគ្គលមួយក្រុមបានប្រមូលផ្តុំគ្នានៅច្រកទ្វារសាលា AISVN ហើយបង្កការរំខានជាសាធារណៈ ប៉ះពាល់ដល់សន្តិសុខ និងសណ្តាប់ធ្នាប់សង្គម។ អធិការក្រុងហូជីមិញក៏បានស្នើឱ្យប៉ូលីសស៊ើបអង្កេតលើការកៀងគរ មូលធនខុសច្បាប់ដោយក្រុមហ៊ុន AISVN American International Education Joint Stock Company តាមរយៈកិច្ចសន្យាវិនិយោគកម្ចី និងការអប់រំដែលបានចុះហត្ថលេខាជាមួយ ឪពុកម្តាយរបស់សិស្ស។ បង្កើតឡើងក្នុងឆ្នាំ 2006 AISVN ផ្តល់ជូននូវកម្មវិធីសិក្សាក្រោមកម្មវិធីបរិញ្ញាបត្រអន្តរជាតិ (IB) ។តម្លៃសិក្សាប្រចាំឆ្នាំមានចាប់ពី 280-350 លានដុង (11.000-13.750 ដុល្លារអាមេរិក) សម្រាប់មត្តេយ្យ 450-500 លានដុងសម្រាប់សាលាបឋមសិក្សា និង 600-725 លានដុងសម្រាប់ថ្នាក់មធ្យម និងវិទ្យាល័យ។ សាលានេះមានគ្រូបង្រៀនបរទេសប្រហែល 130 នាក់ គ្រូបង្រៀនវៀតណាម 26 នាក់ និងបុគ្គលិកជាង 100 នាក់។AISVN បានទាក់ទាញការចាប់អារម្មណ៍ជាសាធារណៈនៅចុងឆ្នាំ 2023 នៅពេលដែលឪពុកម្តាយមួយក្រុមទាមទារឱ្យសងបំណុល។ ពួកគេបានអះអាងថា សាលាបានខ្ចីប្រាក់រាប់សិបពាន់លានដុង ដោយមិនមានការប្រាក់ ឬវត្ថុបញ្ចាំ ក្រោមកិច្ចសន្យាកម្ចី និងការវិនិយោគ។ជាការតបស្នងវិញ កូនៗរបស់ពួកគេត្រូវបានផ្តល់ថ្លៃសិក្សាដោយឥតគិតថ្លៃ ដោយសាលាបានសន្យាថា នឹងសងប្រាក់វិញ បន្ទាប់ពីសិស្សបានបញ្ចប់ការសិក្សា ឬផ្ទេរទៅសាលាផ្សេងទៀត។ ទោះជាយ៉ាងណា ឪពុកម្តាយបាននិយាយថា ពួកគេមិនដែលបានទទួលប្រាក់សងដែលបានសន្យានោះទេ៕

(ព័ត៌មានជាតិ)៖ ក្រសួងបរិស្ថាន បានរកឃើញរោងចក្រ និងក្រុមហ៊ុនចំនួន២៨ទីតាំង ដែលបានបង្ហូរទឹកកខ្វក់បំពុលតំបន់ទឹកសាធារណៈ ក្រុមការងារក្រសួងបរិស្ថាន បានរកឃើញរោងចក្រនិងក្រុមហ៊ុន ចំនួន២៨ទីតាំងផ្សេងគ្នា ដែលបានបញ្ចេញសំណល់រាវលើសកម្រិតកំណត់ស្ដង់ដារ ពុំមានអាងប្រព្រឹត្តិកម្មសម្អាតសំណល់រាវ និងបានបង្កឱ្យមានការបំពុលទឹកសាធារណៈ ក្នុងឆ្នាំ២០២៤-២០២៥។ រោងចក្រ និងក្រុមហ៊ុនទាំងអស់នោះ ស្ថិតនៅ ខេត្តប៉ៃលិន ចំនួន១ ទីតាំង ខេត្តកណ្តាល ចំនួន៣ទីតាំង រាជធានីភ្នំពេញ ចំនួន ៥ទីតាំង ខេត្តកំពង់ស្ពឺ ចំនួន៣ទីតាំង ខេត្តបាត់ដំបង ចំនួន ៣ទីតាំង ខេត្តព្រះសីហនុ ចំនួន ៩ទីតាំង ខេត្តកំពត ចំនួន១ទីតាំង និងខេត្តត្បូងឃ្មុំ ចំនួន៣ទីតាំង។ កន្លងមក ក្រសួងបរិស្ថាន បានចាត់វិធានការច្បាប់ និងវិធានការបច្ចេកទេស ចំពោះរោងចក្រ និងក្រុមហ៊ុន ដែលបានប្រព្រឹត្តបទល្មើសបញ្ចេញសំណល់រាវ បំពុលតំបន់ទឹកសាធារណៈទាំងអស់នោះ ដើម្បីទប់ស្កាត់ការបំពុលតំបន់ទឹកសាធារណៈ ដែលជាលទ្ធផល មានរោងចក្រ និងក្រុមហ៊ុន ចំនួន៧ ទីតាំង បានអនុវត្តវិធានការច្បាប់ និងវិធានការបច្ចេកទេសរួចរាល់។ ជាមួយគ្នានេះ រោងចក្រ សហគ្រាស និងក្រុមហ៊ុន ចំនួន ១៦ ទីតាំង នៅមិនទាន់បានអនុវត្ត និងកំពុងអនុវត្តវិធានការច្បាប់ និងវិធានការបច្ចេកទេស។ ដោយឡែករោងចក្រ សហគ្រាស និងក្រុមហ៊ុន ចំនួន៥ទីតាំង ត្រូវបានក្រសួងបរិស្ថាន ទើបបានរកឃើញបំពុលទឹកសាធារណៈ ហើយក្រសួងបរិស្ថាន កំពុងរៀបចំនីតិវិធី ដើម្បីចាត់វិធានការតាមច្បាប់ រួមមាន៖១- កាស៊ីណូខ្ញុំ មានទីតាំងនៅខេត្តកំពត មិនបានរៀបចំអាងប្រព្រឹត្តិកម្ម បញ្ចេញទឹកកខ្វក់មិនបានសម្អាតបង្កការបំពុលបរិស្ថាន។២- កាស៊ីណូ រ៉ុងស៊ឺងទី រីសត នៅខេត្តត្បូងឃ្មុំ មិនបានរៀបចំអាងប្រព្រឹត្តិកម្ម បញ្ចេញទឹកកខ្វក់មិនបានសម្អាតបង្កការបំពុលបរិស្ថាន។៣- កាស៊ីណូ Grand Golden.,Ltd នៅខេត្តត្បូងឃ្មុំ មិនបានរៀបចំអាងប្រព្រឹត្តិកម្ម បញ្ចេញទឹកកខ្វក់មិនបានសម្អាតបង្កការបំពុលបរិស្ថាន។៤- កាស៊ីណូ Pailin Trapaing នៅខេត្តត្បូងឃ្មុំ មិនបានរៀបចំអាងប្រព្រឹត្តិកម្ម បញ្ចេញទឹកកខ្វក់មិនបានសម្អាតបង្កការបំពុលបរិស្ថាន។៥- ក្រុមហ៊ុន Ji Li Long (Cambodia)Fruit industry Co., Ltd ប្រភេទកែច្នៃផ្លែស្វាយនៅខេត្តកណ្តាលបានបញ្ចេញសំណល់រាវលើសកម្រិតកំណត់ស្ដង់ដារ អាងប្រព្រឹត្តិកម្មពុំត្រឹមត្រូវតាមលក្ខណៈបច្ចេកទេស និងបានបំពុលទឹកស្ទឹងព្រែកត្នោតសូមបញ្ជាក់ថា ក្រុមហ៊ុន ចំនួន១ទីតាំង គឺក្រុមហ៊ុន Cambodian Noble Taste Food Co., Ltd. កំពុងស្ថិតនៅក្នុងនីតិវិធីតុលាការខេត្តព្រះសីហនុ បន្ទាប់ពីរកឃើញថាមិនបានអនុវត្តច្បាប់ផងដែរ។សូមបញ្ជាក់ថា ក្នុងអាណត្តិរាជរដ្ឋាភិបាល នីតិកាលទី៧ ក្រសួងបរិស្ថាន បានដាក់ចេញការអនុវត្តច្បាប់ ដោយមិនលើកលែង ចំពោះអ្នកប្រព្រឹត្តបទល្មើសធនធានធម្មជាតិ និងបរិស្ថាន ដើម្បីធានាប្រសិទ្ធភាព នៃកិច្ចគាំពារបរិស្ថាន និងការគ្រប់គ្រងធនធានធម្មជាតិប្រកបដោយចីរភាព។ ក្រសួងបរិស្ថាន សូមអំពាវនាវដល់ ម្ចាស់រោងចក្រ សហគ្រាស និងក្រុមហ៊ុនទាំងអស់ត្រូវគោរពច្បាប់ និងលិខិតបទដ្ឋានគតិយុត្តជាធរមាន របស់ព្រះរាជាណាចក្រកម្ពុជា និងត្រូវចូលរួមថែរក្សាប្រភពទឹកស្អាត ដើម្បីផ្តល់ប្រយោជន៍ដល់ ការរស់នៅរបស់ប្រជាជន និងការរីកចម្រើនផ្នែកសេដ្ឋកិច្ច និងសុខភាពសាធារណៈ៕

(ថៃ)៖ នាយកដ្ឋានប្រយុទ្ធនឹងជំងឺ (DDC) របស់ថៃបានបញ្ជាក់ពីការស្លាប់ដោយសារអង់ត្រាក់(Anthrax) ឬហៅថាជំងឺឈាមខ្មៅ នៅក្នុងខេត្ត Mukdahan ពាក់ព័ន្ធនឹងការទទួលទាន និងការចែកចាយសាច់គោក្នុងពិធីបុណ្យសាសនាមួយ។ មនុស្សសរុប ២៤៧ នាក់កំពុងស្ថិតក្រោមការស៊ើបអង្កេត និងយកសំណាកទៅពិនិត្យ។លោកវេជ្ជបណ្ឌិត Phanumat Yannawetsakun អគ្គនាយក DDC បានប្រកាសនៅថ្ងៃព្រហស្បតិ៍ (១ ឧសភា) ថា មនុស្សម្នាក់បានស្លាប់ដោយសារជំងឺ anthrax នៅខេត្តมุกដាហាន។ ជនរងគ្រោះជាកម្មករសំណង់ ភេទប្រុស អាយុ៥៣ឆ្នាំ មានជំងឺទឹកនោមផ្អែម។យោងតាមលោក Phanumat អ្នកជំងឺបានកើតដំបៅនៅដៃស្តាំកាលពីថ្ងៃទី២៤ ខែមេសា ហើយបានចូលសម្រាកព្យាបាលនៅមន្ទីរពេទ្យនៅថ្ងៃទី២៧ ខែមេសា។ រោគសញ្ញារបស់គាត់កាន់តែអាក្រក់ទៅៗ ដោយមុខរបួសប្រែជាខ្មៅ ហើមកូនកណ្តុរនៅក្រោមក្លៀកខាងស្តាំ ដួលសន្លប់ និងប្រកាច់មុនពេលគាត់ស្លាប់អំឡុងពេលព្យាបាល។វេជ្ជបណ្ឌិតសង្ស័យជំងឺអង់ត្រាក់ទ័រ ហើយបានបញ្ជូនសំណាកទៅមន្ទីរពិសោធន៍នៅនាយកដ្ឋានវិទ្យាសាស្ត្រវេជ្ជសាស្ត្រ និងវិទ្យាស្ថានបារ៉ាស់ណារ៉ាឌូរ៉ា។ ការធ្វើតេស្តបានបញ្ជាក់ពីការឆ្លងមេរោគ Bacillus anthracis ។ការស៊ើបអង្កេតដំបូងបានបង្ហាញថាអ្នកជំងឺត្រូវបានលាតត្រដាងបន្ទាប់ពីសត្វគោមួយក្បាលត្រូវបានសំលាប់ក្នុងអំឡុងពេលពិធីបុណ្យសាសនា។ សាច់ក្រោយមកត្រូវបានគេចែកចាយនិងបរិភោគនៅក្នុងភូមិ។ក្រុមត្រួតពិនិត្យជំងឺរួមគ្នាពី DDC ការិយាល័យភូមិភាគទី 10 នៅខេត្ត Ubon Ratchathani ការិយាល័យសុខាភិបាលខេត្ត និងមន្ទីរអភិវឌ្ឍន៍បសុសត្វបានស៊ើបអង្កេតឧប្បត្តិហេតុនេះ ហើយបានកំណត់អត្តសញ្ញាណបុគ្គលដែលមានហានិភ័យចំនួន 247 នាក់៖ 28 នាក់ដែលបានចូលរួមក្នុងការសំលាប់ និង 219 នាក់ដែលទទួលទានសាច់គោឆៅ។ ទំនាក់ទំនងដែលមានហានិភ័យខ្ពស់ត្រូវបានផ្តល់ថ្នាំអង់ទីប៊ីយោទិច ហើយវិធានការគ្រប់គ្រងជំងឺកំពុងបន្ត។សូមមានការប្រុងប្រយ័ត្នករណីជំងឺ អង់ត្រាក់(Anthrax)ឬហៅថាជំងឺឈាមខ្មៅ នៅក្នុងប្រទេថៃនាពេលនេះ។ ជំងឺអង់ត្រាក់ ជាប្រភេទជំងឺឆ្លងពីមនុស្សសត្វទៅមនុស្ស(Zoonosis) ហើយអាចបណ្ដាលឲ្យមនុស្សស្លាប់បាន។ជំងឺអង់ត្រាក់ (Anthrax) បង្កដោយ បាក់តេរី Bacillus anthracis។ ជាប្រភេទជំងឺឆ្លងពីសត្វទៅមនុស្ស។ សត្វដែលចម្លងជំងឺនេះសំខាន់ៗរួមមាន៖ គោ ក្របី ចៀម ពពែនិងសត្វព្រៃ។ មនុស្សអាចឆ្លងជំងឺនេះតាមរយៈការប៉ះពាល់ផ្ទាល់ទៅនឹងសត្វដែលមានរោគសញ្ញាអង់ត្រាក់, ការបរិភោគសាច់សត្វដែលមានជំងឺនេះ ជាពិសេសសាច់ឆៅ ឬសាច់ដែលចម្អិនមិនបានល្អ និងតាមរយៈការដកដង្ហើមស្រូបចូលនៅពពួក Spore ដែលបង្កជំងឺចូលទៅក្នុងផ្លូវដង្ហើម។អ្នកនាំពាក្យរដ្ឋាភិបាលលោក Chai Wacharonke បានបញ្ជាក់ថា ប្រទេសថៃកំពុងស្ថិតក្នុងការប្រុងប្រយ័ត្នខ្ពស់ចំពោះជំងឺ anthrax