(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកស្រី Meloney C. Lindberg នាយិកាមូលនិធិអាស៊ីប្រចាំកម្ពុជា និងសហការីជាន់ខ្ពស់ ចូលជួបសម្តែងការគួរសម និងពិភាក្សាការងារស្តីពីវឌ្ឍនភាពនៃកិច្ចសហប្រតិបត្តិការរវាងក្រសួងទេសចរណ៍ និងមូលនិធិអាស៊ី ព្រមទាំងការផ្តល់នូវជំនួយបច្ចេកទេសដ៏សំខាន់លើឈ្មោះថា «Cambodia International Visitors' Survey (CIVS)» នាទីស្តីការក្រសួងទេសចរណ៍។ក្នុងជំនួបដ៏សំខាន់នេះ លោកស្រី Meloney C. Lindberg បានគោរពជម្រាបជូនឯកឧត្តមរដ្ឋមន្ត្រី អំពីសកម្មភាព និងកិច្ចសហប្រតិបត្តិការរវាងមូលនិធិអាស៊ី និងក្រសួងទេសចរណ៍នាពេលកន្លងមក ជាពិសេសការគាំទ្រលើការស្រាវជ្រាវ ការកសាងសមត្ថភាព និងការអភិវឌ្ឍវិស័យទេសចរណ៍ប្រកបដោយចីរភាព ព្រមទាំងបានធ្វើបទបង្ហាញអំពីគម្រោង «Cambodia International Visitors' Survey (CIVS)» ដែលមានគោលបំណងសិក្សា និងស្វែងយល់អំពីបទពិសោធន៍ និងកម្រិតនៃការពេញចិត្តរបស់ភ្ញៀវទេសចរអន្តរជាតិ ជាពិសេសទីផ្សារទេសចរណ៍សំខាន់ៗ របស់កម្ពុជា។ តាមរយៈការស្ទង់មតិដោយប្រើប្រាស់បច្ចេកវិទ្យាឌីជីថល នឹងជួយផ្តល់នូវទិន្នន័យសំខាន់ៗ ដូចជារយៈពេលស្នាក់នៅសកម្មភាពដែលភ្ញៀវទេសចរចូលចិត្តការចំណាយ ។ល។ជាមួយគ្នានេះ លោកស្រីបានបន្ថែមថា ទិន្នន័យដែលទទួលបាននឹងជួយឱ្យក្រសួងទេសចរណ៍ និងភាគីពាក់ព័ន្ធអាចតាមដាននិន្នាការទីផ្សារ កំណត់អត្តសញ្ញាណផលិតផល និងសកម្មភាពដែលភ្ញៀវទេសចរពេញនិយម ព្រមទាំងរៀបចំគោលនយោបាយ និងយុទ្ធសាស្ត្រអភិវឌ្ឍវិស័យទេសចរណ៍ឱ្យកាន់តែឆ្លើយតបទៅនឹងតម្រូវការជាក់ស្តែងរបស់ភ្ញៀវទេសចរ។ទន្ទឹមនឹងនេះ ភាគីទាំងពីរ បានឯកភាពគ្នាលើសារៈសំខាន់នៃការប្រើប្រាស់ទិន្នន័យ និងការស្រាវជ្រាវជាមូលដ្ឋានសម្រាប់ការរៀបចំគោលនយោបាយ និងការអភិវឌ្ឍវិស័យទេសចរណ៍កម្ពុជា ព្រមទាំងបានពិភាក្សាស៊ីជម្រៅលើកិច្ចសហការអនុវត្តគម្រោង «Cambodia International Visitors' Survey (CIVS)» ឱ្យទទួលបានប្រសិទ្ធភាពខ្ពស់ តាមរយៈការសម្របសម្រួលយ៉ាងជិតស្និទ្ធរវាងមូលនិធិអាស៊ី