(សង្គម)៖ ក្រោយពីអ្នកស្រី ទ្រី ដាណា បានបង្ហោះសារត្អូញត្អែរពាក់ព័ន្ធករណីត្រួតពិនិត្យជាតិអាកុលនៅពេលយប់ម្ដុំជិតផ្ទះដែលធ្វើឱ្យពិបាកនិងប៉ះពាល់ដល់ការរស់នៅ ថ្មីៗនេះស្នងការដ្ឋាននគរបាលរាជធានីភ្នំពេញបានធ្វើការបំភ្លឺបកស្រាយជូនសាធារណជនយ៉ាងដូច្នេះថា អធិការដ្ឋាននគរបាលខណ្ឌសែនសុខ នាវេលាម៉ោង១១យប់ ថ្ងៃទី២៧ ខែមេសា ឆ្នាំ២០២៤ កម្លាំងសមត្ថកិច្ចបានចុះអនុវត្តត្រួតពិនិត្យជាតិស្រវឹង នៅលើកំណាត់ផ្លូវហាណូយ ខាងមុខសាលាបឋមសិក្សាភ្នំពេញថ្មី ក្នុងសង្កាត់ភ្នំពេញថ្មី ខណ្ឌសែនសុខ។លុះដល់ម៉ោងប្រហែល ០០:៥៣នាទីយប់ ឈានចូលថ្ងៃទី២៨ ខែមេសា ឆ្នាំ២០២៤ កម្លាំងសមត្ថកិច្ចបានឃើញរថយន្ត០១គ្រឿង ពណ៌ស ពាក់ផ្លាកលេខ ភ្នំពេញ 2BS-2222 មានម៉ូតូ ០២គ្រឿង តាមពីក្រោយ ដោយធ្វើដំណើរពីត្បូងទៅជើង លុះរថយន្តនោះបានធ្វើដំណើរមកដល់ជិតគោលដៅសមត្ថកិច្ចអនុវត្តត្រួតពិនិត្យជាតិស្រវឹង កម្លាំងសមត្ថកិច្ចបានធ្វើសញ្ញាឲ្យអ្នកបើកបររថយន្តចូលកន្លែងត្រួតពិនិត្យជាតិស្រវឹង ប៉ុន្តែបែរជារថយន្តនោះមិនបានសហការចូលមកកន្លែងត្រួតពិនិត្យ នឹងបានបត់ឆ្វេងមិនចូលគោលដៅត្រួតពិនិត្យ ភ្លាមនោះកម្លាំងសមត្ថកិច្ចសង្ស័យថារថយន្តនោះបើកគេចវេស ក៏បានដេញតាមហើយកាក់រថយន្តនោះឲ្យឈប់ និងអញ្ជើញអ្នកបើករថយន្តចូលសហការត្រួតពិនិត្យជាតិស្រវឹង ទើបម្ចាស់រថយន្តព្រមសហការនិងចូលមកកន្លែងត្រួតពិនិត្យហើយអ្នកបើករថយន្តបានដោះម៉ាសចេញទើបសមត្ថកិច្ចស្គាល់ថាជាស្វាមីរបស់លោកស្រី ទ្រី ដាណា ហើយគាត់ក៏បានសហការជាមួយសមត្ថកិច្ចដោយរលូនគ្មានការតវ៉ាអ្វីនោះទេ។ បន្ទាប់មកក៏បានផ្លុំជាតិអាកុល ជាលទ្ធផលគាត់គ្មានផ្ទុកជាតិអាកុលក្នុងខ្លួននោះទេ។ កម្លាំងសមត្ថកិច្ច ក៏បានថ្លែងអំណរគុណដល់ម្ចាស់រថយន្តដែលព្រមសហការ និងអនុញ្ញាតឲ្យគាត់បន្តធ្វើដំណើរ។ បើយោងតាមរបាយការណ៍របស់អធិការដ្ឋាននគរបាលខណ្ឌសែន សុខ ឲ្យដឹងទៀតថា ការចុះអនុវត្តជាតិស្រវឹងតាមផែនការរបស់ស្នងការដ្ឋាននគរបាលរាជធានីភ្នំពេញ គឺសមត្ថកិច្ចខណ្ឌសែនសុខ មិនបានចុះអនុវត្តជារៀងរាល់ថ្ងៃនោះទេ ក្នុង១សប្តាហ៍អនុវត្ត ០៤ដង គិតចាប់ពីម៉ោង ២៣:០០នាទី រហូតដល់ម៉ោង ០២:០០នាទី រំលងអធ្រាត្រ ហើយការចុះអនុវត្តគឺចល័តគោលដៅ។ ដោយនៅគោលដៅខាងមុខសាលាបឋមសិក្សាភ្នំពេញថ្មី កំណាត់ផ្លូវហាណូយនេះ គឺមួយអាទិត្យសមត្ថកិច្ចចុះត្រួតពិនិត្យ០២ដងប៉ុណ្ណោះ មិនដូចការលើកឡើងថាចុះចាប់រាល់ថ្ងៃនោះទេ។ដោយឡែកគឺចាប់តាំងពីសមត្ថកិច្ចខណ្ឌសែនសុខ ចុះអនុវត្តរឹតបន្តឹងត្រួតពិនិត្យជាតិស្រវឹងរហូតមកដល់ពេលនេះ គឺសមត្ថកិច្ចយើងមិនដែលហៅត្រួតពិនិត្យរថយន្តលោកស្រីទ្រី ដាណា នោះទេ ទើបតែហៅ០១លើកនេះតែប៉ុណ្ណោះ កាលពីយប់មិញ នៅគោលដៅខាងលើ គឺស្វាមីគាត់ជាអ្នកបើកបរ។ ការចុះអនុវត្តរឹតបន្តឹងត្រួតពិនិត្យជាតិស្រវឹងគឺកម្លាំងសមត្ថកិច្ច អនុវត្តតាមបទបញ្ជាដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា គឺសំដៅឲ្យប្រជាពលរដ្ឋចូលរួមគោរពច្បាប់ចរាចរណ៍ផ្លូវគោក ដើម្បីកាត់បន្ថយអត្រាគ្រោះថ្នាក់ចរាចរណ៍ និងការពារអាយុជីវិត ទ្រព្យសម្បត្តិរបស់ប្រជាពលរដ្ឋ៕

