(ជាតិ)៖ សហភាពពលកម្មជាតិកម្ពុជា តំណាងឱ្យកម្មករនិយោជិត ៧ម៉ឺននាក់ នៅថ្ងៃទី២ ខែមិថុនា ឆ្នាំ២០២៥ ប្រកាសគាំទ្រយ៉ាងពេញទំហឹងចំពោះចំណាត់ការយ៉ាងម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក្នុងការនាំយកបញ្ហាព្រំដែនកម្ពុជា-ថៃនៅក្នុងតំបន់ប្រាសាទតាមាន់ធំ ប្រាសាទតាមាន់តូច តាក្របី និងតំបន់មុំបីទៅកាន់តុលាការអន្តរជាតិ(ICJ)ដើម្បីឱ្យដាច់ស្រេចចំពោះជម្លោះព្រំដែនមួយនេះ។ក្រោយការប្រកាសពីជំហរក្នុងការដោះស្រាយបញ្ហាព្រំដែនកម្ពុជា-ថៃ របស់សម្តេចមហាបវរធិបតី ហ៊ុន ម៉ាណែត ភ្លាម លោក សំ សឿន ជាប្រធានសហភាពពលកម្មជាតិកម្ពុជា ប្រកាសគាំទ្រយ៉ាងពេញទំហឹងចំពោះចំណាត់ការរបស់សម្តេចមហាបវរធិបតីហ៊ុនម៉ាណែត ក្នុងការនាំយកបញ្ហាព្រំដែនកម្ពុជា-ថៃទៅដោះស្រាយនៅតុលាការអន្តរជាតិ ICJ។លោក សំ សឿន បានលើកឡើងថា៖ “សូមគាំទ្រយ៉ាងពេញទំហឹងចំពោះចំណាត់ការដ៏ម៉ឺងម៉ាត់របស់សម្តេចមហាបវរធិបតីហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាទាក់ទងនឹងដំណោះស្រាយបញ្ហាព្រំដែនរវាងប្រទេសកម្ពុជា និងថៃដោយប្រើប្រាស់យន្តការទ្វេភាគី យន្តការច្បាប់អន្តរជាតិ និងយុទ្ធសាស្ត្រការពារខ្លួនក្នុងករណីចាំបាច់”។សម្រាប់សហជីពរូបនេះ ការដាក់ចេញនូវចំណាត់ការយ៉ាងម៉ឺងម៉ាត់របស់សម្តេចនាយករដ្ឋមន្ត្រីក្នុងការនាំយកបញ្ហាព្រំដែនកម្ពុជា-ថៃទៅតុលាការអន្តរជាតិ គឺជាចំណាត់ការដែលប្រកបដោយភាពចាស់ទុំខាងនយោបាយ នៃអ្នកដឹកនាំកម្ពុជា ដោយគិតបានវែងឆ្ងាយ និងរក្សានូវភាពអត់ធ្មត់។ជាមួយគ្នានេះដែរ លោក សំ សឿន ក៏សូមអំពាវនាវដល់ប្រជាជនខ្មែរគ្រប់រូបឱ្យរក្សាភាពស្ងៀមស្ងាត់និង បន្តជឿទុកចិត្តលើរាជរដ្ឋាភិបាលក្នុងការការពារអធិបតីជាតិ បូរណភាពទឹកដី ដោយមិនត្រូវរុញច្រានប្រទេសឱ្យធ្លាក់ក្នុងជម្លោះប្រដាប់អាវុធ ឬសង្គ្រាមតាមពួកជ្រុលនិយម ដែលតែងតែបញ្ឆេះកំហឹងជាតិសាសន៍ និងអំពើហិង្សា ដោយយើងត្រូវការពារទឹកដីរបស់យើងដោយផ្អែកលើច្បាប់ និងការទទួលស្គាល់ជាអន្តរជាតិ។គួរបញ្ជាក់ផងដែរថា ការលើកឡើងរបស់សហជីពដូច្នេះ គឺក្រោយពេលដែលសម្តេចមហាវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានបង្ហាញជំហរក្នុងការនាំយកបញ្ហាព្រំដែនកម្ពុជា-ថៃ នៅក្នុងតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅដោះស្រាយនៅក្នុងតុលាការអន្តរជាតិ ICJ៕

(ព័ត៌មានជាតិ)៖ ក្រសួងការបរទេស និងសហប្រតិបត្តិការអន្តរជាតិកម្ពុជា បានទាមទារឱ្យមានការស៊ើបអង្កេត ជាបន្ទាន់ និងម៉ត់ចត់លើឧប្បត្តិហេតុហិង្សា ដែលបណ្តាលឱ្យទាហានកម្ពុជាស្លាប់នៅតំបន់មុំបី ស្ថិតនៅក្នុងទឹកដីខេត្តព្រះវិហារ។ ក្រសួងការបរទេសបានបញ្ជាក់យ៉ាងច្បាស់ថា នៅថ្ងៃទី ២៨ ខែឧសភា ឆ្នាំ ២០២៥ វេលាម៉ោង ០៥:៣០ នាទីព្រឹក កងកម្លាំងថៃបានបើកការបាញ់ប្រហារដោយខុសច្បាប់ទៅ លើលេណដ្ឋានមួយកន្លែង ស្ថិតក្នុងភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ នៃប្រទេសកម្ពុជា ដែលបណ្តាលឱ្យមានការសម្លាប់ទាហានខ្មែរដោយអយុត្តិធម៌។ នេះបើយោងតាមក្រសួងការបរទេសកម្ពុជា ដែលបានផ្ញើកំណត់ទូតទៅកាន់ស្ថានទូតថៃប្រចាំទីក្រុងភ្នំពេញ ចុះកាលបរិច្ឆេទថ្ងៃទី ២៩ ខែឧសភា ឆ្នាំ ២០២៥ ដែលបានលើកឡើងពាក់ព័ន្ធនឹងអរិភាពដោយអាវុធនៅព្រំដែនកម្ពុជា-ថៃ ។កំណត់ហេតុទូតបញ្ជាក់ថា៖« រាជរដ្ឋាភិបាលកម្ពុជា ទាមទារឱ្យមានការស៊ើបអង្កេតជាបន្ទាន់ និងម៉ត់ចត់លើឧប្បត្តិហេតុហិង្សានេះ ហើយបុគ្គលដែលទទួលខុសត្រូវចំពោះអំពើដ៏សាហាវ និងខុសច្បាប់នេះត្រូវតែនាំមកផ្តន្ទាទោសតាមច្បាប់»។រាជរដ្ឋាភិបាលកម្ពុជា សូមសម្តែងការតវ៉ាយ៉ាងខ្លាំងប្រឆាំងនឹងការវាយប្រហារដោយអាវុធ របស់កងទ័ពថៃយ៉ាងអយុត្តិធម៌ ដែលជាការរំលោភលើអធិបតេយ្យភាព និងបូរណភាពទឹកដីរបស់កម្ពុជា និងស្មារតីនៃមិត្តភាព និងភាពជាអ្នកជិតខាងល្អ ដូចបានឆ្លុះបញ្ចាំងនៅក្នុង នៅក្នុងអនុស្សារណៈនៃការយោគយល់គ្នា ឆ្នាំ ២០០០។រាជរដ្ឋាភិបាលកម្ពុជា គូសបញ្ជាក់ទៀតថា កងទ័ពព្រំដែនកម្ពុជាបានឈរជើងជាបន្តបន្ទាប់ និងដោយសន្តិវិធីនៅទីតាំងនេះតាំងពីយូរយារណាស់មកហើយ គឺតាំងពីមុនពេលចុះហត្ថលេខាលើអនុស្សារណៈនៃការយោគយល់គ្នាស្តីពីការវាស់វែង និងការបោះបង្គោលព្រំដែនគោករវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃព្រះរាជាណាចក្រថៃក្នុងឆ្នាំ ២០០០។ទោះយ៉ាងណាក៏ដោយ កម្ពុជានៅតែប្រកាន់ជំហរយ៉ាងម៉ឺងម៉ាត់ក្នុងការរក្សាការអត់ធ្មត់ជាអតិបរមា និងដោះស្រាយបញ្ហានេះ និងបញ្ហាព្រំដែនទាំងអស់ តាមរយៈមធ្យោបាយសន្តិភាព និងការទូត ដោយប្រើយន្តការដែលមានស្រាប់ រួមមានគណៈកម្មាធិការចម្រុះស្តីពីការបោះបង្គោលព្រំដែនគោក (JBC) និងគណៈកម្មាធិការព្រំដែនទូទៅ (GBC) ក្នុងគោលបំណងកសាងព្រំដែនសន្តិភាព កិច្ចសហប្រតិបត្តិការ និងមិត្តភាពជាមួយប្រទេសថៃ និងប្រទេសជិតខាង៕

(ឥណ្ឌា)៖ អាជ្ញាធរ និងប្រព័ន្ធផ្សព្វផ្សាយបាននិយាយថា យ៉ាងហោចណាស់មនុស្ស ៣៤នាក់បានស្លាប់ នៅក្នុងតំបន់ភាគឦសាននៃប្រទេសឥណ្ឌា បន្ទាប់ពីទឹកជំនន់ដ៏ខ្លាំងបានបណ្តាលឱ្យមានការបាក់ដី ក្នុងរយៈពេល៤ថ្ងៃចុងក្រោយនេះ។នាយកដ្ឋានអាកាសធាតុបានព្យាករណ៍ថា នឹងមានភ្លៀងធ្លាក់ខ្លាំងបន្ថែមទៀត។សេចក្តីថ្លែងការណ៍របស់រដ្ឋាភិបាលបាននិយាយថា អ្នកទេសចរជាងមួយពាន់នាក់ដែលជាប់នៅក្នុងរដ្ឋ Himalayan នៃ Sikkim កំពុងត្រូវបានជម្លៀសចេញកាលពីថ្ងៃចន្ទ ហើយក្រុមជួយសង្គ្រោះរបស់កងទ័ព ត្រូវបានចុចឱ្យដំណើរការនៅក្នុងរដ្ឋ Meghalaya ដើម្បីជួយសង្គ្រោះមនុស្សជាង 500 នាក់ដែលជាប់គាំង នៅក្នុងតំបន់ទឹកជំនន់។នៅប្រទេសបង់ក្លាដែសដែលនៅជិតខាង យ៉ាងហោចណាស់សមាជិកបួននាក់នៃគ្រួសារមួយត្រូវបាន សម្លាប់នៅក្នុងការបាក់ដីនៅស្រុក Sylhet ភាគឦសាន ខណៈដែលជម្រករាប់រយត្រូវបានបើកនៅទូទាំងស្រុក Rangamati, Bandarban និង Khagrachhari កាលពីថ្ងៃអាទិត្យ។អាជ្ញាធរ​បាន​ព្រមាន​ពី​ការ​បាក់​ដី​បន្ថែម​ទៀត និង​ទឹកជំនន់​ភ្លាមៗ ដោយ​ជំរុញ​ឱ្យ​អ្នក​ស្រុក​នៅ​តំបន់​ងាយ​រង​គ្រោះ​ត្រូវ​មាន​ការ​ប្រុង​ប្រយ័ត្ន។ភាគឦសាននៃប្រទេសឥណ្ឌា និងបង់ក្លាដែស ងាយនឹងមានភ្លៀងធ្លាក់ខ្លាំង ដែលបង្កឱ្យមានការរអិល បាក់ដី និងទឹកជំនន់ភ្លាមៗ ដែលប៉ះពាល់ដល់មនុស្សរាប់លាននាក់ជារៀងរាល់ឆ្នាំ៕

(ភ្នំពេញ)៖ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធាន សហភាពសហព័ន្ធយុវជនកម្ពុជា បង្ហោះនៅលើគណនីហ្វេសប៊ុកផ្លូវការរបស់ឯកឧត្តម ថ្ងៃនេះ ក្នុងនាមជាសមាជិករាជរដ្ឋាភិបាល ខ្ញុំបានចូលរួមសមាជរដ្ឋសភា និងព្រឹទ្ធសភា លើកទី១ ដែលជាទិវាប្រវត្តិសាស្រ្តមួយរបស់ព្រះរាជាណាចក្រកម្ពុជាអង្គសមាជបានពិភាក្សាលើប្រធានបទសំខាន់ៗចំនួន៣ រួមមាន៖១- ប្រព័ន្ធគាំពារសង្គម២- សេដ្ឋកិច្ចក្រៅប្រព័ន្ធ៣- កសិកម្មជាមួយគ្នានេះដែរ ឯកឧត្តមសូមចូលរួមអបអរសាទរ និងថ្លែងអំណរគុណចំពោះអង្គសមាជ ដែលបានអនុម័តដោយសម្លេង ១៨២ លើ១៨២ ទៅលើសេចក្តីថ្លែងការណ៍របស់សមាជ គាំទ្រចំណាត់ការរាជរដ្ឋាភិបាលក្នុងការលើកករណីវិវាទព្រំដែនកម្ពុជា-ថៃ ទៅតុលាការអន្តរជាតិ ដែលស្នើឡើងដោយសម្តេចអគ្គមហាសេនាបតីតេជោ ហ៊ុន សែន ប្រធានសមាជ៕

(ភ្នំពេញ)៖ សាស្ត្រាចារ្យនៃសាលាបណ្តុះបណ្តាលបច្ចេកទេសនៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២ខែមិថុនា ឆ្នាំ២០២៥នេះ បានប្រកាសគាំទ្រយ៉ាងពេញទំហឹងចំពោះជំហរដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក្នុងការនាំយកបញ្ហាព្រំដែនកម្ពុជា-ថៃនៅក្នុងតំបន់ប្រាសាទតាមាន់ធំ ប្រាសាទតាមាន់តូច តាក្របី និងតំបន់មុំបីទៅកាន់តុលាការអន្តរជាតិ(ICJ) ដើម្បីឱ្យដាច់ស្រេចចំពោះជម្លោះព្រំដែនដែលកំពុងអូសបន្លាយមួយនេះ។ ភ្លាមៗក្រោយការប្រកាសជំហរពីសំណាក់ប្រមុខរាជរដ្ឋាភិបាល ឯកឧត្តម យ៉ោក សុធី នាយកវិទ្យាស្ថានជាតិបណ្តុះបណ្តាលបច្ចេកទេស បានអះអាងថា ការប្រើប្រាស់យន្តការច្បាប់អន្តរជាតិក្នុងសំណុំរឿងព្រំដែនជាមួយប្រទេសថៃគឺជាយន្តការប្រកបដោយគតិបណ្ឌិតរបស់សម្តេចប្រមុខរាជរដ្ឋាភិបាល។ ឯកឧត្តម យ៉ោក សុធី អះអាងថា៖ “ខ្ញុំសូមគាំទ្រនូវជំហរដោះស្រាយបញ្ហាព្រំដែនរបស់សម្តេចមហាបវរធិបតី ហ៊ុន ម៉ាណែត ដែលប្រើប្រាស់យន្តការច្បាប់អន្តរជាតិជាគោលដើម្បីដោះស្រាយបញ្ចប់នូវបញ្ហាព្រំដែន។ ខ្ញុំសូមគាំទ្រទាំងស្រុង