បន្ទាប់ពីមានការផ្ទុះឡើង នៅក្នុងប្រទេសឡាវដែលជាអ្នកជិតខាង។ មន្ត្រីជំនាញបានប្រមូលសំណាកដែលរួមមានសត្វគោ ក្របី ជ្រូក ដែលសង្ស័យសម្រាប់ធ្វើតេស្តនៅមជ្ឈមណ្ឌលស្រាវជ្រាវ និងអភិវឌ្ឍន៍សត្វពាហនៈភាគឦសានក្នុងខេត្តខនខេន។ កសិករកំពុងត្រូវបានជំរុញឱ្យមើលសញ្ញាដូចជាការងាប់សត្វភ្លាមៗ និងមានឈាមចេញពីមាត់ ច្រមុះ ឬរន្ធគូថ។ ប្រសិនបើមានរោគសញ្ញានេះ ត្រូវរាយការណ៍ជាបន្ទាន់ ហើយចៀសវាងការបើកសាច់ ឬបរិភោគសាច់ ។ សាធារណជនត្រូវបានណែនាំយ៉ាងខ្លាំងកុំឱ្យបរិភោគសាច់ឆៅ៕បសម្រួលជាមួយភ្នាក់ងារក្នុងស្រុកដើម្បីបង្កើនការតាមដានជំងឺទាំងមនុស្ស និងសត្វ ជាពិសេសនៅតាមតំបន់ព្រំដែន៕

(អន្តរជាតិ)៖ លោកប្រធានាធិបតីអាម៉េរិក Donald Trump បានដកតំណែងលោក Mike Waltz ចេញពីមុខ តំណែងជាទីប្រឹក្សាសន្តិសុខជាតិ បន្ទាប់ពីលោកជាប់ពាក់ព័ន្ធនឹងការធ្វើឲ្យបែកធ្លាយព័ត៌មាន សម្ងាត់យោធាអាម៉េរិកកាលពីខែមីនាតាមក្រុម Signal។ លោក Mike Waltz ត្រូវបានរងការស្តីបន្ទោសចំពោះការបញ្ចូលនិពន្ធនាយកនៃទស្សនាវដ្តី The Atlantic ដោយចៃដន្យ ចូលទៅក្នុងក្រុម Signal បានជជែកលម្អិតអំពីផែនការទម្លាក់គ្រាប់បែករបស់អាម៉េរិក នៅក្នុងប្រទេសយេម៉ែន។ ក្រោយមក ទស្សនាវដ្តី The Atlantic ក៏បានចុះផ្សាយអំពីការពិភាក្សា ផ្ទៃក្នុងទាក់ទងនឹងការវាយប្រហារទាំងនោះទៅកាន់ពិភពលោកទាំងមូលដែលធ្វើឲ្យរូបលោករងការអាម៉ាស់មិនធ្លាប់កើតមាន។លោកត្រាំ បានធ្វើឱ្យរង្គោះរង្គើរដ្ឋបាលថ្មីរបស់គាត់ជាលើកដំបូង និងកំពុងផ្លាស់ប្តូរទីប្រឹក្សាសន្តិសុខ ជាតិលោក Mike Waltz ឱ្យទៅធ្វើជាឯកអគ្គរដ្ឋទូតប្រចាំអង្គការសហប្រជាជាតិ។លោក​បាន​និយាយ​ថា លោក​បាន​ជ្រើសរើស​រដ្ឋលេខាធិការ Marco Rubio ឲ្យ​ធ្វើ​ជា​ទីប្រឹក្សា​សន្តិសុខ​ជាតិ​បណ្តោះអាសន្ន៕ 

នារាត្រីថ្ងៃទី៣០ ខែមេសា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនប្រតិភូធុរជនចិន និងអាមេរិក ដឹកនាំដោយលោក Xiao Jie នាយកប្រតិបត្តិក្រុមហ៊ុន Zhejiang Yuhang Holdings Group Co., Ltd. ដែលមានក្លឹបវាយកូនហ្គោលជាច្រើននៅប្រទេសចិន និងសហការី អញ្ជើញចូលជួបសម្តែងការគួរសម និងពិភាក្សាការងារ ព្រមទាំងស្នើសុំការគំាំទ្រការពីក្រសួងទេសចរណ៍លើគម្រោងរៀបចំព្រឹត្តិការណ៍ជំនួបធុរកិច្ចអន្តរជាតិភ្ជាប់ការរៀបចំព្រឹត្តិការណ៍កីឡាទេសចរណ៍កូនហ្គោលកម្ពុជា-ចិន ដែលជាផលិតផលទេសចរណ៍ធុរកិច្ចថ្មី និងមានតម្លៃបន្ថែម ប្រកបដោយលក្ខណៈប្រណិតភាព។ក្នុងឱកាសនៃជំនួបដ៏មានសារៈសំខាន់ និងផ្លែផ្កានេះ ឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពស់ចំពោះគំនិតផ្តួចផ្តើមរបស់ក្រុមប្រតិភូធុរជនចិនអាមេរិក ដើម្បីចូលរួមចំណែកទាក់ទាញភ្ញៀវទេសចរអន្តរជាតិ ពិសេសប្រជាពលរដ្ឋចិន អញ្ជើញមកទស្សនាកម្ពុជាឱ្យបានកាន់តែច្រើន ព្រមទាំងអភិវឌ្ឍន៍លើការស្នាក់នៅ បដិសណ្ឋារកិច្ច ម្ហូបអាហារ ផលិតផលទេសចរណ៍ថ្មីបន្ថែម។ ជាមួយគ្នានេះ ក្រសួងទេសចរណ៍ ស្នើក្រុមហ៊ុន ជួយសហការទប់ស្កាត់ព័ត៌មានមិនពិតអំពីប្រទេសកម្ពុជាដូចដែលក្រុមហ៊ុនបានរាយការណ៍ជូនដែលជះឥទ្ធិពលមិនល្អពីប្រទេសកម្ពុជាពិសេសវិស័យទេសចរណ៍ និងទំនាក់ទំនងរវាងប្រទេសទាំងពីរ។ ក្រសួង ស្នើក្រុមហ៊ុនជួយសហការផ្សព្វផ្សាយពីសភាពការណ៍ពិតដូចប្រតិភូបានមកដល់ និងឃើញជាក់ស្តែងថាកម្ពុជា ជាប្រទេសមានសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គមល្អ ការអភិវឌ្ឍគ្រប់វិស័យ ជាពិសេសផ្តល់នូវសុខសុវត្ថិភាពល្អដល់អ្នកទេសចរ និងអ្នកវិនិយោគ រួមទាំងប្រជាពលរដ្ឋចិនអាមេរិក៕