(ភ្នំពេញ)៖ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈលើកឡើងថា ការប្រារព្វខួបអនុស្សាវរីយ៍ នៃទិវាពលកម្មអន្តរជាតិក្រោមប្រធានបទ “សហគ្រាសមួយជាសហគមន៍សុខសាន្តមួយ” គឺជាសក្ខីភាពបញ្ជាក់នូវការប្តេជ្ញាចិត្ត និងការយកចិត្តទុកដាក់ខ្ពស់របស់រាជរដ្ឋាភិបាល ក្នុងការបន្តលើកកម្ពស់លក្ខខណ្ឌការងារ សិទ្ធិសេរីភាព, និងអត្ថប្រយោជន៍ដល់កម្មករនិយោជិត, និងពង្រឹងយន្តការបង្ការនិងដោះស្រាយវិវាទការងារ សំដៅធ្វើឱ្យមានភាពកាន់តែល្អប្រសើរឡើងនៃទំនាក់ទំនងវិជ្ជាជីវៈនៅកន្លែងធ្វើការងារ។ ថ្លែងក្នុងកម្មវិធីសំណេះសំណាលជាមួយសហជីព សេដ្ឋកិច្ចក្រៅប្រព័ន្ធ និងសមាគមបុគ្គលិកសិក្សា ដើម្បីអបអរសាទរខួបអនុស្សាវរីយ៍ លើកទី១៣៨ នៃទិវាពលកម្មអន្តរជាតិ ១ ឧសភា ឆ្នាំ២០២៤ ឯកឧត្តមរដ្ឋមន្រ្តីគូសបញ្ជាក់ថា ការជ្រើសរើសប្រធានបទសម្រាប់ឆ្នាំនេះ ក៏ផ្ដើមចេញពីការអនុវត្តអនុសាសន៍រួមគ្នារបស់ សម្តេចតេជោ ហ៊ុន សែន និង សម្ដេចធិបតី ហ៊ុន ម៉ាណែត ក្នុងអំឡុងពេលដែលសម្តេចទាំងពីរចុះជួបសំណេះសំណាល ជាមួយបងប្អូនកម្មករនិយោជិតចាប់តាំងពីឆ្នាំ២០១៧កន្លងមក។ឯកឧត្តមរដ្ឋមន្ត្រី ថ្លែងថាការប្រារព្ធទិវានៅឆ្នាំនេះគឺជាព្រឹត្តិការណ៍ប្រវត្តិសាស្រ្តរបស់កម្មករនិយោជិតដែលត្រូវបានរាជរដ្ឋាភិបាលកម្ពុជាប្រារឰធ្វើជារៀងរាល់ឆ្នាំ ចាប់តាំងពីក្រោយថ្ងៃរំដោះ ៧មករា ឆ្នាំ១៩៧៩ ហើយឆ្នាំនេះក៏ដូចឆ្នាំមុនៗដែរ គឺរាជរដ្ឋាភិបាលបានចេញសារាចរណែនាំដើម្បីបំផុសលើកទឹកចិត្តគ្រប់ក្រសួង ស្ថាប័នពាក់ព័ន្ធ រដ្ឋបាលរាជធានី ខេត្ត រោងចក្រ សហគ្រាសនានា រៀបចំខួបអនុស្សាវរីយ៍លើកទី១៣៨ ទិវាពលកម្មអន្តរជាតិ ១ឧសភា និងកម្មវិធីកម្សាន្តផ្សេងៗ ដើម្បីបង្កបរិយាកាសរីករាយ និងសាមគ្គីភាព រវាងកម្មករនិយោជិត និងនិយោជក។ឯកឧត្តមរដ្ឋមន្រ្តី បានគូសបញ្ជាក់ថាដើម្បីជំរុញឱ្យគ្រប់ភាគីពាក់ព័ន្ធ ជាពិសេសភាគីនិយោជកក្នុងវិស័យកាត់ដេរស្ម័គ្រចិត្តចូលរួមក្នុងកម្មវិធីប្រឡងប្រណាំង និងប្រែក្លាយការប្រឡងប្រណាំងនេះទៅជាចលនាជាតិមួយ សំដៅអភិវឌ្ឍវប្បធម៌អនុលោមភាព ពង្រឹងភាពសុខដុមរមនានៃទំនាក់ទំនងវិជ្ជាជីវៈ និងលើកតម្កើងទំនួលខុសត្រូវផ្នែកសង្គមរបស់សហគ្រាសនោះ ក្រសួងការងារ និងបណ្ដុះបណ្ដាលវិជ្ជាជីវៈ បានចេញនូវប្រកាសចំនួន ៣ និងសេចក្តីសម្រេចចំនួន ១ ក្នុងការកំណត់លក្ខណវិនិច្ឆ័យពាន “សហគ្រាសមួយជាសហគមន៍សុខសាន្តមួយ” ដោយក្នុងនោះតម្រូវឱ្យសហគ្រាសនីមួយៗ ត្រូវទទួលបានវិញ្ញាបនបត្រអនុលោមភាពចំនួន ៨។ទន្ទឹមនឹងនេះឯកឧត្តមរដ្ឋមន្រ្តី អរគុណចំពោះបងប្អូនថ្នាក់ដឹកនាំសហជីព ដែលបានសហការជាមួយក្រសួង សមាគមនិយោជក និងម្ចាស់រោងចក្រ សហគ្រាសនានា បំពេញភារកិច្ចរបស់ខ្លួនបានយ៉ាងល្អប្រកបដោយភាពចាស់ទុំ មានវិជ្ជាជីវៈ និងអរគុណដល់អង្គការអន្តរជាតិខាងការងារ (ILO) ដែលបានផ្ដល់ការសម្របសម្រួល និងគាំទ្រផ្នែកបច្ចេកទេសដល់ក្រសួងការងារ និងបណ្ដុះបណ្ដាលវិជ្ជាជីវៈ ក្រុមប្រឹក្សាអាជ្ញាកណ្ដាល សហជីព សមាគមនិយោជក ដែលបានធ្វើឱ្យគ្រប់គ្នាមានសមត្ថភាពកាន់តែប្រសើរ យល់កាន់តែច្បាស់អំពីតួនាទី៕