និងក្រសួងទេសចរណ៍។ជាកិច្ចឆ្លើយតប ឯកឧត្តមរដ្ឋមន្ត្រី បានកោតសរសើរ វាយតម្លៃខ្ពស់ និងថ្លែងអំណរគុណចំពោះមូលនិធិអាស៊ី ដែលតែងតែជាដៃគូដ៏សំខាន់ និងយូរអង្វែងរបស់រាជរដ្ឋាភិបាលកម្ពុជា និងក្រសួងទេសចរណ៍ ក្នុងការគាំទ្រការអភិវឌ្ឍវិស័យទេសចរណ៍ ក៏ដូចជាការចូលរួមលើកកម្ពស់ និងផ្សព្វផ្សាយបេតិកភណ្ឌវប្បធម៌ និងបេតិកភណ្ឌពិភពលោករបស់កម្ពុជាទៅកាន់សហគមន៍អន្តរជាតិ ព្រមទាំងបានចាត់តាំងក្រុមការងារជំនាញ ធ្វើការសម្របសម្រួល និងសហការយ៉ាងជិតស្និទ្ធជាមួយមូលនិធិអាស៊ីក្នុងការអនុវត្តគម្រោងនេះឱ្យទទួលបានជោគជ័យ និងប្រសិទ្ធភាពខ្ពស់ ដើម្បីអភិវឌ្ឍវិស័យទេសចរណ៍ដែលត្រូវបានចាត់ទុកជាឆ្អឹងខ្នងសេដ្ឋកិច្ចដ៏សំខាន់ ក្រោមការដឹកនាំប្រកបដោយចក្ខុវិស័យរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕

(កំពង់ស្ពឺ)៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារ រាជរដ្ឋាភិបាលចុះមូលដ្ឋានខេត្តកំពង់ស្ពឺ បានជំរុញ និងលើកទឹកចិត្តដល់អាជ្ញាធរខេត្តកំពង់ស្ពឺ ឱ្យបន្តគិតគូរ និងរំលេចបន្ថែមនូវអត្តសញ្ញាណ សក្តានុពល និងលក្ខណៈពិសេសរបស់ខេត្ត ដើម្បីទាក់ទាញចំណាប់អារម្មណ៍ និងជំរុញការអភិវឌ្ឍមូលដ្ឋានឱ្យកាន់តែរីកចម្រើនទ្វេដង។ការថ្លែងបែបនេះ ត្រូវបានធ្វើឡើងក្នុងឱកាសដែលឯកឧត្តមឧបនាយករដ្ឋមន្ត្រី អញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវ «បណ្ណាល័យមរតកក្រមង៉ុយ» ចំនួន ២ទីតាំង ស្ថិតក្នុងស្រុកបសេដ្ឋ ខេត្តកំពង់ស្ពឺ នាព្រឹកថ្ងៃទី២៣ ខែមិថុនា ឆ្នាំ២០២៦។ថ្លែងក្នុងពិធី ឯកឧត្តមឧបនាយករដ្ឋមន្ត្រី បានលើកឡើងពីចំណុចខ្លាំងចម្បងៗមួយចំនួន ដែលជាសក្តានុពលស្នូល របស់ខេត្តកំពង់ស្ពឺ ដោយថ្នាក់ដឹកនាំ និងអាជ្ញាធរពាក់ព័ន្ធត្រូវយកចិត្តទុកដាក់រំលេចបន្ថែម រួមមាន៖- វិស័យទេសចរណ៍ដ៏ទាក់ទាញ៖ ខេត្តកំពង់ស្ពឺមានតំបន់ទេសចរណ៍សរុបចំនួន ២៩កន្លែង ដែលកំពុងពេញនិយម ពិសេសរមណីយដ្ឋានធម្មជាតិល្បីៗដូចជា ភ្នំខ្នងផ្សារ និងឧទ្យានជាតិព្រះមុនីវង្ស «ភ្នំគិរីរម្យ» រួមទាំងការផ្តួចផ្តើមរៀបចំព្រឹត្តិការណ៍ «បុណ្យភ្នំ» ដែលជាមេដែកដ៏សំខាន់ក្នុងការស្រូបទាញភ្ញៀវទេសចរជាតិ និងអន្តរជាតិ។- អត្តសញ្ញាណម្ហូបអាហារ៖ ការលើកស្ទួយអត្តសញ្ញាណវប្បធម៌ និងជីវភាពរស់នៅ តាមរយៈការច្នៃប្រឌិតមុខម្ហូប និងចំណីអាហារឈ្ងុយឆ្ងាញ់ ដែលប្រើប្រាស់វត្ថុធាតុដើមពី ដើមត្នោត និងផ្លែត្នោត ដែលជានិមិត្តរូប ដ៏លេចធ្លោប្រចាំខេត្ត។- កំណើនរោងចក្រ និងសហគ្រាស៖ ការទាញយកអត្ថប្រយោជន៍ពីសក្តានុពលសេដ្ឋកិច្ច ដែលបច្ចុប្បន្នខេត្តមានរោងចក្រ និងសហគ្រាសសរុបរហូតដល់ទៅ ១.៦៤២ មូលដ្ឋាន កំពុងចូលរួមចំណែកយ៉ាងសកម្មក្នុងការបង្កើតការងារ និងបង្កើនចំណូលដល់ប្រជាពលរដ្ឋក្នុងមូលដ្ឋាន។- ការអភិវឌ្ឍមូលធនមនុស្ស៖ អ្វីដែលជាមោទនភាពបំផុតនោះគឺ ខេត្តកំពង់ស្ពឺ ជាទឹកដីកំណើតរបស់ សម្តេចព្រះសង្ឃរាជ ជួន ណាត ដែលជាឥស្សរជនជាន់ខ្ពស់ផ្នែកអក្សរសាស្ត្រជាតិ។ ឈរលើប្រវត្តិសាស្ត្រ ដ៏ត្រចះត្រចង់នេះ ការកសាងធនធានមនុស្ស គឺជាកិច្ចការអាទិភាពដែលត្រូវបន្តជំរុញ។ឯកឧត្តមឧបនាយករដ្ឋមន្ត្រី បានបន្ថែមថា ការសម្ពោធសមិទ្ធផល «បណ្ណាល័យមរតកក្រមង៉ុយ» ទាំង ២ទីតាំងនៅស្រុកបសេដ្ឋនាថ្ងៃនេះ មិនត្រឹមតែជាការអបអរសាទរចំពោះហេដ្ឋារចនាសម្ព័ន្ធរូបវន្តថ្មីប៉ុណ្ណោះទេ ប៉ុន្តែគឺជាសក្ខីភាពមួយបង្ហាញយ៉ាងច្បាស់ពីការប្តេជ្ញាចិត្តក្នុងការបណ្តុះបណ្តាលមូលធនមនុស្ស និងការបន្តវេនថែរក្សាមរតកបញ្ញាញាណរបស់បុព្វបុរសខ្មែរ សម្រាប់កូនចៅជំនាន់ក្រោយ ស្របតាមចក្ខុវិស័យ ក៏ដូចជាការគិតគូរលើវិស័យអាទិភាពរបស់រាជរដ្ឋាភិបាលកម្ពុជា៕

(អន្តរជាតិ)៖ ជំងឺផ្លូវចិត្តបានលេចចេញជាមូលហេតុចម្បងនៃពិការភាពនៅទូទាំងពិភពលោក ដែលលើសពីជំងឺ សរសៃឈាមបេះដូង ជំងឺមហារីក និងជំងឺសាច់ដុំ និងឆ្អឹងជាលើកដំបូង។យោងតាមការវិភាគថ្មីដ៏ទូលំទូលាយមួយពីការសិក្សាអំពីបន្ទុកជំងឺសកលឆ្នាំ ២០២៣ មនុស្សជិត ១.