(សង្គម)៖ អ្នកប្រើប្រាស់បណ្ដាញសង្គមហ្វេសប៊ុកសម្ដែងក្ដីរំភើប និងស្ញប់ស្ញែងយ៉ាងខ្លាំងចំពោះទឹកចិត្តរបស់កុមារាតូចម្នាក់ ខណៈខ្លួនកំពុងទីទាល់លំបាកមានលុយតិចតួចជាប់ខ្លួននោះទេ ប៉ុន្តែដោយហេតុថាមានចិត្តបុណ្យ កុមារារូបនេះសុខចិត្តយកលុយមួយចំណែកដាក់ចូលប្រអប់មូលនិធិមន្ទីរពេទ្យកុមារអង្គរ។យ៉ាងណាមិញ យោងតាមអ្នកប្រើប្រាស់បណ្ដាញសង្គមម្នាក់ ដែលមានគណនីឈ្មោះថា Him lyheng បានធ្វើការបង្ហោះវីដេអូខ្លីមួយដែលបង្ហាញពីសកម្មភាពរបស់ក្មេងប្រុសម្នាក់កំពុងយករបស់ខ្លួនចំនួន ៥០០រៀល ដាក់ចូលក្នុងប្រអប់មូលនិធិមន្ទីរពេទ្យកុមារអង្គរ ដែលមានទីតាំងនៅឱសថស្ថានមួយកន្លែង។ ជាមួយគ្នានេះដែរ ម្ចាស់គណនីរូបនេះក៏បានភ្ជាប់មកជាមួយសំណេរខ្លឹមសារឱ្យបានដឹងថា ក្មេងតូចរូបនេះបានសួរទៅកាន់អ្នកគ្រូពេទ្យនៅទីនោះថា «ខ្ញុំដាក់ចូលបានអត់?» ស្របពេលជាមួយគ្នា អ្នកគ្រូពេទ្យក៏បានតបថា «ខ្លួនកំពុងពិបាកផង បើចង់ដាក់ក៏ដាក់ទៅ»។ ម្ចាស់គណនីដដែលរូបនេះបានសរសេរបន្តថា៖ ក្មេងតូចមានលុយ៤០០០រៀល រួចបានចែករំលែកលុយរបស់ខ្លួន 500រៀល ជូនដល់មូលនិធិមន្ទីរពេទ្យកុមារអង្គរ ក្រទ្រព្យតែមិនក្រចិត្ត សង្ឃឹមថាទង្វើរដែលប្អូនធ្វើថ្ងៃនេះ និងបានសងត្រលប់ទៅប្អូននៅថ្ងៃក្រោយអោយមានជីវភាពប្រសើរជាងនេះ អំពើល្អមិនសាបសូន្យ។តាមរយៈការបង្ហោះដែលបង្ហាញពីទិដ្ឋភាព បូករួមគ្នាខ្លឹមសារទាំងនេះ បានធ្វើឱ្យមហាជនជាច្រើននាំគ្នាចែករំលែក ដោយពុំភ្លេចភ្ជាប់មកជាមួយការសរសើរ និងស្ញប់ស្ញែងនូវទឹកចិត្តដ៏ល្អប្រពៃមួយនេះ ជាងនេះទៅទៀតក៏មានមហាជនដទៃទៀតបានសម្ដែងនូវក្ដីមោទភាពដែលក្នុងសង្គមខ្មែរមានកុមារតូចៗដែលមានទឹកចិត្តចេះចង់ជួយចែករំលែកទៅកាន់សង្គមទៅដូច្នេះ៕

(កម្សាន្ត)៖ ពាក្យពេជន៍ប៉ុន្មានឃ្លារបស់កូនស្រីពៅតារាសម្ដែងកំប្លែងនាយក្រិន បានធ្វើឱ្យមហាជនមិនតិចនោះទេបានស្រក់ទឹកភ្នែកតាមផង រំជួលចិត្ត និងអួលដើមករផង ដោយហេតុថានេះគឺរឿងមនោសញ្ចេតនារវាងឱពុក និងកូនផងនោះ។យ៉ាងណាមិញ នាពេលថ្មីៗនេះ នាយក្រិន និងកូនៗទាំងបីរបស់ខ្លួន បានបង្ហាញខ្លួន ក្នុងកម្មវិធី 3Fun Talk Show ខណៈក្នុងវីដេអូ កូនស្រីពៅរបស់នាយក្រិនបានពោលពាក្យប៉ុន្មានឃ្លាទាក់ទងនឹងជីវភាពក្នុងគ្រួសារ។ ដោយក្នុងនោះអ្វីដែលធ្វើឱ្យគេចាប់អារម្មណ៍ខ្លាំងគឺត្រង់នាទីដែលកុមារីតូចរូបនេហបាននិយាយថា «ពេលអត់បាយហូប ខ្ញុំពីរនាក់ប៉ាខ្ញុំ ជាមួយបងៗ ញ៉ាំអំបិល។ ទំលាប់ខ្ញុំ ភ្ញាក់ពីគេងដួសបាយញ៉ាំហើយ បាយទទេក៏ខ្ញុំញ៉ាំដែរ ពេលអត់បាយញ៉ាំ ខ្ញុំអាចទ្រាំបាន ខ្ញុំផឹកទឹកឱ្យឆ្អែត»។តាមរយៈវីដេអូក្នុងបទសម្ភាស្តនេះផងដែរ បានធ្វើឱ្យមហាជនជាច្រើនសម្ដែងក្ដីអាណិតយ៉ាងខ្លាំងចំពោះគ្រួសារដ៏កំសត់មួយនេះ។ ជាមួយគ្នានេះផងដែរក៏មានមហាជនជាច្រើនបានសរសើរទៅកាន់កុមារីរូបនេះ ដែលមានភាពឆ្លាតវ័យដែលនៅតូចនោះទេប៉ុន្តែចេះគិតគូរពីឳពុក និងខ្លាចក្រុមគ្រួសារលំបាកបែបនេះ។ ម្យ៉ាងទៀតគេក៏ពុំភ្លេចលើកសរសើរពីនាយក្រិនផងដែរ ដែលមានសមត្ថភាពអាចអប់រំកូនៗឱ្យក្លាយជាក្មេងល្អ និងដើរតាមគន្លងធម៌ដូច្នេះ៕

(ភ្នំពេញ)៖ សាលាគណរាជធានីភ្នំពេញ និងមន្ទីរធម្មការនិងសាសនារាជធានីភ្នំពេញ បានចេញសេចក្តីណែនាំស្តីពី ការនិមន្តគោចរបិណ្ឌបាត និងការនិមន្តក្នុងសាធារណដ្ឋាននៃរាជធានីភ្នំពេញ។ យ៉ាងណាមិញ ដើម្បីទប់ស្កាត់បញ្ហាឱ្យមានប្រសិទ្ធភាព និងទទួលបានជោគជ័យបន្ថែមទៀត សាលាគណ និងមន្ទីរ ធម្មការនិងសាសនារាជធានីភ្នំពេញ សូមធ្វើការណែនាំដូចខាងក្រោម៖១- ការនិមន្តគោចរបិណ្ឌបាតរបស់ភិក្ខុ សាមណេរគ្រប់រូប ត្រូវប្រកបដោយអភិសមាចារ និមន្តបាន តែក្នុងកន្លែងជាទីគោចរតែម៉្យាងប៉ុណ្ណោះ។ ហាមការនិមន្តបិណ្ឌបាតនៅមុខមន្ទីរពេទ្យ ក្នុងទីផ្សារ តាមរោង ចក្រ សហគ្រាស ចំណតរថយន្ត ឬតាមកម្មវិធីបុណ្យនានាដែលមិនមានការនិមន្ត។២- ហាមភិក្ខុ សាមណេរ គង់កំសាន្តតាមសួនច្បារមុខព្រះបរមរាជវាំង សួនសាធារណៈ ហាងកាហ្វេ នៅតំបន់មាត់ទន្លេចតុម្មុខ និងក្នុងតំបន់ផ្លូវសម្រាប់ថ្មើរជើងចាប់ពីមុខព្រះបរមរាជវាំង ដល់រមណីយដ្ឋាន វប្បធម៌ប្រវត្តិសាស្ត្រវត្តភ្នំ ជាដើម ចាប់ពីម៉ោង ៦:០០នាទីល្ងាច ដល់ម៉ោង ១១:០០នាទីយប់។៣- ព្រះចៅអធិការគ្រប់វត្ត មានភារកិច្ចអប់រំ ណែនាំ និងត្រួតពិនិត្យការសិក្សារៀនសូត្រ និងការ បដិបត្តិធម៌វន័យរបស់ភិក្ខុ សាមណេរក្រោមឱវាទឱ្យស្ថិតក្នុងត្រៃសិក្ខាទាំង៣ គឺ សីល សមាធិ បញ្ញា ពិសេស ឱ្យចូលរួមអនុវត្តខ្លឹមសារខាងលើឱ្យបានហ្មត់ចត់បំផុត។ ក្នុងករណីដែលភិក្ខុ សាមណេររូបណាពុំបានគោរព តាមសេចក្តីណែនាំខាងលើនេះ ត្រូវសហការជាមួយមន្ត្រីសង្ឃសាលាគណ សាលាអនុគណ មន្ទីរធម្មការ និងសាសនារាជធានីភ្នំពេញ និងអាជ្ញាធរមានសមត្ថកិច្ចពាក់ព័ន្ធ ដោះស្រាយឱ្យបានត្រឹមត្រូវទៅតាមធម៌ វិន័យ និងបទប្បញ្ញត្តិផ្សេងៗជាធរមាន។៤- សាលាអនុគណគ្រប់ខណ្ឌ ត្រូវរៀបចំក្រុមការកសង្ឃរបស់សាលាអនុគណ របស់វត្តនីមួយៗក្នុង ខណ្ឌ ដើម្បីចុះអនុវត្តទប់ស្កាត់ការនិមន្តគោចរបិណ្ឌបាតនៅតាមទីអគោចរដ្ឋាន និងនិមន្តចូលទៅកាន់ទីកន្លែង កំសាន្តសាធារណៈនានានៅក្នុងមូលដ្ឋានរបស់ខ្លួន ពិសេសសាលាអនុគណខណ្ឌដូនពេញ ត្រូវរៀបចំ សង្ឃមួយក្រុមដើម្បីអនុវត្តការងារនេះ។ ព្រមជាមួយនេះ គ្រប់សាលាអនុគណ ត្រូវត្រៀមលក្ខណៈ សហការជាមួយមន្ទីរធម្មការនិងសាសនារាជធានីភ្នំពេញឱ្យបានជិតស្និទ្ធ សំដៅចុះទប់ស្កាត់សកម្មភាពតាម ទីដែលហាមឃាត់ខាងលើ ឱ្យទទួលបានជោគជ័យ ស្របតាមគោលការណ៍កំណត់៕

(ហ្សាការតា)៖ នារីវ័យ 24 ឆ្នាំដែលបច្ចុប្បន្នកំពុងអត់ការងារធ្វើបានឮ អំពីនិន្នាការមាសដែលកំពុង កើនឡើង កំពុងដណ្តើមគ្នាទិញពេញប្រទេសក្នុងប៉ុន្មានសប្តាហ៍ថ្មីៗនេះ ដូច្នេះនាងបានក្រោកពីព្រលឹម មួយម៉ោងមុនពេលហាងបើក។ទោះយ៉ាងណា នាងយឺតពេលហើយ។ មនុស្សចំនួន 50 នាក់ បានចូលដល់កន្លែងដើម្បីទិញមាសតាំង ពីខែមេសា ហើយវាពេញហើយ។ នាង​បាន​ត្រឡប់​មក​វិញ​នៅ​ថ្ងៃ​បន្ទាប់​នៅ​ម៉ោង ៦ ព្រឹក ប៉ុន្តែ​វា​ជា​រឿង​ដដែល។នាងប្រាប់​ថា មនុស្ស​ជា​ច្រើន​បាន​មក​ចាំតាំងពីយប់ ​ដើម្បី​យក​លេខ​ដើម្បី​តម្រង់​ជួរ​ទិញមាស»។ជាមួយនឹងមាសឡើងថ្លៃខ្ពស់គ្រប់ពេលវេលា ការធ្លាក់ចុះនៃសេដ្ឋកិច្ចក្នុងប្រទេសឥណ្ឌូនេស៊ី និង ការព្រួយបារម្ភអំពីរបៀបដែលពន្ធរបស់ប្រធានាធិបតីអាមេរិក Donald Trump នឹងប៉ះពាល់ដល់ សេដ្ឋកិច្ចពិភពលោក ប្រជាជនឥណ្ឌូនេស៊ីជាច្រើនបានប្រញាប់ប្រញាល់ទិញមាស បើទោះបីជាត្រូវ តម្រង់ជួរតាំងពីយប់ក៏ដោយ។ អ្នកជំនាញបាននិយាយថា មាសឡើងកំដៅបានកើតឡើងពីមុននៅក្នុងប្រទេស ថ្មីៗនេះ ក្នុងអំឡុង ពេលនៃការរាតត្បាតនៃជំងឺកូវីដ-១៩ ហើយចលចលនាពេលបច្ចុប្បន្នបានឈានដល់កម្រិតថ្មីមួយ ខណៈពួកគេរំលឹកអ្នកប្រើប្រាស់ឱ្យប្រុងប្រយ័ត្នចំពោះស្ថានភាពសេដ្ឋកិច្ចដែលប្រែប្រួល។សេដ្ឋវិទូ Eko Listiyanto មកពីវិទ្យាស្ថានអភិវឌ្ឍន៍សេដ្ឋកិច្ច និងហិរញ្ញវត្ថុ (INDEF) បាននិយាយថា នៅក្នុងប្រទេសឥណ្ឌូនេស៊ី មនុស្សតម្រង់ជួរដើម្បីទិញមាស បានចាប់ផ្តើមយឺតៗជាច្រើនខែមុន នៅពេលដែលលោក Trump ហៀបនឹងវិលត្រឡប់ទៅកាន់អំណាចវិញ។ ប៉ុន្តែវាបានកើនឡើងកាន់តែខ្លាំងក្នុងប៉ុន្មានសប្តាហ៍ថ្មីៗនេះបន្ទាប់ពីការប្រកាសពន្ធរបស់លោក Trump ។សហរដ្ឋអាមេរិកបានប្រកាសពន្ធ 32 ភាគរយលើទំនិញនាំចូលឥណ្ឌូណេស៊ីនៅថ្ងៃទី 2 ខែមេសា។គួរបញ្ជាក់ថា បច្ចុប្បន្នហាងឆេងមាសបានឡើងថ្លៃទូទាំងពិភពលោក ហើយហាងឆេងនៅកម្ពុជា ឡើងដល់ជាង៤០០០ដុល្លារក្នុងមួយតម្លឹង៕  

(អន្តរជាតិ)៖ ក្រុមហ៊ុន Apple បានរាយការណ៍ពីប្រាក់ចំណេញក្នុងត្រីមាសទី1 លើសពីការរំពឹងទុក ប៉ុន្តែ បានព្រមានថាពន្ធគយរបស់សហរដ្ឋអាមេរិកអាចធ្វើឱ្យក្រុមហ៊ុនខាតបង់ និងកំពុងរំខានដល់ខ្សែ សង្វាក់ផ្គត់ផ្គង់របស់ខ្លួន។នាយកប្រតិបត្តិ Tim Cook បាននិយាយថា ក្រុមហ៊ុន Apple រំពឹងថា ពន្ធរបស់សហរដ្ឋអាមេរិកនឹង មានតម្លៃ 900 លានដុល្លារអាមេរិកនៅក្នុងត្រី មាសបច្ចុប្បន្ន ទោះបីជាផលប៉ះពាល់របស់ពួកគេមានកម្រិត "នៅដើមឆ្នាំនេះក៏ដោយ។លោក Cook បាននិយាយថា លោករំពឹងថា "iPhone ភាគច្រើនដែលលក់នៅសហរដ្ឋអាមេរិកនឹង មាន ប្រភពដើមមកពីប្រទេសឥណ្ឌា ដោយបន្ថែមថា ផលិតផលរបស់ Apple ត្រូវបានលើកលែងពីពន្ធគយ ធ្ងន់ធ្ងរបំផុតរបស់ Trump សម្រាប់ពេលនេះ។លោក Cook បាននិយាយថា "យើងមិនអាចប៉ាន់ប្រមាណបានច្បាស់លាស់ពីផលប៉ះពាល់ នៃពន្ធគយនោះទេ ដោយសារយើងមានភាពមិនច្បាស់លាស់នៃសកម្មភាពអនាគត ដ៏មានសក្តានុពល នៅមុនដំណាច់ត្រីមាស" "ដោយសន្មតថា អត្រាពន្ធសកលបច្ចុប្បន្ន គោលនយោបាយ និងកម្មវិធី មិនផ្លាស់ប្តូរសម្រាប់សមតុល្យនៃត្រីមាស និងមិនមានពន្ធថ្មីត្រូវបានបន្ថែមទេ យើងប៉ាន់ប្រមាណថា ផលប៉ះពាល់នឹងបន្ថែម 900 លានដុល្លារដល់ការចំណាយរបស់យើង" ។ការដាក់ពន្ធទៅវិញទៅមក ត្រូវបានគេមើលឃើញថា មានការយកពន្ធយ៉ាងច្រើនពីសហរដ្ឋអាមេរិក មកលើប្រទេសចិន ដោយទីក្រុងប៉េកាំងបានកំណត់របាំងសងសឹកលើការនាំចូលរបស់សហរដ្ឋអាមេរិក។ទំនិញបច្ចេកវិជ្ជាខ្ពស់ដូចជា ស្មាតហ្វូន គ្រឿងអេឡិចត្រូនិក និងកុំព្យូទ័រ បានទទួលការដកជាបណ្តោះ អាសន្នពីពន្ធរបស់សហរដ្ឋអាមេរិក។ខណៈពេលដែលទូរស័ព្ទ iPhone ដែលផលិតនៅក្នុងប្រទេសចិនដីគោកនៅតែមានចំនួនភាគច្រើន នៃការនាំចេញរបស់សហរដ្ឋអាមេរិក ការផលិតនៅក្នុងប្រទេសឥណ្ឌាបានកើនឡើង រហូតដល់ចុងត្រីមាស ៕

(អន្តរជាតិ)៖ មជ្ឈមណ្ឌលស្រាវជ្រាវសេដ្ឋកិច្ច និងធុរកិច្ច (CEBR) បាននិយាយ នៅក្នុងរបាយការណ៍ របស់ខ្លួន “តារាងសម្ព័ន្ធសេដ្ឋកិច្ចពិភពលោកឆ្នាំ 2022” បានព្យាករណ៍ថា វៀតណាមនឹងក្លាយជា មហាអំណាច សេដ្ឋកិច្ចទីពីរនៅអាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ី និងជាប្រទេសដែលមាន សេដ្ឋកិច្ចធំជាងគេទី 20 នៅលើពិភពលោកនៅឆ្នាំ 2036 ។របាយការណ៍បានចង្អុលបង្ហាញថា គិតត្រឹមឆ្នាំ 2021 វៀតណាមត្រូវបានគេប៉ាន់ប្រមាណថាមានអំណាច ទិញស្មើរគ្នា ដែលបានកែសម្រួល GDP ក្នុងមនុស្សម្នាក់ចំនួន 11608 ដុល្លារអាមេរិក។របាយការណ៍បាននិយាយថា រឿងកំណើនសេដ្ឋកិច្ចរបស់វៀតណាមមិនមែនជាអព្ភូតហេតុពេលខ្លីនោះទេ ជាមួយនឹងកំណែទម្រង់ Doi Moi នៅពាក់កណ្តាលទសវត្សរ៍ឆ្នាំ 1980 រួមជាមួយនឹងនិន្នាការសកល ដែលអំណោយផល ធ្វើឱ្យប្រទេសជាតិសម្រេចបាននូវកំណើនសេដ្ឋកិច្ចយ៉ាងឆាប់រហ័ស និងជំរុញ ប្រទេសពីសេដ្ឋកិច្ចក្រីក្រទៅជាថ្នាក់កណ្តាលទាប។វៀតណាមប្រាថ្នាចង់ទទួលបានឋានៈប្រាក់ចំណូលខ្ពស់នៅឆ្នាំ 2045 ដើម្បីឲ្យ កើនឡើងក្នុងអត្រាជា មធ្យមប្រចាំឆ្នាំប្រហែល 5% ក្នុងមនុស្សម្នាក់។យ៉ាងណាក៏ដោយ ប្រទេសនេះប្រឈមមុខនឹងបញ្ហាប្រឈមសំខាន់ៗនៅលើផ្លូវរបស់ខ្លួន​ដើម្បីក្លាយជា ប្រទេសមានប្រាក់ចំណូលខ្ពស់។ ជាមួយនឹងការថយចុះពាណិជ្ជកម្មពិភពលោក និងចំនួនប្រជាជន កាន់តែចាស់ វាចាំបាច់ត្រូវកែលម្អការអនុវត្តគោលនយោបាយរបស់ខ្លួនយ៉ាងខ្លាំង ជាពិសេសនៅក្នុង វិស័យដែលនឹងត្រូវរងផលប៉ះពាល់យ៉ាងធ្ងន់ធ្ងរដោយស្វ័យប្រវត្តិកម្ម និងការប្រែប្រួលអាកាសធាតុ។ចន្លោះឆ្នាំ 2021 និង 2036 របាយការណ៍ CEBR ព្យាករណ៍ថា ទីតាំងរបស់វៀតណាមក្នុងតារាង សម្ព័ន្ធសេដ្ឋកិច្ចពិភពលោកនឹងប្រសើរឡើងគួរឱ្យកត់សម្គាល់ ដោយចំណាត់ថ្នាក់របស់វាកើនឡើងពី លេខ 41 ដល់ទី 20 នៅឆ្នាំ 2036៕

(អន្តរជាតិ)៖ នាយករដ្ឋមន្ត្រី Pham Minh Chinh បាននិយាយថា វៀតណាមត្រូវការទិញផលិតផលរបស់ សហរដ្ឋអាមេរិកបន្ថែមទៀត រួមទាំងឧស្ម័នធម្មជាតិរាវ យន្តហោះ និងថ្នាំពេទ្យ ដើម្បីជាប្រយោជន៍ដល់ តុល្យភាពពាណិជ្ជកម្ម។នៅក្នុងកិច្ចប្រជុំរដ្ឋាភិបាលដែលបានធ្វើឡើង ដើម្បីពិភាក្សាអំពីពន្ធគយទៅវិញទៅមករបស់ សហរដ្ឋអាមេរិក លោក Chinh បាននិយាយថា ការចរចាពាណិជ្ជកម្មរបស់វៀតណាមកំពុងដំណើរការល្អ ប៉ុន្តែកិច្ចសន្យានាំចូលផលិតផលអាមេរិកគឺចាំបាច់ដើម្បីធានាថាពួកគេបន្តដោយរលូន។រដ្ឋបាល Trump បានផ្អាករយៈពេល 90 ថ្ងៃចំពោះអត្រាខ្ពស់នៃពន្ធគយដែលខ្លួនបានប្រកាស លើដៃគូ ពាណិជ្ជកម្មរបស់ខ្លួន រួមទាំងវៀតណាមផងដែរ។ អត្រាបណ្តោះអាសន្នបច្ចុប្បន្នគឺ 10% ។ក្រុមមួយមកពីប្រទេសវៀតណាមត្រូវបានគេរំពឹងថានឹងធ្វើទស្សនកិច្ចទៅកាន់សហរដ្ឋអាមេរិកនៅថ្ងៃព្រហស្បតិ៍សម្រាប់ការចរចាលើពាណិជ្ជកម្មទ្វេភាគី។លោក Chinh បានស្វែងរកការចរចាដើម្បីធ្វើឱ្យពន្ធនាំចូលរបស់ប្រទេសទាំងពីរមានតុល្យភាព និងទាប។វៀតណាមក៏គ្រោងស្នើអាមេរិកឱ្យទទួលស្គាល់ខ្លួនថាជាសេដ្ឋកិច្ចទីផ្សារ និងដកការរឹតត្បិតលើការនាំចេញបច្ចេកវិជ្ជាខ្ពស់។លោក Chinh បាននិយាយថា ការចរចាត្រូវតែធានាអធិបតេយ្យភាពរបស់វៀតណាម សន្តិសុខជាតិ ដែលជាផលប្រយោជន៍របស់ប្រជាជន ហើយថា ខ្លួនអាចបំពេញតាមការសន្យាអន្តរជាតិរបស់ខ្លួន៕

(អន្តរជាតិ)៖ សារព័ត៌មាន Bernama បានរាយការណ៍ថា ប្រទេសម៉ាឡេស៊ីបានរក្សាតំណែងរបស់ខ្លួន ដោយជោគជ័យជាអ្នកនាំចេញទំនិញបច្ចេកវិទ្យាខ្ពស់ធំជាងគេទី 9 ក្នុងចំណោមប្រទេស 143 ក្នុងឆ្នាំ 2023 ដែលជាការទទួលស្គាល់ខ្ពស់បំផុតដែលខ្លួនសម្រេចបានក្នុងទសវត្សរ៍កន្លងមក។នៅក្នុងពិធីសម្ពោធរបាយការណ៍ការអនុវត្តបច្ចេកវិទ្យាខ្ពស់របស់ម៉ាឡេស៊ីឆ្នាំ 2023 លោក Datuk Seri Hasnol Zam Zam Ahmad អគ្គលេខាធិការនៃក្រសួងវិទ្យាសាស្ត្រ បច្ចេកវិទ្យា និងនវានុវត្តន៍ម៉ាឡេស៊ី (MOSTI) បាននិយាយថា ការនាំចេញបច្ចេកវិទ្យាខ្ពស់របស់ប្រទេសម៉ាឡេស៊ីបានកើនឡើងចំនួន 2 ពាន់លានដុល្លារអាមេរិក ដល់ទៅ 127 ពាន់លានដុល្លារក្នុងឆ្នាំ 2023 ។ 52.48% កត់ត្រាក្នុងឆ្នាំ 2022 ។លោកក៏បានកត់សម្គាល់ផងដែរថាប្រទេសនេះបានកត់ត្រាអតិរេកពាណិជ្ជកម្មខ្ពស់បំផុតរបស់ខ្លួនក្នុងរយៈពេលមួយទសវត្សរ៍ដែលមានចំនួនសរុប 51.5 ពាន់លានដុល្លារ។លោកបានបន្តថា ការវាស់ស្ទង់តម្លៃនៃការនាំចេញបច្ចេកវិទ្យាខ្ពស់របស់ម៉ាឡេស៊ីគឺមិនមែនជាកិច្ចការងាយស្រួលនោះទេ។ ជាដំបូង និងសំខាន់បំផុត និយមន័យនៃ 'បច្ចេកវិទ្យាខ្ពស់' ត្រូវតែគោរពតាមស្តង់ដារ អន្តរជាតិ រួមទាំងការកំណត់ដោយអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) និងធនាគារពិភពលោក៕

(កំពង់ស្ពឺ)៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានកិត្តិយសសាខាកាកបាទក្រហមកម្ពុជា ខេត្តកំពង់ស្ពឺ បានអញ្ជើញជាអធិបតីដ៏ខ្ពង់ខ្ពស់ក្នុងពិធី «អបអរខួបលើកទី១៦២ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ២០២៥ ក្រោមមូលបទ «រួមគ្នាស្ម័គ្រចិត្ត ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» នៅក្នុងបរិវេណណសាលាខេត្តកំពង់ស្ពឺ កាលពីព្រឹកថ្ងៃទី០១ ខែឧសភា ឆ្នាំ២០២៥។ ក្នុងសុន្ទរកថាស្វាគមន៍ និងរបាយការណ៍ស្តីពីសកម្មភាពការងាររបស់សាខាកាកបាទក្រហមកម្ពុជា ខេត្តកំពង់ស្ពឺ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ស្ពឺ បានជម្រាបជូនអង្គពិធីថា អស់រយៈកាល ៥ឆ្នាំជាប់គ្នានាពេលកន្លងមក (២០២០-២០២៤) ដែលសាខាកាកបាទ ក្រហមកម្ពុជាខេត្ត ខកខានពុំបានប្រារព្ធមីទ្ទីងនេះឡើង ដោយមូលហេតុនៃការរាតត្បាតជម្ងឺកូវីដ-១៩ (គ្រាន់តែធ្វើលិខិតអំពាវនាវ)។ ទើបតែនៅថ្ងៃទី១ ខែឧសភា ឆ្នាំ២០២៥នេះ សាខាកាកបាទក្រហមកម្ពុជាខេត្តកំពង់ស្ពឺ បានប្រារព្ធពិធីនេះឡើងវិញ ដើម្បីអំពាវនាវស្វែងរកការជួយគាំទ្រពីសប្បុរសជននានាគ្រប់មជ្ឈដ្ឋាន។ ក្នុងនាមគណៈកម្មាធិការសាខាកាកបាទក្រហមកម្ពុជាខេត្ត ឯកឧត្តមអភិបាលខេត្ត បានសម្ដែងនូវការកោតសរសើរ និងគោរពដឹងគុណជាអនេក ចំពោះទឹកចិត្តប្រកបដោយព្រហ្មវិហារធម៌របស់សប្បុរសជន ដែលបានរួមចំណែកជួយដល់ជនរងគ្រោះ និងងាយរងគ្រោះឱ្យមានភាពកក់ក្តៅតាមរយៈ សាខាកាកបាទក្រហមកម្ពុជាខេត្ត និងបានរួមចំណែកកាត់បន្ថយការលំបាកចំពោះមុខរបស់គ្រួសាររងគ្រោះដែលត្រូវការជំនួយបានមួយកម្រិត។ឯកឧត្តមឧបនាយករដ្ឋមន្ត្រី ហ៊ុន ម៉ានី បានលើកឡើងថា អង្គមិទ្ទិញយើងនាពេលនេះ គឺពិតជាមានសារៈសំខាន់ខ្លាំងណាស់ សម្រាប់កាកបាទក្រហមកម្ពុជា ជាពិសេសសម្រាប់សាខាកាកបាទក្រហមខេត្តកំពង់ស្ពឺ អាជ្ញាធរដែនដីគ្រប់លំដាប់ថ្នាក់ និងប្រជាពលរដ្ឋក្នុងខេត្តកំពង់ស្ពឺទាំងមូលតែម្តង ពីព្រោះការចូលរួមបរិច្ចាគ សប្បុរសជនទាំងអស់នៅថ្ងៃនេះ នឹងជួយឱ្យសាខាកាកបាទក្រហមកម្ពុជាខេត្តកំពង់ស្ពឺ មានលទ្ធភាពក្នុងការបន្តបេសកកម្មរបស់ខ្លួន ក្នុងបុព្វហេតុមនុស្សធម៌ ជាបន្តទៀត។ “ប្រតិបត្តិការផ្តល់ជំនួយសង្រ្គោះ ដោយគ្មានការរើសអើង ដែលបាន និងកំពុងអនុវត្តយ៉ាងសកម្ម គ្រប់ពេលវេលា គ្រប់ទីកន្លែង នៅទូទាំងប្រទេស ជូនដល់ ប្រជាពលរដ្ឋងាយរងគ្រោះ និងអ្នករងគ្រោះដោយគ្រោះមហន្តរាយផ្សេងៗ គឺជាចំណែកមួយដ៏សំខាន់ក្នុងការចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្រ លើកកម្ពស់តម្លៃមនុស្សធម៌ និងសេចក្តីថ្លៃថ្នូររបស់មនុស្សជាតិ ដែលស្របតាមពាក្យស្លោកដែលពោលថា «ទីណាមានទុក្ខលំបាក ទីនោះមានកាកបាទក្រហមកម្ពុជា» ហើយ «កាកបាទក្រហមកម្ពុជា ជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌»។” ឯកឧត្តមបានបន្ថែម។ក្នុងនាមប្រធានកិត្តិយសសាខាកាកបាទក្រហមខេត្ត ឯកឧត្តមឧបនាយករដ្ឋមន្ត្រី ហ៊ុន ម៉ានី បានផ្តល់អនុសាសន៍ ចំនួន៦ ដល់អាជ្ញាធរពាក់ព័ន្ធ ដើម្បីត្រៀមខ្លួនប្រុងប្រយ័ត្នទុកជាមុន ក្នុងការជួយសង្រ្គោះប្រជាពលរដ្ឋ លើបញ្ហាទាំងអស់នេះ ដែលអាចនឹងកើតឡើងជាយថាហេតុ រួមមាន៖ ទី១. សាខាកាកបាទក្រហមកម្ពុជាខេត្តកំពង់ស្ពឺ និងអនុសាខាកាកបាទក្រហមក្រុង ស្រុកទាំង៩ ត្រូវបង្កើនកិច្ចសហការគ្នាឱ្យបានល្អ ជាមួយអាជ្ញាធរគ្រប់លំដាប់ថ្នាក់ ដើម្បីត្រៀមលក្ខណៈឆ្លើយតបបន្ទាន់ទៅនឹងសេចក្តីត្រូវការរបស់ប្រជាពលរដ្ឋ។ ទី២. ត្រូវបន្តតាមដានជាប្រចាំពីសភាពការណ៍នានា នៅមូលដ្ឋាន និងស្វែងយល់ឱ្យបានស៊ីជម្រៅពីភាពងាយរងគ្រោះ ដើម្បីត្រៀមលក្ខណៈបង្ការ ទប់ស្កាត់ និងមានវិធានការដោះស្រាយផលប៉ះពាល់ទាំងនោះ។ ទី៣. ត្រូវយកចិត្តទុកដាក់សហការ គាំទ្រឱ្យកាន់តែសកម្មថែមទៀត ក្នុងការអប់រំផ្សព្វផ្សាយព័ត៌មានពីការការពារសុខភាព និងការទប់ស្កាត់ការរីករាលដាលនៃជំងឺឆ្លងនានាជូនប្រជាពលរដ្ឋ។ ទី៤. គណៈកម្មាធិការគ្រប់គ្រងគ្រោះមហន្តរាយខេត្ត សាខាកាកបាទក្រហមខេត្ត រួមជា មួយមន្ទីរ អង្គភាពពាក់ព័ន្ធ ត្រូវសហការស្វែងយល់អំពីផលប៉ះពាល់ដែលបណ្តាល មកពីការប្រែប្រួលអាកាសធាតុដូចជា គ្រោះទឹកជំនន់ គ្រោះរាំងស្ងួត ខ្យល់កន្ត្រាក់ជាដើម ដើម្បីអាចក្តាប់សភាពការណ៍ និងឆ្លើយតប ពីផលប៉ះពាល់ទាំងនោះបានទាន់ពេលវេលា។ ទី៥. ត្រូវបន្តពង្រឹង និងពង្រីកកម្លាំងអ្នកស្ម័គ្រចិត្តយុវជនកាកបាទក្រហម តាមរយៈការបង្កើនចំណេះដឹង និងសមត្ថភាពជំនាញ ដើម្បីក្លាយជាកម្លាំងដ៏រឹងមាំក្នុងកិច្ចប្រតិបត្តិការមនុស្សធម៌។ និងទី៦. សូមចូលរួមជាមួយអាជ្ញាធរមានសមត្ថកិច្ច ជំរុញផ្សព្វផ្សាយច្បាប់ចរាចរណ៍ ផ្លូវគោក ដើម្បីកាត់បន្ថយអាត្រាស្លាប់ និងរបួសដែលបណ្តាលមកពីគ្រោះថ្នាក់ចរាចរណ៍ ស្របតាមពាក្យស្លោករបស់សម្តេចតេជោ អតីតនាយករដ្ឋមន្រ្តី និងជាប្រធានព្រឹទ្ធសភានៃព្រះរាជាណាចក្រកម្ពុជា ដែលបានលើក “ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍”។សូមជម្រាបថា ពិធីនេះ មានការនិមន្ត និងអញ្ជើញចូលរួមពីមេគណខេត្តទាំងពីរគណៈ គណៈកិត្តិយសសាខា គណៈកម្មាធិការសាខា សមាជិកព្រឹទ្ធសភា រដ្ឋសភា ក្រុមការងារមូលដ្ឋានរាជរដ្ឋាភិបាលចុះជួយខេត្ត ក្រុមប្រឹក្សាខេត្ត អភិបាល អភិបាលរងនៃគណៈអភិបាលខេត្ត ថ្នាក់ដឹកនាំក្រសួងមុខងារសាធារណៈ ថ្នាក់ដឹកនាំស្ថាប័ននានា អនុសាខាក្រុង ស្រុក មន្ត្រីរាជការចំណុះរដ្ឋបាលខេត្ត សប្បុរសជន យុវជនកាកបាទក្រហម អ្នកស្ម័គ្រចិត្តកាកបាទក្រហម យុវជន ស.ស.យ.ក. និងលោកគ្រូ អ្នកគ្រូ ព្រមទាំងសិស្សានុសិស្ស សរុបប្រមាណ ១២៥០នាក់៕

(ភ្នំពញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃសុក្រ ទី២ ខែឧសភា ឆ្នាំ២០២៥នេះ បានអញ្ជើញដឹកនាំកិច្ចប្រជុំគណៈអចិន្ត្រៃយ៍គណៈរដ្ឋមន្ត្រី លើសេចក្តីព្រាងក្របខ័ណ្ឌហិរញ្ញវត្ថុសាធារណៈរយៈពេលមធ្យម​ (MTFF) ឆ្នាំ២០២៦-២០២៨​​ នៅវិមានសន្តិភាព៕