(រាជធានីភ្នំពេញ)៖ នៅថ្ងៃទី២៤ ខែមេសា ឆ្នាំ២០២៤ យោងតាមការចុះផ្សាយរបស់មន្ទីរប្រឆាំងគ្រឿងញៀន បានឱ្យដឹងថា ករណីជាក់ស្តែង កំពុងធ្វើសកម្មភាពជួញដូរ រក្សាទុកដោយខុសច្បាប់នូវសារធាតុញៀននៅ ០៥ ទីតាំងផ្សេងៗគ្នាជាបន្តបន្ទាប់រួមមាន៖ទី១-នៅចំណុចទល់មុខស្ថានីយ៍ទឹកស្អាត សង្កាត់ជ្រោយចង្វារ ខណ្ឌជ្រោយចង្វារ ទី២-ក្នុងបន្ទប់លេខ១១១៨ ជាន់ទី១១ ក្នុងខុនដូមេគង្គវីយូ៦ សង្កាត់-ខណ្ឌជ្រោយចង្វារទី៣-បន្ទប់លេខ១១១០ ខុនដូហែនលេន ភូមិកៀនឃ្លាំង សង្កាត់ព្រែកលាភ ខណ្ឌជ្រោយចង្វារទី៤-ផ្ទះលេខ៦១ ផ្លូវ V-03 បុរីដឺហ្លររ៉ា ផ្លូវជាតិលេខ៦អា ភូមិក្តីចាស់ សង្កាត់បាក់ខែងទី៥-ផ្ទះលេខ៣២អ៉ី (16E) ផ្លូវជាតិលេខ៦អា ក្រុម១០ ភូមិក្រោលគោ សង្កាត់-ខណ្ឌឬស្សីកែវយ៉ាងណាមិញកម្លាំងជំនាញបានឃាត់ខ្លួនជនសង្ស័យចំនួន ០៦នាក់រួមមាន៖១-ឈ្មោះ លី ប៊ុនមីន ភេទប្រុស ជនជាតិខ្មែរ កើតឆ្នាំ១៩៧១ ជាមេខ្លោង ហើយមានដីកាចាប់បង្គាប់ឲ្យចាប់ខ្លួនផងដែរ២-ឈ្មោះ ប៊ុន ណាវី ភេទស្រី ជនជាតិខ្មែរ កើតឆ្នាំ ១៩៦៤៣-ឈ្មោះ លី មីង ភេទប្រុស ជនជាតិខ្មែរ កើតឆ្នាំ២០០១៤-ឈ្មោះ ប៊ុន ម៉ាលីស ភេទស្រី ជនជាតិខ្មែរ កើតឆ្នាំ១៩៧៤៥-ឈ្មោះ ស៊ុយ ឆេងឡាង ភេទស្រី ជនជាតិខ្មែរ កើតឆ្នាំ២០០០៦-ឈ្មោះ កេះ ស្រីពេញ ភេទស្រី ជនជាតិខ្មែរ កើតឆ្នាំ១៩៩៩ចាប់យកវត្ថុតាង គ្រឿងញៀនមានដូចជា៖១-មេតំហ្វេតាមីន (ICE) ទម្ងន់ ១៥៨គីឡូក្រាម និង២៤ក្រាម២-កេតាមីន (Ketamine) ទម្ងន់ ២២គីឡូក្រាម និង៦៨៤ក្រាម៣-ហេរ៉ូអ៊ីន (Heroine) ទម្ងន់ ៧គីឡូក្រាម និង៤៣៤ក្រាម សរុបគ្រឿងញៀនទម្ងន់ ១៨៨គីឡូក្រាម ១៤២ក្រាម។ ចាប់យកទ្រព្យសម្បត្តិ ដែលសង្ស័យជាផលកើតចេញពីបទល្មើសគ្រឿងញៀន រួមមាន ៖ សាច់ប្រាក់ជាង ៣០ម៉ឺនដុល្លារអាមេរិកអចលនទ្រព្យ រថយន្ត គណនីធនាគារ ប្រមាណតម្លៃ រាប់លាន ដុល្លារអាមេរិក។បច្ចុប្បន្នជនសង្ស័យ និងវត្ថុតាងចាប់យកខាងលើ មន្ទីរប្រឆាំងគ្រឿងញៀន បានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕

(អន្តរជាតិ)៖ KFC បានកាត់បន្ថយប្រតិបត្តិការរបស់ខ្លួនក្នុងប្រទេសម៉ាឡេស៊ី ដោយបានបិទ ភោជនីយដ្ឋានជាង 100 ជាបណ្ដោះអាសន្ន បន្ទាប់ពីរយៈពេលជាច្រើនខែ ដើម្បីធ្វើពហិការដែលគាំទ្រ ប៉ាឡេស្ទីន ចំពោះអាជីវកម្មដែលភ្ជាប់ជាមួយសហរដ្ឋអាមេរិកដែលបង្កឡើង ដោយសង្រ្គាមដែល កំពុងបន្តនៅក្នុងតំបន់ហ្គាហ្សា។កាសែត Nanyang Siang Pau ជាភាសាចិនប្រចាំថ្ងៃ បាននិយាយថា យីហោ QSR ដែលជាម្ចាស់ និង ដំណើរការសិទ្ធិផ្តាច់មុខ KFC ក្នុងប្រទេសម៉ាឡេស៊ី កំពុងផ្អាកហាងចំនួន 108 ទូទាំងប្រទេស នេះបើយោងតាមព័ត៌មានពី Google Maps ។ប្រភពមួយនៅ QSR ដែលសុំមិនបញ្ចេញឈ្មោះបាននិយាយថា ក្រុមហ៊ុនមើលឃើញការធ្វើពហិការនេះ ជាឱកាសមួយដើម្បីបញ្ឈប់ប្រតិបត្តិការហាង KFC មួយចំនួនដែលបានថ្លឹងថ្លែងលើតារាង តុល្យការរបស់ខ្លួន។សាស្ត្រាចារ្យ Mohd Nazari Ismail ប្រធាន​ក្រុម​គាំទ្រ​ប៉ាឡេស្ទីន Boycott, Divestment, Sanctions Malaysia បានប្រាប់ ST “KFC មិនស្ថិតនៅក្នុងបញ្ជី BDS នៃក្រុមហ៊ុនគោលដៅនោះទេ។ ប៉ុន្តែ​ប្រជាជន​ម៉ាឡេស៊ី​ជាច្រើន​មើលឃើញថា​ប្រតិបត្តិករ​អាហារ​រហ័ស​របស់​អាមេរិក​ពាក់ព័ន្ធ​នឹង​អ៊ីស្រាអែល ​រួមទាំង KFC ផងដែរ​»​។​ ។ចាប់តាំងពីការធ្វើពហិការបានចាប់ផ្តើមនៅក្នុងខែតុលា ឆ្នាំ 2023  KFC ក៏បានផ្លាស់ប្តូរយុទ្ធសាស្រ្ត ម៉ាកយីហោរបស់ខ្លួនផងដែរ ដោយមានសញ្ញានៅលើផ្ទាំងម៉ឺនុយ និងចែកចាយខិត្តប័ណ្ណ ដែលសង្កត់ ធ្ងន់ថា វាជាកម្មសិទ្ធិរបស់សាជីវកម្ម Johor ដែលជាកម្មសិទ្ធិរបស់រដ្ឋាភិបាលរដ្ឋ Johor ដើម្បីកាត់បន្ថយ ការធ្វើពហិការ។យោងតាមគេហទំព័រ QSR បានឱ្យដឹងថា មានភោជនីយដ្ឋាន KFC ច្រើនជាង 600 នៅក្នុងប្រទេស ម៉ាឡេស៊ី។KFC រួមជាមួយនឹងម៉ាកយីហោដែលមានមូលដ្ឋាននៅសហរដ្ឋអាមេរិកមួយចំនួនទៀត ដូចជា Starbucks និង McDonald's ក៏កំពុងប្រឈមមុខនឹងការធ្វើពហិការ ដោយសារតែការយល់ឃើញថា ហាងទាំងនេះ មានទំនាក់ទំនងជាមួយអ៊ីស្រាអែលចាប់តាំងពីសង្រ្គាមនៅហ្គាហ្សាបានចាប់ផ្តើមនៅថ្ងៃទី 7 ខែតុលា ឆ្នាំ 2023៕​​​

(ម៉ានីល)៖ រលកកំដៅដ៏ក្តៅគគុកនៅក្នុងប្រទេសហ្វីលីពីន អាចទប់ស្កាត់ផលិតកម្មកសិកម្ម រំខានដល់ទឹក និងថាមពល និងធ្វើឱ្យប៉ះពាល់ដល់អាជីវកម្ម ប៉ុន្តែវាក៏ធ្វើឱ្យប៉ះពាល់ដល់និស្សិតផងដែរ ដោយរារាំង ដល់កិច្ចខិតខំប្រឹងប្រែងរបស់ប្រទេសអាស៊ីអាគ្នេយ៍មួយនេះ ដើម្បីតាមឱ្យទាន់ប្រទេសជិតខាង ក្នុងវិស័យអប់រំ។សន្ទស្សន៍កំដៅបានឡើងដល់ 50 អង្សារសេនៅក្នុងតំបន់ផ្សេងៗក្នុងប្រទេសហ្វីលីពីន ដោយសារបាតុភូត អាកាសធាតុ El Nino បង្កើនកំដៅគ្របដណ្តប់ប្រទេសក្នុងរដូវក្តៅរបស់ខ្លួនពីខែមីនា ដល់ខែឧសភា។ហ្វីលីពីនទទួលបានពិន្ទុទាបបំផុតក្នុងពិភពលោកក្នុងផ្នែកគណិតវិទ្យា វិទ្យាសាស្ត្រ និងការអាន ដែល មួយផ្នែកដោយសារតែការរៀនពីចម្ងាយមិនគ្រប់គ្រាន់ជាច្រើនឆ្នាំ ក្នុងអំឡុងពេលរាតត្បាត នេះបើយោងតាម កម្មវិធីសម្រាប់ការវាយតម្លៃសិស្សអន្តរជាតិដែលជាការសិក្សាអន្តរជាតិនៃប្រព័ន្ធអប់រំ។ទិន្នន័យរបស់ក្រសួងអប់រំបង្ហាញថា សាលារៀនរាប់ពាន់បានផ្អាកថ្នាក់រៀន ដោយសារកំដៅ ដែលប៉ះ ពាល់ដល់សិស្សជាង 3.6 លាននាក់។រលកកម្តៅ ដែលជាផ្នែកមួយនៃក្រុមដែលរីករាលដាលពាសពេញអាស៊ីខាងត្បូង និងអាស៊ីអាគ្នេយ៍ ដែលកាន់តែធ្ងន់ធ្ងរឡើងដោយការប្រែប្រួលអាកាសធាតុ ធ្វើឱ្យសិស្សពិបាករៀន។យោងតាមអង្គការ Save the Children Philippines កុមារងាយរងគ្រោះជាពិសេសចំពោះ ជំងឺដែលទាក់ទងនឹងកំដៅ ដូចជាវិលមុខ ក្អួត និងដួលសន្លប់ នៅពេលដែលត្រូវកំដៅខ្លាំង ក្នុងរយៈ ពេលយូរ។សិស្សានុសិស្ស និងគ្រូបង្រៀនបានសម្តែងការព្រួយបារម្ភអំពីការលំបាកក្នុងការបង្រៀន និងការរៀន ពីចម្ងាយ ជាពិសេសនៅតំបន់ក្រីក្រ ដែលផ្ទះមិនអំណោយផល សម្រាប់ការសិក្សា និងអាចខ្វះលទ្ធភាព ប្រើប្រាស់ អ៊ីនធឺណិតបានល្អ៕

(អន្តរជាតិ)៖ លោកJoe Biden ចុះហត្ថលេខាលើច្បាប់ដែលតម្រូវឱ្យម្ចាស់ជនជាតិចិនលក់ប្រតិបត្តិការ របស់កម្មវិធីនៅសហរដ្ឋអាមេរិក បើមិនដូច្នេះទេនឹងប្រឈមនឹង ការហាមឃាត់ បន្ទាប់ពីព្រឹទ្ធសភាបាន អនុម័តច្បាប់នេះ។ច្បាប់នេះផ្តល់ឱ្យក្រុមហ៊ុនមេ ដែលមានមូលដ្ឋាននៅទីក្រុងប៉េកាំងរបស់ TikTok គឺ ក្រុមហ៊ុន ByteDance នូវរយៈពេល 270 ថ្ងៃដើម្បីលក់ប្រតិបត្តិការសហរដ្ឋអាមេរិករបស់កម្មវិធីនេះ។ ប្រសិនបើ ByteDance ហាក់ ដូចជាជិតដល់ការបញ្ចប់កិច្ចព្រមព្រៀង នៅពេលដែលថ្ងៃផុតកំណត់ជិតមកដល់ ប្រធានាធិបតី អាចអនុញ្ញាតការពន្យារពេល 90 ថ្ងៃ។ថ្ងៃផុតកំណត់មកដល់ប្រហែលពេលដែលប្រធានាធិបតីបន្ទាប់ ត្រូវបានសម្ពោធនៅថ្ងៃទី 20 ខែមករា ដែលមានន័យថា លោក Donald Trump ប្រសិនបើគាត់ឈ្នះការបោះឆ្នោត អាចសម្រេចថា តើដំណើរការលក់ត្រូវបានពន្យារពេលទេ។ប្រសិនបើ ByteDance បរាជ័យក្នុងការអនុវត្តការលក់ នោះវានឹងប្រឈមមុខនឹងការហាមប្រាម