និងម៉ឺងម៉ាត់ប្រកបដោយគតិបណ្ឌិតរបស់សម្តេចប្រមុខរាជរដ្ឋាភិបាល”។ ឯកឧត្តម តាន់ កុសល នាយកវិទ្យាស្ថានជាតិសហគ្រិនភាព និងនវានុវត្តន៍ បានប្រកាសគាំទ្រដោយអះអាងថា ជំហរដ៏ម៉ឺងម៉ាត់របស់សម្តេចនាយករដ្ឋមន្ត្រីនាពេលនេះ គឺជារឿងត្រឹមត្រូវបំផុតព្រោះកម្ពុជាមិនចង់បានសង្គ្រាម ប៉ុន្តែក៏មិនអនុញ្ញាតឱ្យប្រទេសណាឃ្លានពានបានឡើយ។ ឯកឧត្តម តាន់ កុសល បញ្ជក់ថា៖ “សូមគាំទ្រចំពោះចំណាត់ការយ៉ាងម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត ដែលនឹងនាំយកបញ្ហាព្រំដែនខ្មែរ-ថៃក្នុងតំបន់ប្រាសាទតាមាន់ធំ តាក្របី និងតំបន់មុំបី ទៅកាន់តុលាការអន្តរជាតិ ICJ ដើម្បីឱ្យដាច់ស្រឡះជាមួយភាគីថៃ ហើយចំណាច់ការរបស់សម្តេចបង្ហាញពីការតាំងចិត្តយ៉ាងម៉ឺងម៉ាត់ក្នុងការការពារទឹកដីដែនអធិបតេយ្យភាពជាតិ ដោយមិនអនុញ្ញាតឱ្យភាគីណាមួយមករំលោភបំពានបានឡើយ”។ជាមួយគ្នានេះ ឯកឧត្តម ជិន តារា នាយកវិទ្យាស្ថានបច្ចេកទេសឧស្សាហកម្ម ក៏បានបង្ហាញជំហរក្នុងការគាំទ្រយ៉ាងខ្លាំងខ្លាដែរចំពោះចំណាត់ការរបស់សម្តេចមហាបវរធិបតីនាយករដ្ឋមន្ត្រី។ ឯកឧត្តមបន្តថា៖ “ក្នុងនាមថ្នាក់ដឹកនាំ គណៈគ្រប់គ្រងបុគ្គលិក មន្ត្រីរាជការ លោកគ្រូអ្នកគ្រូ និងសិស្សានុសិស្សក្នុងវិទ្យាស្ថាន សូមគាំទ្រចំពោះប្រសាសន៍យ៉ាងម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលនឹងប្តឹងទៅតុលាការអន្តរជាតិ ICJ ដើម្បីជម្រះឱ្យដាច់ស្រេច សម្រាប់អ្នកជំនាន់ក្រោយ”។ សម្រាប់នាយកវិទ្យាស្ថានរូបនេះ ការប្រើប្រាស់យន្តការច្បាប់អន្តរជាតិនេះ គឺដើម្បីកុំឱ្យពួកជ្រុលនិយមមួយក្តាប់តូច បង្កវិទ្ធង្សនាម្តងហើយម្តងទៀតនៅក្នុងទឹកដីកម្ពុជា ដែលធ្វើឱ្យប៉ះពាល់ដល់ព្រំដែនសន្តិភាពដែលកម្ពុជាបានកសាង។ សូមបញ្ជាក់ថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី២ ខែមិថុនា ឆ្នាំ២០២៥នេះ បានអះអាងជាថ្មីម្ដងទៀតថា រាជរដ្ឋាភិបាលកម្ពុជា នឹងប្ដឹងទៅតុលាការយុត្តិធម៌អន្ដរជាតិ( ICJ) ដើម្បីរំលត់ និងបញ្ចប់បញ្ហាព្រំដែនជាមួយប្រទេសថៃ ដើម្បីកុំឲ្យប្រទេសទាំងពីរឈានដល់ការផ្ទុះអាវុធដាក់គ្នា និងធ្លាក់ចូលអន្ទាក់របស់ក្រុមជ្រុលនិយម បើទោះបីជាថៃមិនព្រមឡើងទៅតុលាការយ៉ាងណាក៏ដោយ៕

(ភ្នំពេញ)៖ កម្មករនិយោជិត និងសហជីពធំៗនៅកម្ពុជា បានប្រកាសគាំទ្រយ៉ាងពេញទំហឹងចំពោះជំហរដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាដែលនឹងលើកយកបញ្ហាព្រំដែននៅតំបន់មុំ៣ ប្រសាទតាមាន់តូច ប្រសាទតាមាន់ធំ ប្រសាទតាក្របីទៅកាន់តុលាការអន្តរជាតិ(ICJ)ដើម្បីជម្រះឱ្យដាច់ស្រេចជាមួយនឹងភាគីថៃ។ ក្រោយការប្រកាសរបស់នាយកដ្ឋមន្ត្រីភ្លាម អ្នកស្រី សៀវ គន្ធា ជាកម្មការិនីរោងចក្រនៅរាជធានីភ្នំពេញ បានពេញចិត្តចំពោះជំហរដ៏ម៉ឺងម៉ាត់របស់ប្រមុខរាជរដ្ឋាភិបាលកម្ពុជានាពេលដែលបង្ហាញជំហរដ៏ម៉ឺងម៉ាត់ទាក់ទងនឹងដំណោះស្រាយបញ្ហាព្រំដែនរវាងប្រទេសកម្ពុជា និងថៃ។អ្នកស្រីបានបញ្ជាក់ថា៖«ក្នុងនាមខ្ញុំជាប្រជាពលរដ្ឋខ្មែរ ខ្ញុំសូមប្រកាសគាំទ្រយ៉ាងពេញទំហឹងចំពោះជំហរដ៏ម៉ឺងម៉ាត់របស់សម្ដេចមហាបវរធិបតី ហ៊ុន ម៉ាណែត ក្នុងការដោះស្រាយបញ្ហាទំនាស់ព្រំដែនរវាងកម្ពុជា និងថៃ។ យើងត្រូវការពារទឹកដីរបស់យើង ដោយផ្អែកលើច្បាប់ និងការទទួលស្គាល់ជាអន្តរជាតិ»។ជាមួយគ្នានេះ លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករបានបង្ហាញការគាំទ្រយ៉ាងពេញទំហឹងចំពោះចំណាត់ការដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដោយលោកបានចាត់ទុកថា នេះគឺជាចំណាត់ការប្រកបដោយភាពចាស់ទុំខាងនយោបាយនៃអ្នកដឹកនាំកម្ពុជា ដោយបានគិតគូរវែងឆ្ងាយ និងរក្សានូវភាពអត់ធ្មត់ខ្ពស់។លោកបានបញ្ជាក់ថា៖«ក្នុងនាមថ្នាក់ដឹកនាំសហជីព ខ្ញុំសូមប្រកាសគាំទ្រផងដែរនូវប្រសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ដែលគាំទ្រឱ្យរាជរដ្ឋាភិបាលប្រទេសទាំងពីរនាំយកបញ្ហាព្រំដែនទៅដោះស្រាយនៅតុលាការអន្តរជាតិ ដោយមិនចាំបាច់ឱ្យកម្ពុជាប្តឹង»។បន្ថែមពីនេះ លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា (CWPUC)បានប្រកាសគាំទ្រយ៉ាងពេញទំហឹងដាក់ពាក្យបណ្តឹងជុំវិញព្រំដែនខ្មែរក្នុងតំបន់​ប្រាសាទតាមាន់ធំ តាក្របី និងតំបន់មុំបីទៅកាន់តុលាការអន្តរជាតិ ICJ ដើម្បីឱ្យដាច់ស្រឡះជាមួយភាគីថៃ។លោកបញ្ជាក់ថា៖«ខ្ញុំបាទសូមគាំទ្រចំពោះចំណាត់ការយ៉ាងម៉ឺងម៉ាត់របស់សម្តេចមហាបវរធិបតីហ៊ុន ម៉ាណែត ដែលនឹងដាក់ពាក្យបណ្តឹងជុំវិញព្រំដែនខ្មែរក្នុងតំបន់ប្រាសាទតាមាន់ធំ តាក្របី និងមុំបី ទៅកាន់តុលាការអន្តរជាតិ ICJ ដើម្បីឱ្យដាច់ស្រឡះជាមួយភាគីថៃ។ ចំណាច់ការរបស់សម្តេចបង្ហាញពីការតាំងចិត្តយ៉ាងម៉ឺងម៉ាត់ក្នុងការការពារទឹកដីដែនអធិបតីជាតិ ដោយមិនអនុញ្ញាតឱ្យភាគីណាមួយមករំលោភបំពានបានឡើយ»។ការចេញសារគាំទ្ររបស់កម្មករ និងសហជីពនៅកម្ពុជានាពេលនេះ គឺធ្វើឡើងបន្ទាប់ពីប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងពីជំហរដ៏ម៉ឺងម៉ាត់ក្នុងសមាជរដ្ឋសភា និងព្រឹទ្ធសភា លើកទី១ដែលបានធ្វើនៅថ្ងៃទី២ ខែមិថុនា ឆ្នាំ២០២៥ក្រោមអធិបតីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា៕

(សង្គម)៖ កាលពីពេលថ្មីៗនេះ អាជីវករជាច្រើននាក់ដែលជាម្ចាស់តូប នៅផ្សារ ប៉េង អ៊ឹម គម្រោងទីមួយ បាននាំគ្នាតវ៉ាស្រែករកដំណោះស្រាយជាថ្មីម្ដងទៀត ដោយទាមទារឱ្យម្ចាស់ផ្សារសងថ្លៃតូបមកវិញ បន្ទាប់ពីត្រូវរងទុក្ខអស់រយៈពេលបួនឆ្នាំមកហើយ ដោយសារផ្សារលែងដំណើរការ ចំណែកឯម្ចាស់ផ្សារក៏ពុំរវីរវល់។ ជាងនេះទៅទៀតម្ចាស់ផ្សារថែមទាំង រឹមអូសយកតូបទៅធ្វើអាជីវកម្មបន្ត ធ្វើជាឃ្លាំងជួលឱ្យជនជាតិចិន ដែលជាហេតុធ្វើឱ្យក្រុមអាជីវករកាន់តែឈឺចិត្ត ហើយបាននាំគ្នាមកស្រែកតវ៉ាម្ដងទៀតកាលពីថ្ងៃទី១ ខែមិថុនា ឆ្នាំ២០២៥នេះ។យ៉ាងណាមិញ ការតវ៉ាទាមទារយុត្តិធម៌ពីសំណាក់ក្រុមអជីវករនៅ ផ្សារ ប៉េង អ៊ឹម ពុំមែនទើបតែកើតឡើងជាលើកទីមួយនោះឡើយ ដោយកាលពីកន្លងមកពួកគេក៏ធ្លាប់បានតវ៉ាជារឿយៗផងដែរ និងថែមទាំងធ្លាប់បានសំណូមពរដល់ថ្នាក់ដឹកនាំពាក់ព័ន្ធឱ្យជួយផងដែរប៉ុន្តែនៅតែពុំឃើញមានដំណោះស្រាយណាមួយរហូតមកដល់បច្ចុប្បន្ន។ជាក់ស្ដែង យោងតាមប្រភពដែលជាម្ចាស់តូបនៅផ្សារនេះផ្ទាល់បានធ្លាប់ផ្ដល់បទសម្ភាស្តទៅកាន់សាព័ត៌មានក្នុងស្រុកឱ្យដឹងផងដែរថា ការដែលខ្លួនកើតទុក្ខមិនសុខចិត្ត និងនាំគ្នាចេញមុខតវ៉ាបែបនេះក៏ដោយសារតែ ការអស់សង្ឃឹមលើផ្សារមួយនេះព្រោះតែម្ចាស់ផ្សារពុំបានរវីរវល់ក៏ដូចជាមានគំនិតចង់ឱ្យផ្សារនេះដើរនោះឡើយ។ ពួកគេបានបន្តដោយអះអាងថាម្ចាស់ផ្សារគឺមានគំនិតបោកប្រាស់ចំនួនពីរតង់ ដោយតង់ទីមួយគឺបោកលុយតាមរយៈការលក់តូបទៅឱ្យអាជីវករ ហើយកំណត់រយៈពេលត្រូវប្រគល់តូបទៅឱ្យម្ចាស់ផ្សារវិញបន្ទាប់ពីប្រើប្រាស់អស់រយៈពេល១០ឆ្នាំ ចំណែងឯតង់ទីពីរនោះ គឺម្ចាស់ផ្សារពុំមានទំនួលខុសត្រូវឬពុំមានចិត្តចង់ឱ្យផ្សារដើរនោះឡើយដែលជាហេតុធ្វើឱ្យអាជីវករជាច្រើនបង្ខំចិត្តបិទតូបចោល។ គួររំលឹកផងដែរថា កាលពីមួយខែមុន ក្រុមអាជីវករដដែលនេះក៏ធ្លាប់បាននាំគ្នាទៅឆោឡោទាំងឈឺចិត្ត ដល់សាលាខណ្ឌដង្កោផងដែរ។ត្រលប់មកពេលបច្ចុប្បន្ននេះវិញ ក្រុមជីវករនៅតែអំពាវនាវដល់ថ្នាក់ដឹកនាំពាក់ព័ន្ធឱ្យជួយរកដំណោះស្រាយ និងទាមទារចង់ឱ្យម្ខាស់ផ្សារប្រគល់លុយថ្លៃតូបទៅឱ្យពួកគេវិញ ដោយហេតុថាផ្សារបានជាប់គាំងមិនដំណើរការអស់រយៈពេល ៤ឆ្នាំមកហើយ ឯពួកគេក៏ពុំទទួលបានចំណូលអ្វីទាល់តែសោះ ខណៈខ្លះទៀតក៏មានបំណុលជាប់ខ្លួនដោយសារសម្រេចចិត្តយកលុយមកទិញតូបទាំងនេះ ដោយសង្ឃឹមថា នឹងទទួលបានចំណូលពីការលក់ដូរ។ ផ្ទុយទៅវិញ ផ្សារគឺពុំដំណើរការ ហើយត្រូវបិទតូប ដោយទន្ទឹងរង់ចាំដល់ថ្ងៃ ម្ចាស់ផ្សារយកទៅធ្វើជាកម្មសិទ្ធវិញ។ ទន្ទឹមនឹងការអំពាវនាវនេះផងដែរ ពួកគេបានសង្គត់ធ្ងន់ថា បើសិនជាម្ចាស់ផ្សារពុំមានចិត្តបោកប្រាស់ដូចដែលគេធ្លាប់បានលើកឡើងនោះទេ ក៏គួរសងសំណងនូវថ្លៃតូបមកឱ្យពួកគេវិញ៕

(អន្តរជាតិ)៖ រដ្ឋមន្ត្រីក្រសួងការពារជាតិអាមេរិក លោក Pete Hegseth គ្រោងនឹងធ្វើទស្សនកិច្ចនៅមូលដ្ឋាន ទ័ពជើងទឹករាម របស់កម្ពុជា នៅចុងឆ្នាំនេះ នេះបើតាមការបញ្ជាក់របស់រដ្ឋាភិបាលសហរដ្ឋអាមេរិក បន្ទាប់ពីដំណើរទស្សនកិច្ចរបស់កងទ័ពជើងទឹកជប៉ុន និងវៀតណាម មកកាន់មូលដ្ឋាននេះ កាលពីខែ មេសា។នេះបើយោងតាមការចុះផ្សាយសារព័ត៌មានបរទេស thediplomat នៅថ្ងៃទី​០២ ខែមិថុនា ឆ្នាំ២០២៥។ ដំណើរទស្សនកិច្ចនេះត្រូវបានពិភាក្សាដោយលោក John Noh ជំនួយការរដ្ឋមន្ត្រីការពារជាតិស្តីទី សហរដ្ឋអាមេរិកទទួលបន្ទុកកិច្ចការសន្តិសុខឥណ្ឌូប៉ាស៊ីហ្វិក និងលោកឧត្តមសេនីយ៍ឯក រ័ត្ន តារារ័ត្ន រដ្ឋលេខាធិការក្រសួងការពារជាតិកម្ពុជា ដែលបានជួបពិភាក្សាគ្នាកាលពីថ្ងៃទី ៣១ ឧសភា នៅខាងក្រៅ សន្និសីទសន្តិសុខ Shangri-La នៅប្រទេសសិង្ហបុរី។យោងតាមសេចក្តីថ្លែងការផ្លូវការពីក្រសួងការពារជាតិសហរដ្ឋអាមេរិក មេដឹកនាំទាំងពីរបានពិភាក្សាអំពី "បញ្ហាសន្តិសុខក្នុងតំបន់ និងទំនាក់ទំនងយោធាទ្វេភាគី" ។ សេចក្តីថ្លែងការណ៍បានបន្ថែមថា "មេដឹកនាំ ទាំងពីរទន្ទឹងរង់ចាំដំណើរទស្សនកិច្ចកប៉ាល់របស់កងទ័ពជើងទឹកសហរដ្ឋអាមេរិក និងការហ្វឹកហ្វឺនដែន សមុទ្រដែលនឹងធ្វើឡើងនៅមូលដ្ឋានទ័ពជើងទឹករាម នៅចុងឆ្នាំនេះ ក៏ដូចជាការធ្វើដំណើររបស់ លោករដ្ឋមន្ត្រី Hegseth ដើម្បីទៅទស្សនកិច្ចកប៉ាល់សហរដ្ឋអាមេរិកពេលកំពុងកំពង់ផែនៅរាម"។ បន្ទាប់មក លោក Noh “បានចែករំលែកការកោតសរសើរចំពោះការប្តេជ្ញាចិត្តរបស់ កម្ពុជាក្នុងការបន្ត ទំនាក់ទំនងទ្វេភាគី និងការអញ្ជើញបើកចំហរឱ្យទៅទស្សនកិច្ច និងធ្វើការបណ្តុះបណ្តាលនៅមូលដ្ឋាន ទ័ពជើងទឹករាម”។ សេចក្តី​ថ្លែងការណ៍​មិន​បាន​បញ្ជាក់​លម្អិត​ថា​តើ​ដំណើរ​ទស្សនកិច្ច​នឹង​ធ្វើ​ឡើង​នៅ​ពេល​ណា​ទេ។គួររំលឹកថា ចាប់តាំងពីឆ្នាំ ២០២២មក មូលដ្ឋានទ័ពជើងទឹករាម ដែលមានចម្ងាយប្រហែល 30 គីឡូម៉ែត្រ ពីទីក្រុងកំពង់ផែព្រះសីហនុ គឺជាកម្មវត្ថុនៃការពង្រីក និងជួសជុលដ៏ចម្រូងចម្រាស ដែលផ្តល់មូលនិធិ ដោយប្រទេសចិន ដែលជាដៃគូបរទេសជិតស្និទ្ធបំផុតរបស់កម្ពុជា។ ដំណាក់កាលទី១ នៃការកែលម្អ ដែលសម្តេចធិបតី ហ៊ុន ម៉ាណែត បានបើកដំណើរការកាលពីដើមខែមេសា រួមមាន ផែទឹកជ្រៅប្រវែង ៣០០ម៉ែត្រ កំពង់ផែស្ងួតទម្ងន់ ៥០០០តោន ផ្លូវរអិលទម្ងន់ ១០០០តោន អគារការិយាល័យ និង មជ្ឈមណ្ឌលបណ្តុះបណ្តាល និងភស្តុភាររួមកម្ពុជា-ចិន។ការចូលរួមរបស់ចិននៅរាម បានទាក់ទាញការសង្ស័យពីសំណាក់បស្ចិមប្រទេស ជាពិសេសមន្ត្រី សន្តិសុខរបស់សហរដ្ឋអាមេរិក ដែលភ័យខ្លាចថា មូលដ្ឋានអាចនឹងត្រូវបានវិវត្តទៅ ជាមូលដ្ឋាន ចិនពេញទំហឹង។ ក្តីបារម្ភនេះមានតាំងពីឆ្នាំ ២០២៩ នៅពេលដែលកាសែត Wall Street Journal បានរាយការណ៍នៅពេលនោះថា សម្តេច ហ៊ុន សែន បានចុះហត្ថលេខាលើកិច្ចព្រម ព្រៀងសម្ងាត់ដែលផ្តល់សិទ្ធិឱ្យយោធារបស់ប្រទេសចិន ក្នុងការប្រើប្រាស់មូលដ្ឋានសម្រាប់រយៈពេល ៣០ ឆ្នាំ។ រដ្ឋាភិបាលកម្ពុជា បានបដិសេធរបាយការណ៍នេះ និងជាបន្តបន្ទាប់អំពីរាម ដោយបញ្ជាក់ថា ខ្លួននឹងមិនអនុញ្ញាតឲ្យមានការបង្កើតមូលដ្ឋានយោធាបរទេសនៅលើទឹកដីរបស់ខ្លួន ដែលជាការសន្យា ដែលសម្តេច ហ៊ុន ម៉ាណែត បាននិយាយម្តងហើយម្តងទៀតក្នុងសុន្ទរកថាប្រារព្ធពិធី បើកមូលដ្ឋានទ័ព ថ្មីនៅថ្ងៃទី ៥ ខែមេសា។ការអញ្ជើញលោក Hegseth មកទស្សនកិច្ច គឺជាការប៉ុនប៉ងចុងក្រោយបំផុតរបស់រដ្ឋាភិបាលកម្ពុជា ដើម្បីធានានូវការព្រួយបារម្ភអំពីការចូលរួមរបស់ចិននៅរាម ដែលខ្លួនបានសន្យាថា នឹងបើកចំហសម្រាប់ នាវាចម្បាំងពីប្រទេសជាមិត្តទាំងអស់។ ជាមួយ​នឹង​ចំណុច​នេះ កង​ទ័ព​ជើង​ទឹក​កម្ពុជា​បាន​ទទួល​នាវា​ជើង​ទឹក​ជប៉ុន​ពីរ​គ្រឿង​ក្នុង​ដំណើរ​ទស្សនកិច្ច​រយៈពេល ៤ ថ្ងៃ​នៅ​មូលដ្ឋាន​នៅ​ថ្ងៃ​ទី ១៩ ខែ​មេសា និង នាវា​ទ័ព​ជើង​ទឹក​វៀតណាម​មួយ​គ្រឿង​។ការអញ្ជើញលោក Hegseth ក៏ជាការបង្ហាញចុងក្រោយបង្អស់ដែលថា កម្ពុជាកំពុងស្វែងរកការពង្រឹង ទំនាក់ទំនងជាមួយទីក្រុងវ៉ាស៊ីនតោន បន្ទាប់ពីមានការធ្លាក់ចុះជាលំដាប់លើបញ្ហាជាច្រើន ដូចជាទំនាក់ ទំនងជិតស្និទ្ធរបស់កម្ពុជាជាមួយប្រទេសចិន និងការបង្ក្រាបនយោបាយដ៏ខ្លាំងក្លារបស់រដ្ឋាភិបាល។ប្រាកដណាស់ តាមរយៈការបដិសេធចំពោះសកម្មភាពផ្សព្វផ្សាយលទ្ធិប្រជាធិបតេយ្យ និងបង្ខំឱ្យបិទ កម្មវិធីផ្សាយដែលផ្តល់មូលនិធិដោយសហរដ្ឋអាមេរិក ដូចជាសំឡេងសហរដ្ឋអាមេរិក និងវិទ្យុអាស៊ីសេរី រដ្ឋបាល Trump បានដកចេញនូវឧបសគ្គចម្បងមួយ ក្នុងការធ្វើឱ្យប្រសើរឡើងនូវទំនាក់ទំនង របស់ភាគីកម្ពុជា។ទោះជាយ៉ាងនេះក្តី ទោះជាយោធាកម្ពុជាបង្ហាញតម្លាភាពក៏ដោយ ក៏សំណួរអំពីឥទ្ធិពលរបស់ចិននៅរាម ទំនងជាមិនបាត់ទៅណាឡើយ។ កាល​ពី​ចុង​ខែ​មុន រដ្ឋមន្ត្រី​ក្រសួង​ការពារ​ជាតិ​កម្ពុជា ឯកឧត្តម ទៀ សីហា បាន​មាន​ប្រសាសន៍​ថា ផ្នែក​ខ្លះ​នៃ​មូលដ្ឋាន​រាម​នឹង​នៅ​មាន​ដែន​កំណត់​ចំពោះ​យោធា​បរទេស។ លោក​បាន​មាន​ប្រសាសន៍​ថា “អគារ​មួយ​ចំនួន​ជា​ប៉ុស្តិ៍​បញ្ជាការ​របស់​កម្ពុជា ដូច្នេះ​យើង​មាន​តំបន់​កំហិត​ផ្ទាល់​ខ្លួន និង​ជា​តំបន់​បើក​ចំហ ហើយ​កម្ពុជា​មិន​មែន​ជា​ប្រទេស​តែ​មួយ​គត់​ដែល​ធ្វើ​បែប​នេះ​ទេ”៕

(ភ្នំពេញ)៖ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធាន សហភាពសហព័ន្ធយុវជនកម្ពុជា បង្ហោះនៅលើគណនីហ្វេសប៊ុកផ្លូវការរបស់ឯកឧត្តម ដោយបាន សម្តែងការគាំទ្រយ៉ាងពេញទំហឹង ចំពោះចំណាត់ការដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ទាក់ទងនឹងដំណោះស្រាយបញ្ហាព្រំដែនរវាង ប្រទេសកម្ពុជា និងថៃ ដោយប្រើប្រាស់យន្តការទ្វេភាគី យន្តការច្បាប់អន្តរជាតិ និងយុទ្ធសាស្រ្តការពារ ខ្លួនក្នុងករណីចាំបាច់ និងគាំទ្រផងដែរនូវប្រសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ដែលគាំទ្រឱ្យរាជរដ្ឋាភិបាលប្រទេសទាំងពីរនាំយកបញ្ហា ព្រំដែនទៅដោះស្រាយនៅ តុលាការ អន្តរជាតិ ដោយមិនចាំបាច់ឱ្យកម្ពុជាប្តឹង។ ឯកឧត្តមបានបន្ថែមថា នេះគឺជាចំណាត់ការប្រកបដោយភាពចាស់ទុំខាងនយោបាយ នៃអ្នកដឹកនាំកម្ពុជា ដោយបានគិតគូរវែងឆ្ងាយ និងរក្សានូវភាពអត់ធ្មត់ខ្ពស់។ជាមួយគ្នានេះដែរ ឯកឧត្តមក៏សូមអំពាវនាវដល់បងប្អូនប្រជាពលរដ្ឋទាំងអស់នៅទូទាំងប្រទេស មេត្តា រក្សាភាពស្ងៀមស្ងាត់ និងសូមបន្តជឿទុកចិត្តលើរាជរដ្ឋាភិបាលក្នុងការការពារអធិបតេយ្យជាតិ បូរណភាព ទឹកដី ដោយព្យាយាមឱ្យអស់លទ្ធភាព មិនរុញច្រានប្រទេសឱ្យធ្លាក់ក្នុងជម្លោះប្រដាប់អាវុធ ឬសង្រ្គាម តាមពួកជ្រុលនិយម ដែលតែងតែបញ្ឆេះកំហឹងជាតិសាសន៍ និងអំពើហិង្សារ។ យើងត្រូវការពារទឹកដីរបស់យើង ដោយផ្អែកលើច្បាប់ និងការទទួលស្គាល់ជាអន្តរជាតិ ហើយយើងក៏ នៅតែ ប្រកាន់ជំហរទន់ភ្លន់ ប៉ុន្តែមិនទន់ជ្រាយជាដាច់ខាត។គួររំលឹកផងដែរថា នៅព្រឹកថ្ងៃទី២ ខែមិថុនា ឆ្នាំ២០២៥ នៅក្នុងកិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភា នៃព្រះរាជាណាចក្រកម្ពុជា អង្គសមាជទាំងមូល បានសម្ដែងការគាំទ្រ មានសមាជិក សមាជិកាព្រឹទ្ធសភា និងរដ្ឋសភាចំនួនសំឡេង១៨២សំឡេង អនុម័តលើសេចក្ដីថ្លែងការណ៍ចំពោះ ចំណាត់ការរបស់នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការប្ដឹងរឿងបញ្ហាព្រំដែនជម្លោះរវាង កម្ពុជាថៃ ទៅតុលាការអន្តរជាតិ៕

(ភ្នំពេញ)៖ នៅព្រឹកថ្ងៃទី២ ខែមិថុនា ឆ្នាំ២០២៥ នៅក្នុងកិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភា នៃព្រះរាជាណាចក្រកម្ពុជា អង្គសមាជទាំងមូលបានសម្ដែងការគាំទ្រ មានសមាជិក សមាជិកាព្រឹទ្ធសភា និងរដ្ឋសភា ចំនួនសំឡេង១៨២សំឡេង អនុម័តលើសេចក្ដីថ្លែងការណ៍ចំពោះចំណាត់ការរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការប្ដឹងរឿងបញ្ហាព្រំដែនជម្លោះរវាងកម្ពុជាថៃ ទៅតុលាការអន្តរជាតិ៕

(ភ្នំពេញ)៖ នៅព្រឹកថ្ងៃចន្ទ ទី២ ខែមិថុនា ឆ្នាំ២០២៥នេះ សម្ដេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាជព្រឹទ្ធសភា និងរដ្ឋសភានៃព្រះរាជាណាចក្រកម្ពុជា បានអញ្ជើញបើកនៅកិច្ចប្រជុំ សមាជរដ្ឋសភា និងព្រឹទ្ធសភា លើរបៀបវារៈចំនួន៣ ដូចខាងក្រោម៖១-ប្រធានបទអំពីប្រព័ន្ធគាំពារសង្គម២-ប្រធានបទអំពីសេដ្ឋកិច្ចក្រៅប្រព័ន្ធ៣-ប្រធានបទអំពីវិស័យកសិកម្ម ៕

(សៀមរាប)៖ វិទ្យាស្ថានជាតិពហុបច្ចេកទេសអង្គរ ខេត្តសៀមរាប បានប្រកាសផ្ដល់អាហារូបករណ៍ ១០០% ចំនួន២,៤០០កន្លែង សម្រាប់ការបណ្ដុះបណ្ដាលជំនាញវិជ្ជាជីវៈកម្រិត១ ដល់ក្រុមយុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងមានប្រាក់ឧបត្ថម្ភចំនួន២៨ម៉ឺនរៀលក្នុងមួយខែថែមទៀត។ អាហារូបករណ៍ទាំង២,៤០០កន្លែងនេះ ត្រូវបានបែងចែកទៅតាមមុខជំនាញដែលសុទ្ធតែមានតម្រូវការខ្ពស់ក្នុងទីផ្សារ រួមមាន៖ (១).ជំនាញបរិក្ខារត្រជាក់ក្នុងគេហដ្ឋាន ៤៨០នាក់ (២).ជំនាញដំឡើងបណ្ដាញអគ្គិសនីក្នុងអគារ ៤៨០នាក់ (៣).ជំនាញថែទាំនិងជួសជុលរថយន្ត ៤២០នាក់ (៤).ជំនាញធុរកិច្ចភេសជ្ជៈ ៣០០នាក់ (៥).ជំនាញផលិតនំ ៣០០នាក់ (៦).ជំនាញការងារកំបោរ ១៨០នាក់ (៧).ជំនាញដំឡើងនិងថែទាំកាមេរ៉ាសុវត្ថិភាព ១២០នាក់ (៨).ជំនាញសេវាកម្មកុំព្យូទ័រ ៦០នាក់ (៩).ជំនាញរចនាក្រាហ្វិកដោយកុំព្យូទ័រ ៦០នាក់។ សម្រាប់យុវជនគោលដៅទាំងពីរក្រុមខាងលើដែលចាប់អារម្មណ៍ក្នុងការដាក់ពាក្យ សូមទាក់ទងមកកាន់វិទ្យាស្ថានជាតិពហុបច្ចេកទេសអង្គរ ដែលមានទីតាំងតាមបណ្ដោយមហាវិថីសម្ដេចវិបុលបញ្ញា សុខ អាន ឬទាក់ទងតាមរយៈទូរស័ព្ទលេខ៖ ០៨៧ ៥២៧ ៨៧៦ / ០៧៧ ៤៨៩ ៣៩៨ / ០៩៧ ៣៧២ ១៦២៧។ ក្រៅពីក្រុមយុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យ វគ្គបណ្ដុះបណ្ដាលពិសេសនេះក៏បើកចំហសម្រាប់យុវជន និងប្រជាពលរដ្ឋទូទៅ រួមទាំងកម្មករ-កម្មការិនីផងដែរ ដែលអាចដាក់ពាក្យចូលសិក្សាជំនាញបច្ចេកទេសវិជ្ជាជីវៈនេះបានដោយឥតបង់ថ្លៃដូចគ្នា គ្រាន់តែមិនទទួលបានប្រាក់ឧបត្ថម្ភប្រចាំខែពីរាជរដ្ឋាភិបាល។ គួរបញ្ជាក់ដែរថា ការផ្ដល់ជូនអាហារូបករណ៍នេះ គឺជាការអនុវត្តកម្មវិធីគោលនយោបាយបណ្ដុះបណ្ដាលបច្ចេកទេសនិងវិជ្ជាជីវៈ (TVET) ១.៥លាននាក់ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមអាណត្តិដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងទិសដៅលើកកម្ពស់ជីវភាពយុវជនមកពីគ្រួសារក្រីក្រ និងគ្រួសារងាយរងហានិភ័យ តាមរយៈការផ្ដល់ឱ្យពួកគេនូវជំនាញជាក់លាក់មួយ និងមានលទ្ធភាពទទួលបានប្រាក់ចំណូលសមរម្យ៕ 

(ភ្នំពេញ)៖ សហជីព និងកម្មករនិយោជិតរាប់ម៉ឺននាក់នៅកម្ពុជា បានរិះគន់ និងថ្កោលទោសក្រុមប្រឆាំងជ្រុលនិយមដែលដឹកនាំដោយទណ្ឌិតក្បត់ជាតិ សម រង្ស៊ី នាំគ្នាធ្វើបាតុកម្មប្រឆាំងនឹងវត្តមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាដែលកំពុងបំពេញទស្សនកិច្ចផ្លូវការនៅប្រទេសជប៉ុន ដោយពួកគេចាត់ទុកថា ក្រុមជ្រុលនិយមកំពុងប្រឆាំងនឹងផលប្រយោជន៍ជាតិខ្លួនឯង។លោក សំ សឿន ប្រធានសហជីពពលកម្មជាតិកម្ពុជា (NLC)បានថ្លែងថា៖«ក្នុងនាមខ្ញុំជាប្រធានសហជីពនៅកម្ពុជាដែលដឹកនាំកម្មកររោងចក្រសហគ្រាសរាប់ម៉ឺននាក់ សូមរិះគន់ និងថ្កោលទោសក្រុមទណ្ឌិត សម រង្ស៊ី ក្រុមមូរ សុខហួរ ដែលបង្កើតសកម្មភាពជ្រុលនិយម នាំគ្នាធ្វើបាតុកម្មប្រឆាំងនឹងវត្តមានសម្ដេចមហាបវរធិបតី ហ៊ុន ម៉ាណែត នៅប្រទេសជប៉ុន»។លោកបន្ដថា៖«ខ្ញុំគិតថា ក្រុមជ្រុលនិយមទាំងអស់នេះ កំពុងប្រឆាំងនឹងផលប្រយោជន៍ប្រទេសជាតិខ្លួនឯង បំបាក់មុខមាត់ប្រទេសជាតិនៅបរទេស ហើយពួកគេមិនចង់ឃើញប្រទេសជាតិខ្លួនឯងរីកចម្រើនទេ។ ពួកខ្ញុំជាសហជីព និងកម្មករទាំងអស់ គឺមិនពេញចិត្ត ហើយក៏ស្អប់ខ្ពើមនូវទង្វើររបស់ក្រុមជ្រុលនិយមជាខ្លាំង ព្រោះពួកគេប្រឆាំងនឹងផលប្រយោជន៍ជាតិ»។ទោះបីជាយ៉ាងណា លោក សំ សឿន បានអំពាវនាវឱ្យប្រជាពលរដ្ឋ និងកម្មកនិយោជិតនៅកម្ពុជាកុំចូលរួមសកម្មភាពណាមួយដែលប្រឆាំងនឹងផលប្រយោជន៍ប្រទេសជាតិ និងមិនត្រូវចូលរួមពាក់ព័ន្ធនឹងទង្វើក្បត់ជាតិជាមួយក្រុមទណ្ឌិត សម រង្ស៊ីនោះទេ ព្រោះពួកគេមិនសាកសមជាពលរដ្ឋខ្មែរនោះទេ។លោក អ៊ុល រីយ៉ាង កម្មកររោងចក្រនៅ ក្រុងតាខ្មៅ ខេត្តកណ្តាលបាននិយាយថា លោកមិនគាំទ្រទង្វើក្បត់ជាតិរបស់ក្រុមទណ្ឌិត សម រង្ស៊ីនោះទេ ព្រោះពួកគេតែងតែយកកិត្តិយសជាតិខ្លួនឯងទៅមួលបង្កាច់ និងបង្ខូចនៅប្រទេសជប៉ុន។ ពួកគេគួរតែនាំគ្នាសាទរចំពោះថ្នាក់ដឹកនាំខ្លួនដែលបានទៅសួរសុខទុក្ខដល់ប្រទេសជប៉ុន ប៉ុន្ដែបែរជានាំគ្នាបាតុកម្មប្រឆាំងទៅវិញ។លោកបញ្ជាក់ថា៖«ខ្ញុំសូមថ្កោលទោសចំពោះទង្វើជ្រុលនិយមរបស់ពួកគេនៅប្រទេសជប៉ុន ព្រោះការរៀបចំចលនាបាតុកម្មលើប្រធានបទដដែលៗ ដឹកនាំដោយលោកស្រី មូរ សុខហួរ នោះ គឺជារឿងអាម៉ាស់មួយនៅលើឆាកនយោបាយ និងបង្ហាញច្បាស់ពីការធ្វើនយោបាយដើរថយក្រោយរបស់ក្រុមប្រឆាំង ត្បិតគ្មានជំនឿចិត្តពីសំណាក់ពលរដ្ឋនៅក្រៅប្រទេសទៀតនោះទេ»។លោក ឡេវ សំអាន ជាកម្មកររោងចក្រនៅរាជធានីភ្នំពេញបាននិយាយថា ការធ្វើនយោបាយរបស់ក្រុមប្រឆាំងនៅក្រៅស្រុកនឹងបន្តបរាជ័យនិងគ្មានជំនឿពីសំណាក់ពលរដ្ឋនោះឡើយ ពីព្រោះពលរដ្ឋនៅបរទេសបានឃើញពីការធ្វើនយោបាយយកគំនិតជាតិនិយមមកដុតរោលរាលលើពលរដ្ឋ ដើម្បីបម្រើផលប្រយោជន៍នយោបាយខុសច្បាប់ដល់ជនមួយក្តាប់តូច។លោកបញ្ជាក់ថា៖«ខ្ញុំសូមរិះគន់ចំពោះទង្វើក្បត់ជាតិ និងបំផ្លាញ់មុខមាត់ជាតិនៅប្រទេសគេ ហើយក្នុងនាមខ្ញុំជាពលរដ្ឋក៏គ្មានជំនឿលើការធ្វើនយោបាយបោកប្រាស់ទៀតនោះឡើយ។ ការធ្វើបាតុកម្មនេះ គឺបង្ហាញពីចេតនានយោបាយ និងសកម្មភាពបម្រើផលប្រយោជន៍បុគ្គលមួយក្តាប់តូចនៅក្រៅប្រទេស ហើយមិនមែនបម្រើដល់ផលប្រយោជន៍រួមនោះទេ»៕

(ជប៉ុន)៖ ប្រជាពលរដ្ឋខ្មែរដែលរស់នៅប្រទេសជប៉ុនជាច្រើននាក់ បានចូលរួមក្នុងកម្មវីធីជួបសំណេះសំណាលជាមួយបងប្អូនសហគមន៍ខ្មែរ និងនិស្សិត ដែលរស់នៅ និងសិក្សា ក្នុងប្រទេសជប៉ុន បានបង្ហាញនូវអារម្មណ៍សប្បាយរីករាយ រំភើបក្រៃលែងដែលបានជួបសំណេះសំណាល និងថតរូបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត នៅទីក្រុងតូក្យូ ថ្ងៃទី៣១ ខែឧសភា ឆ្នាំ២០២៥នេះ។ក្រោយចប់កម្មវិធី ប្រជាពលរដ្ឋខ្មែរដែលរស់នៅប្រទេសជប៉ុនទាំងក្មេងចាស់ ប្រុសស្រីបានចេញជាសារវីដេអូបង្ហាញពីក្ដីរំភើបសប្បាយរីករាយ និងបានជូនពរដំណើរនិវត្តន៍របស់សម្តេចមហាបវរធិបតី ហ៊ុន ម៉ាណែ វិលត្រលប់ទៅមាតុប្រទេសវិញប្រកបដោយសុខសុវត្ថិភាពជាមួយទឹកមុខពោរពេញដោយក្ដីនឹករឭក។ បន្ថែមពីនេះ ប្រជាពលរដ្ឋខ្មែរដែលរស់នៅ និងសិក្សានៅប្រទេសជប៉ុនអរគុណដល់សម្តេចធិបតី និងលោកជំទាវ ហើយពួកគាត់សង្ឃឹមយ៉ាងមុតមាំថានឹងបានចូលរួមក្នុងកម្មវិធីសំណេះសំណាលនេះនៅលើកក្រោយៗទៀត។ គួរបញ្ជាក់ថាកម្មវិធីសម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជាជួបសំណេះសំណាលជាមួយបងប្អូនសហគមន៍ខ្មែរ និងនិស្សិត ដែលរស់នៅ និងសិក្សា ក្នុងប្រទេសជប៉ុន នាថ្ងៃទី៣១ ខែឧសភា ឆ្នាំ២០២៥នេះ បានបញ្ចប់ទៅយ៉ាងរលូន និងដោយក្តីសប្បាយរីករាយ៕

(តាកែវ)៖ ក្រសួងការងារ និងបណ្ដុះបណ្ដាលវិជ្ជាជីវៈ បានសហការជាមួយតំណាងសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា(TAFTAC) បានរៀបចំសិក្ខាសាលាមួយ ដើម្បីផ្សព្វផ្សាយពីលក្ខខណ្ឌសុវត្ថិភាព និងសុខភាពការងារដល់រោងចក្រសហគ្រាសនៅខេត្តតាកែវ នាថ្ងៃទី ៣០ ខែឧសភាឆ្នាំ២០២៥។លោកវេជ្ជបណ្ឌិត លី សារុន ប្រធានការិយាល័យតំណាងប្រធាននាយកដ្ឋានពេទ្យការងារនៃក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំក្រុមការងារនៃនាយកដ្ឋាន ដោយសហការជាមួយតំណាង TAFTAC ព្រមទាំងមានសិក្ខាកាមសរុប ៤៥នាក់ដែលមកពីរោងចក្រសហគ្រាសនៅខេត្តតាកែវ។លោកវេជ្ជបណ្ឌិត លី សារុន បានថ្លែងថា គោលបំណងនៃសិក្ខាសាលានេះ ដើម្បីផ្សព្វផ្សាយ ណែនាំ និងបង្កើនការយល់ដឹងដល់រោងចក្រ សហគ្រាស និងគ្រឹះស្ថានលើគោលការណ៍សំខាន់ៗដូចជា ច្បាប់ និងបទដ្ឋានគតិយុត្តិដែលពាក់ព័ន្ធនឹងសុវត្ថិភាព និងសុខភាពការងារនៅកន្លែងការងារ, បញ្ជីត្រួតពិនិត្យអធិការកិច្ចផ្នែកលក្ខខណ្ឌសុវត្ថិភាព និងសុខភាពការងារ, ប្រព័ន្ធគ្រប់គ្រងសុវត្ថិភាព និងសុខភាពការងារ, សុវត្ថិភាពគ្រឿងម៉ាស៊ីន, មូលដ្ឋានគ្រឹះនៃសុវត្ថិភាពអគ្គីភ័យ និងភាពតានតឹងដោយកម្ដៅខ្លាំង និងវិធានការសុវត្ថិភាពការងារនៅកន្លែងធ្វើការ។ឆ្លៀតឱកាសនោះ ក្រុមការងារនៃនាយកដ្ឋានពេទ្យការងារ បានសហការជាមួយតំណាង TAFTAC ធ្វើការចែកជូន និងផ្សព្វផ្សាយពីសៀវភៅកម្រងច្បាប់ពាក់ព័ន្ធវិស័យការងារ សន្ដិសុខសង្គម និងបណ្ដុះបណ្ដាលវិជ្ជាជីវៈ និងចែកជូននូវបដាព័ត៌មានពាក់ព័ន្ធនឹងបញ្ចូលសេវាសាធារណៈចល័តរបស់ក្រសួងការងារ និងបណ្ដុះបណ្ដាលវិជ្ជាជីវៈដល់រដ្ឋបាល និងរោងចក្រសហគ្រាស និងគ្រឹះស្ថាននានានៅមូលដ្ឋាន។  ភ្ជាប់ជាមួយនឹងការបណ្ដុះបណ្ដាល ក៏ដូចជាការផ្សព្វផ្សាយនេះ ក្រុមការងារបានធ្វើការចាក់បង្ហាញនូវសកម្មភាពខ្លះៗរបស់មជ្ឈមណ្ឌលសុវត្ថិភាព និងសុខភាពការងារ(OSHTC) ព្រមទាំងណែនាំពីវីដេអូអប់រំស្ដីពីសុវត្ថិភាពអគ្គីភ័យ ដែលនាយកដ្ឋានពេទ្យការងារបានរៀបចំកន្លងមក ៕