ទូទាំងប្រទេស ដោយការបិទហាងកម្មវិធី និងម្ចាស់គេហទំព័រពីការចែកចាយ TikTok ។មូលហេតុដែលអាមេរិកគំរាមហាមប្រាម TikTok ដោយសារសមាជិកសភា និងអាជ្ញាធរអាមេរិក មានការព្រួយបារម្ភថា ទិន្នន័យពីអ្នកប្រើប្រាស់ TikTok របស់សហរដ្ឋអាមេរិកចំនួន 170 លាននាក់ អាចត្រូវបានចូលប្រើដោយរដ្ឋចិន ក្រោមច្បាប់សន្តិសុខជាតិ។TikTok បដិសេធថា រដ្ឋាភិបាលចិនមិនបានព្យាយាមចូលប្រើទិន្នន័យអ្នកប្រើប្រាស់អាមេរិកទេ ហើយ និយាយថា ខ្លួននឹងបដិសេធរាល់សំណើបែបនេះ។ នៅក្នុងការបង្ហាញខ្លួនមួយនៅចំពោះមុខសភាកាលពីឆ្នាំមុន នាយកប្រតិបត្តិ TikTok លោក Shou Zi Chew បាននិយាយថា "ខ្ញុំសូមបញ្ជាក់រឿងនេះឱ្យច្បាស់ថា ByteDance មិនមែនជាភ្នាក់ងាររបស់ ប្រទេសចិន ឬប្រទេសណាមួយឡើយ។ទន្ទឹមនឹងនេះ​ម្ចាស់ក្រុមហ៊ុន X លោក Elon Musk បានសម្តែងការប្រឆាំងរបស់លោក ចំពោះការ ហាមឃាត់របស់សហរដ្ឋអាមេរិកលើដៃគូប្រកួតប្រជែងរបស់ខ្លួន ដោយលើកឡើងពី ការរំលោភ លើសេរីភាពនៃការនិយាយ ទោះបីជាការបិទTik Tok អាចចំណេញដល់ បណ្តាញសង្គមX របស់លោក ក៏ដោយ៕

(សៀមរាប)៖ សមាគមផ្សព្វផ្សាយពិភពលោកពួកជំនុំនៃព្រះ ដែលមានគ្រូគង្វាលធំឈ្មោះ លោកគីម ជូឆល់  បានធ្វើ បានចលនាបរិច្ចាគឈាមបន្ដគ្នាទូទាំងពិភពលោក ដើម្បីផ្តល់ជីវិត តាមរយៈសេចក្តី ស្រលាញ់ នៃបុណ្យរំលង នៅមជ្ឈមណ្ឌលផ្ដល់ឈាម ខេត្តសៀមរាប។ ពាក្យ "បុណ្យរំលង" នៅក្នុងឈ្មោះចលនាបរិច្ចាគឈាមនេះ គឺជាឈ្មោះពិធីបុណ្យរបស់ព្រះ ដែលមាន ចែង ទុកនៅក្នុងព្រះគម្ពីរ ហើយពិធីបុណ្យនេះមានអត្ថន័យថា"សេចក្ដីវេទនារំលងផុតទៅ"។ យោងតាមព្រះគម្ពីរ នៅមួយថ្ងៃមុននឹងព្រះយេស៊ូវគ្រីស្ទបានសុគតនៅលើឈើឆ្កាង ទ្រង់បានតាំងឡើង សញ្ញាថ្មី ដោយនំប៉័ង និងស្រាទំពាំងបាយជូរ ដែលតំណាងឱ្យសាច់ និងឈាមរបស់ទ្រង់ ហើយទ្រង់ បានប្រទានការផ្ដាច់បាប និងជីវិតអស់កល្បដល់មនុស្សជាតិ។ ដើម្បីរំឭកដល់ថ្ងៃនោះ ដែលមានផ្ទុក ដោយការបូជា និងសេចក្ដីស្រលាញ់របស់ព្រះគ្រីស្ទ ព្រះវិហារពួកជំនុំនៃព្រះ បាននឹងកំពុងធ្វើចលនា បរិច្ចាគឈាមនេះ អស់រយៈពេល២០ឆ្នាំមកហើយ។ នៅឆ្នាំនេះផងដែរ ចលនាបរិច្ចាគឈាមបានធ្វើឡើងនៅទូទាំងពិភពលោក មានដូចជាប្រទេសកម្ពុជា សហរដ្ឋអារមិក ឈីលី ហ្វីលីពីន បេនីន នូវែលសេឡង់ និងផ្សេងៗទៀត។ សកម្មភាពមានការចូលរួមពី សមាជិកព្រះវិហារ គ្រួសារ និងអ្នកជិតខាង ប្រមាណជា ៥២នាក់ និងមានអ្នកស្ម័គ្រចិត្តសរុប ២៧នាក់ បានបរិច្ចាគឈាម ៩៤៥០មីលីលីត្រ។ អ្នកស្ម័គ្រចិត្តទាំងអស់បានចូលរួមការពិនិត្យមើលឈាម និងបរិច្ចាគឈាម ដោយទឹកមុខ សប្បាយជាខ្លាំង។ មជ្ឈមណ្ឌលផ្ដល់ឈាម ខេត្តសៀមរាប កម្ពុជា បានគាំទ្រអ្នកបរិភោគឈាមដោយផ្គត់ផ្គង់អាហារសម្រន់ និងអាវយឺតអនុស្សាវរីយ៍។ សូមបញ្ជាក់ថា មជ្ឈមណ្ឌលផ្ដល់ឈាម ខេត្តសៀមរាប ផ្គត់ផ្គង់ឈាម និងរក្សាទុកឈាម សម្រាប់មន្ទីរពេទ្យទូទាំងខេត្តសៀមរាប ដូច្នេះ ចលនាបរិច្ចាគឈាមរបស់ ពួកជំនុំនៃព្រះ នឹងផ្ដល់ជំនួយដល់តំបន់ជាច្រើន ដែលត្រូវការឈាម។ លោកស្រី ឆាយ គឹមឈន ប្រធានមជ្ឈមណ្ឌលផ្តល់ឈាម ខេត្តសៀមរាប បានសម្ដែងការដឹងគុណចំពោះព្រះវិហារពួកជំនុំនៃព្រះ ដែលបានបរិច្ចាគឈាមជាក្រុម ដោយនិយាយថា “ខ្ញុំសូមថ្លែងអំណរគុណដល់ព្រះវិហារពួកជំនុំនៃព្រះ ដែលតែងតែដឹកនាំសមាជិកខ្លួនមកចែកចាយសេចក្តីស្រលាញ់នៃការសង្គ្រោះជីវិត តាមរយៈការបរិច្ចាគ ឈាមជាទៀងទាត់នៅមជ្ឈមណ្ឌលផ្តល់ឈាម​យើងខ្ញុំ។"ចលនាបរិច្ចាគឈាមបន្ដគ្នាទូទាំងពិភពលោក ដើម្បីផ្តល់ជីវិត តាមរយៈសេចក្តីស្រលាញ់នៃបុណ្យរំលង" បានចាប់ផ្ដើមនៅប្រទេសកូរ៉េ កាលពីឆ្នាំ២០០៥ ហើយចលនានេះ បានធ្វើឡើង អស់១២៥០លើក ក្នុង៦០ប្រទេសនិងអ្នកស្ម័គ្រចិត្តបរិច្ចាគឈាមជាង១០ម៉ឺននាក់។គួរបញ្ជាក់ថា ចលនានេះបានធ្វើឡើងឆ្នាំនេះ ស្របពេលដែលឆ្នាំនេះជាខួបទី៦០ របស់ព្រះវិហារពួកជំនុំនៃ ព្រះ។ ព្រះវិហារនេះ គឺជាព្រះវិហារសាកល ដែលត្រូវបានតាំងឡើង៧៥០០កន្លែង ក្នុង១៧៥ប្រទេស មានសមាជិកចំនួន ៣.៧លាននាក់ ជឿលើព្រះវរបិតា និងព្រះមាតា ដែលមានចែងទុកនៅក្នុងព្រះគម្ពីរ ហើយបាននិងកំពុងធ្វើសកម្មភាពស្ម័គ្រចិត្ត អស់២ម៉ឺន៧ពាន់លើក ក្នុងវិស័យផ្សេងៗ តាមសេចក្ដីបង្រៀនរបស់ ព្រះដែលថា «ចូរស្រលាញ់អ្នកជិតខាងដូចខ្លួនឯង»៕

(សង្គម)៖ កាលពីថ្ងៃទី២៦ ខែមេសា ឆ្នាំ២០២៤ កន្លងទៅនេះយោងតាមការបង្ហោះទំព័រផេកមានឈ្មោះថា រៀនគណិតវិទ្យា បានឱ្យដឹងថា សិស្សឆ្នើមកម្ពុជាចំនួន ២០ រូបនឹងតំណាងប្រទេសកម្ពុជា ទៅចូលរួមប្រកួតប្រជែងការប្រឡងគណិតវិទ្យាអូឡាំពិកថៃឡែន៍អន្តរជាតិ វគ្គផ្តាច់ព្រ័ត្រប្រចាំឆ្នាំ២០២៤ (Thailand International Mathematical Olympiad) នៅទីក្រុងបាងកក ប្រទេសថៃ ចាប់ពីថ្ងៃទី២៦ ដល់ថ្ងៃទី២៩ ខែមេសា ឆ្នាំ២០២៤។យ៉ាងណាមិញជាលិទ្ធផលមកទល់ថ្ងៃនេះដែលជាថ្ងៃទី២៩ ខែមេសា ឆ្នាំ២០២៤ សិស្សឆ្នើមកម្ពុជាទាំង ២០ រូបដែលបានតំណាងប្រទេសកម្ពុជានោះទទួលបានក៏ជាឈ្នះពាននិងមេដាយជាច្រើន។ ក្នុងនោះរួមមានពាន World Star Champion ចំនួន ០១ ,ពាន Perfect Score លើផ្នែកលំហាត់ ចំនួន០២ ,មេដាយមាសចំនួន០២ ,មេដាយប្រាក់ចំនួន ០៤ ,មេដាយសំរឹទ្ធិចំនួន ០៨ , និងមេដាយកិត្តិយស ០៦ នាក់ នៃប្រកួតប្រជែងការប្រឡងគណិតវិទ្យាអូឡាំពិកថៃឡែន៍អន្តរជាតិ វគ្គផ្តាច់ព្រ័ត្រប្រចាំឆ្នាំ២០២៤ (Thailand International Mathematical Olympiad Final Round 2024) នៅទីក្រុងបាងកក ប្រទេសថៃនេះ។ទោះជាយ៉ាងណានេះគឺជាជោគជ័យមួយដ៏ធំនិងគួរមានមោទនភាពផងដែរចំពោះសិស្សឆ្នើមកម្ពុជាដែលបានតំណាងឱ្យប្រទេសកម្ពុជាដើម្បីចូលរួមប្រកួតប្រជែងការប្រឡងលំដាប់ថ្នាក់អន្តរជាតិនិងថែមទាំងទទួលបានលទ្ធផលដ៏គាប់ប្រសើរដូច្នេះ។ ជាមួយគ្នាមហាជនមានតែពាក្យថាអបអរសារទរ និងអរគុណទៅកាន់សិស្សឆ្នើមទាំង២០រូបចំពោះការខិតខំប្រឹងប្រែង និងនាំយកលទ្ធផលល្អមកកាន់ប្រទេសកម្ពុជាវិញ លើសពីនោះថែមទាំងបានលើកមុខមាត់ប្រទេសកម្ពុជាក្នុងការបង្ហាញនូវសមត្តិភាពនិងចំណេះដឹងបែបនេះ៕

(អន្តរជាតិ)៖ ប្រធានាធិបតីអាមេរិក លោក Joe Biden បានប្រកាសពីកិច្ចព្រមព្រៀងជាមួយក្រុមហ៊ុន អាមេរិកមួយ ដើម្បីផ្គត់ផ្គង់ការផ្គត់ផ្គង់បន្ទះឈីបអង្គចងចាំកុំព្យូទ័រក្នុងស្រុក។ លោកបានផ្តល់ជំនួយឥតសំណងដែលមានតម្លៃរហូតដល់ 6.1 ពាន់លានដុល្លារ ដល់ក្រុមហ៊ុន Micron Technology ។លោក Biden ចង់ឱ្យសហរដ្ឋអាមេរិកក្លាយជាប្រទេសនាំមុខគេលើសកលលោក ក្នុងបច្ចេកវិទ្យា ដែលផ្តល់ថាមពលគ្រប់បែបយ៉ាងចាប់ពីទូរស័ព្ទ រហូតដល់យន្តហោះចម្បាំង និងផលិតឧបករណ៍ អេឡិចត្រូនិកទំនើបៗ។កិច្ចព្រមព្រៀងនេះ នឹងអនុញ្ញាតឱ្យក្រុមហ៊ុនសាងសង់រោងចក្រនៅទីក្រុងញូវយ៉ក និងអៃដាហូ និង នាំយកការងារដែលបានផ្លាស់ប្តូរទៅក្រៅប្រទេសមកវិញ។ គេជឿថាកិច្ចព្រមព្រៀងនេះនឹងបង្កើតការងារជាង 20000 កន្លែង។លោក Biden បានធ្វើសេចក្តីប្រកាសកាលពីថ្ងៃព្រហស្បតិ៍នៅទីក្រុង Syracuse ទីក្រុងញូវយ៉ក។ លោកបាននិយាយថា យើងបានចាត់វិធានការដើម្បីធ្វើឱ្យប្រាកដថា បន្ទះឈីបទាំងនេះត្រូវបានផលិត នៅក្នុងសហរដ្ឋអាមេរិកម្តងទៀតដោយបង្កើតបានរាប់ម៉ឺន ។លោក Biden បាននិយាយថា ការវិនិយោគមានសារៈសំខាន់ចំពោះការបង្កើតថ្មី ការប្រកួតប្រជែងផ្នែកសេដ្ឋកិច្ច និងសន្តិសុខជាតិ។ ក្រុមហ៊ុនផលិតរបស់អាមេរិកផលិតតែប្រហែល 10 ភាគរយនៃបន្ទះសៀគ្វីរបស់ពិភពលោក ហើយ គ្មានបន្ទះទំនើបបំផុតនោះទេ៕

(អន្តរជាតិ)៖ មេដឹកនាំនៃប្រទេសអ៊ីរ៉ង់ និងប៉ាគីស្ថាន បានព្រមព្រៀងគ្នាក្នុងការពង្រីកកិច្ចសហប្រតិបត្តិ ការពាណិជ្ជកម្ម និងសេដ្ឋកិច្ចបន្ថែមទៀត ដោយប្តេជ្ញាថានឹងបង្កើនពាណិជ្ជកម្មប្រចាំឆ្នាំដល់ ១០ ពាន់ លានដុល្លារ។ប្រធានាធិបតីអ៊ីរ៉ង់ លោក Ebrahim Raisi បានជួបជាមួយនាយករដ្ឋមន្ត្រីប៉ាគីស្ថាន លោក Shehbaz Sharif ក្នុងទីក្រុង Islamabad ក្នុងអំឡុងពេលទស្សនកិច្ចរយៈពេលបីថ្ងៃ។ក្រសួងការបរទេសប៉ាគីស្ថានបានចេញសេចក្តីថ្លែងការណ៍រួមមួយ បាននិយាយថាប្រទេសជិតខាង បានប្តេជ្ញាថានឹងយកពាណិជ្ជកម្មទ្វេភាគីប្រចាំឆ្នាំដល់ 10 ពាន់លានដុល្លារក្នុងរយៈពេល 5 ឆ្នាំ។ ពួកគេក៏បានយល់ព្រមក្នុងការបញ្ចប់កិច្ចព្រមព្រៀងពាណិជ្ជកម្មសេរីយ៉ាងឆាប់រហ័ស។ភាគីទាំងពីរបានពិភាក្សាគ្នាអំពីផែនការអភិវឌ្ឍបំពង់បង្ហូរឧស្ម័ន ដើម្បីបញ្ជូនឧស្ម័នធម្មជាតិរបស់អ៊ីរ៉ង់ ទៅកាន់ប៉ាគីស្ថាន ដោយបញ្ជាក់ពីសារៈសំខាន់នៃកិច្ចសហប្រតិបត្តិការក្នុងវិស័យថាមពល។ប៉ុន្តែមិនច្បាស់ថាតើគម្រោងនេះនឹងទៅមុខនៅពេលណាមួយក្នុងពេលឆាប់ៗនេះទេ។ ទីក្រុងវ៉ាស៊ីនតោនបាននិយាយថា ប្រទេសណាដែលពិចារណាលើកិច្ចព្រមព្រៀងពាណិជ្ជកម្ម ជាមួយ អ៊ីរ៉ង់អាចប្រឈមមុខនឹងហានិភ័យនៃទណ្ឌកម្ម៕

(ព័ត៌មានជាតិ)៖ ទំនាក់ទំនងរវាងសម្តេចតេជោ និងវៀតណាមជាទំនាក់ទំនងពិសេស វាខុសពីជំហរងាយៗដែលមនុស្ស មួយចំនួនតែងយកថា «យួនលេបទឹកដីខ្មែរ ត្រូវប្រឆាំងជាសត្រូវសួរពូជ»។ នេះជាកំហុសដែលខ្មែរក្រហមបានជ្រើសរើស។ ថ្វីត្បិតតែវៀតណាមធ្លាប់ផ្តល់សិទ្ធជ្រោកកោណដល់សម្តេចតេជោកាលពីឆ្នាំ1977 និងបានជួយឧបត្ថម្ភដល់កងកម្លាំងប្រដាប់អាវុធសាមគ្គីសង្រ្គោះជាតិកម្ពុជាដែលមករំដោះប្រជាជនពីរបបខ្មែរក្រហម (ដែលមានជំនួយពីកងទ័ពស្ម័គ្រចិត្តវៀតណាមផង) រហូតដល់គាំទ្របេក្ខជនសម្តេចតេជោជារដ្ឋមន្រ្តីការបរទេស និងជាប្រធានក្រុមប្រឹក្សារដ្ឋមន្រ្តី ក៏សម្តេចតេជោតែងតែជម្នះជាច្រើនរឿងជាមួយវៀតណាម ហើយវៀតណាមក៏នៅតែបន្ត សហការជាមួយកម្ពុជាដឹកនាំដោយសម្តេចតេជោ។ រឿងទាំងនោះមាន៖ 1) ការចរចារជាមួយសីហនុនៅប៉ារីស ដែលតំណាងឱ្យភាគីប៉ុលពតដែលវៀតណាមស្អប់បំផុត 2) ការចាប់បញ្ជូនប្រជាជនវៀតណាមខុសច្បាប់ទៅស្រុកវិញ នៅពេលដែលវៀតណាមធ្លាប់ចិញ្ចឹមជនភាសខ្លួនកម្ពុជារាប់សែននាក់ដែលគេចពីខ្មែរក្រហម 3) ការកែប្រែរដ្ឋធម្មនុញ្ញមកជារដ្ឋកម្ពុជាត្រៀមបោះឆ្នោតប្រជាធិបតេយ្យសេរីពហុបក្ស 4) ការគាំទ្រទីផ្សារសេរី ចេញពីទីផ្សារផែនការ 5) ការដកកងទ័ពស្ម័គ្រចិត្ត និងជំនាញការវៀតណាមចេញពីកម្ពុជា 6) ការចរចាររឿងព្រំដែន 7)ការបង្កើតទំនាក៎ទំនងថ្មីជាមួយចិន ។ល។ ទំនាក់ទំនងសម្តេចតេជោ និងវៀតណាមមានលក្ខណៈពិសេស និងផ្អែកលើភាពជាក់ស្តែងរកផលចំណេញរៀងៗខ្លួន សិទ្ធស្មើគ្នា ឯករាជ្យដូចគ្នា រួមទាំងការតស៊ូមតិ។ នៅពេលខ្លះវៀតណាមក៏តាមមិនទាន់សម្តេចតេជោអំពីនយោបាយក្នុង និងក្រៅប្រទេស។ មេដឹកនាំវៀតណាមធ្លាប់ថា «លោកហ៊ុនសែន (វៀតណាមហៅម៉ៃហ្វុក) ឆ្លាត រហ័សហើយការចរចារនៅប៉ារីស ការប្តូរនយោបាយ និងការដឹកនាំជាក់ស្តែងគឺលើគាត់ទាំងអស់»។ បច្ចុប្បន្នវៀតណាមកំពុងទោរទន់ទៅលោកខាងលិច ថ្វីត្បិតតែវៀតណាមនៅជាកុម្មុយនិស្ត។ លោកខាងលិចចង់ដកផលិតកម្មចេញពីចិន មកវៀតណាម ហើយវៀតណាមត្រៀមចំណេញលើរឿងនេះខ្លាំង។ ម្យ៉ាងមហាអំណាចខាងលិចកំពុងឡោមព័ទ្ធចិនខាងនយោបាយភូមិសាស្រ្តដោយបង្កើនទំនាក់ទំនងជាមួយវៀតណាម។ ហេតុនេះព្រែកជីកហ្វូណនតេជោធ្វើឱ្យវៀតណាមតវ៉ាជាងធម្មតា។ ជាក់ស្តែងវៀតណាមនឹងខាតបង់ចំណូល ហើយកម្ពុជានឹងចំណេញច្រើន លើការដឹកជញ្ជូនផង និងការទំលាក់លុយវិនិយោគពីចិនផង។ សហគមន៍វៀតណាមតាមបណ្តោយទន្លេមេគង្គដែលធ្លាប់ចំណេញ គាត់ច្បាស់ជាមិនសប្បាយចិត្តហើយ។ ព្រែកជីកនេះគឺកម្ពុជាមិនចូលក្នុងអន្ទាក់បំណុលទេ ដោយវាជាគម្រោង BOT៕អត្ថបទ៖ បណ្ឌិត អេង កុកថាយ 

(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអនុញ្ញាតឱ្យលោកជំទាវ ÜLKÜ KOCAEFE ឯកអគ្គរដ្ឋទូតនៃសាធារណរដ្ឋតួរគី ប្រចាំព្រះរាជាណាចក្រកម្ពុជា ចូលជួបសំដែងការគួរសម និងពិភាក្សាការងារ នៅវិមានព្រឹទ្ធសភា នាព្រឹកថ្ងៃចន្ទ ៦រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹង ថ្ងៃទី២៩ ខែមេសា ឆ្នាំ២០២៤៕

(ភ្នំពេញ)៖​ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃចន្ទ ទី២៩ ខែមេសា ឆ្នាំ២០២៤ នេះ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកផែនការសកម្មភាពឆ្នាំ២០២៤ របស់ក្រុមប្រឹក្សាជាតិដើម្បីស្ត្រី នៅវិមានសន្តិភាព៕

(ភ្នំពេញ)៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងទទួលបានការគាំទ្រដោយអង្គការអន្តរជាតិខាងការងារ (ILO) នឹងរៀបចំពិព័រណ៍ការងារ និងមគ្គទេសន៍អាជីព រយៈពេល២ថ្ងៃជាប់គ្នា គឺនៅថ្ងៃទី ៩-១០ ខែឧសភា ឆ្នាំ២០២៤ នៅទីតាំង អាគារ KAMPUS ជិតស្ពានអាកាសក្បាលថ្នល់។ពិព័រណ៍ការងារ និងមគ្គទេសន៍អាជីព ឆ្នាំ២០២៤ នេះ រំពឹងថានឹងទាក់ទាញយុវជន សិស្ស/និស្សិត និងអ្នកស្វែងរកការងារធ្វើ រាប់ពាន់នាក់មកចូលរួមទស្សនា ស្វែងយល់អំពីទីផ្សារការងារនៅកម្ពុជា និងដាក់ពាក្យសម្ភាសការងារភ្លាមៗជាមួយតំណាងក្រុមហ៊ុន សហគ្រាសធំៗជាច្រើន។ អ្នកចូលរួមក៏អាច ស្វែងយល់អំពីគន្លឹះសំខាន់ៗក្នុងការដាក់ពាក្យស្វែងរកការងារ នៅក្នុងសិក្ខាសាលាចែករំលែកចំណេះដឹងពីវាគ្មិនល្បីជាច្រើនផងដែរ៕

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញជាអធិបតី ពិធីសំណេះសំណាលជាមួយសហជីពសេដ្ឋកិច្ចក្រៅប្រព័ន្ធ និងសមាគមបុគ្គលិកសិក្សា ដើម្បីអបអរសាទរខួបអនុស្សាវីយ៍លើកទី១៣៨ នៃទិវាពលកម្មអន្តរជាតិ ១ ឧសភា ឆ្នាំ២០២៤ នាព្រឹកថ្ងៃទី២៨ ខែមេសា ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ រាជធានីភ្នំពេញ៕