២ ពាន់លាននាក់  ស្ទើរតែទ្វេដងនៃតួលេខពីឆ្នាំ ១៩៩០  ឥឡូវនេះកំពុងរស់នៅជាមួយជំងឺផ្លូវចិត្ត។នៅឆ្នាំ ២០២៣ ស្ថានភាពទាំងនេះមានចំនួនជាង ១៧% នៃឆ្នាំទាំងអស់ដែលរស់នៅជាមួយពិការភាព នៅទូទាំងពិភពលោក និងបានរួមចំណែកដល់អាយុជីវិតដែលកែតម្រូវដោយពិការភាពចំនួន ១៧១ លានឆ្នាំ ដែលជាប់ចំណាត់ថ្នាក់ជាមូលហេតុចម្បងទីប្រាំនៃបន្ទុកជំងឺសរុប។ការកើនឡើងនេះត្រូវបានជំរុញជាចម្បងដោយការកើនឡើងយ៉ាងខ្លាំងនៃជំងឺថប់បារម្ភ និងជំងឺ ធ្លាក់ទឹកចិត្តធ្ងន់ធ្ងរ ជាមួយនឹងការកើនឡើងគួរឱ្យកត់សម្គាល់ បន្ទាប់ពីជំងឺរាតត្បាត COVID-19។អត្រារីករាលដាលនៃការថប់បារម្ភបានកើនឡើងជាង ៤៧% ចាប់តាំងពីឆ្នាំ ២០១៩ ខណៈពេលដែលជំងឺធ្លាក់ទឹកចិត្តធ្ងន់ធ្ងរបានកើនឡើងប្រហែល ២៤%។ បន្ទុកនេះឡើងដល់កម្រិតកំពូល យ៉ាងខ្លាំងនៅវ័យជំទង់ ជាពិសេសក្នុងចំណោមអ្នកដែលមានអាយុពី ១៥-១៩ ឆ្នាំ ដែលជារយៈពេលដ៏ សំខាន់ សម្រាប់ការអប់រំ ទំនាក់ទំនង និងឱកាសនាពេលអនាគត។ស្ត្រីមានចំណែកមិនសមាមាត្រ ដោយមានអ្នករងផលប៉ះពាល់ចំនួន 620 លាននាក់បើប្រៀបធៀប ទៅនឹងបុរសចំនួន 552 លាននាក់ ដែលឆ្លុះបញ្ចាំងពីកត្តាដូចជាការប៉ះពាល់នឹងអំពើហិង្សាកាន់តែច្រើន ការទទួលខុសត្រូវក្នុងការថែទាំ និងវិសមភាពយេនឌ័រ។ការផ្លាស់ប្តូរនេះបង្ហាញពីគម្លាតយ៉ាងជ្រាលជ្រៅនៅក្នុងការឆ្លើយតបសុខភាពផ្លូវចិត្តសកល។ ការគ្របដណ្តប់ការព្យាបាលនៅតែទាបគួរឱ្យព្រួយបារម្ភនៅក្នុងតំបន់ជាច្រើន ជាពិសេសប្រទេសដែលមានប្រាក់ចំណូលទាប និងមធ្យម ជាកន្លែងដែលមនុស្សភាគច្រើនដែលរង ផលប៉ះពាល់ទទួលបានការថែទាំតិចតួច ឬគ្មាន។អ្នកជំនាញអំពាវនាវឱ្យមានការវិនិយោគជាបន្ទាន់ក្នុងការបង្ការ ការពង្រីកសេវាកម្ម និងការដោះស្រាយ កត្តាជំរុញមូលដ្ឋានដូចជាភាពក្រីក្រ ការផ្តាច់ទំនាក់ទំនងសង្គម និងរបួសផ្លូវចិត្ត។ បើគ្មានសកម្មភាពសម្របសម្រួលទេ ការចំណាយលើមនុស្ស និងសេដ្ឋកិច្ចនឹងបន្តកើនឡើង ដែលប៉ះពាល់ ដល់ផលិតភាព គ្រួសារ និងសង្គមគ្រប់ទីកន្លែង៕

(ប៉េកាំង)៖ អាជ្ញាធរចិនបានចាប់ផ្តើមការស៊ើបអង្កេត បន្ទាប់ពីប្រព័ន្ធផ្សព្វផ្សាយក្នុងស្រុកបានរាយការណ៍ថា សារធាតុបង្ករលាកដែលបណ្តាលឱ្យមានកន្ទួលរមាស់ ត្រូវបានគេរកឃើញនៅក្នុងកន្ទបទារក ពីម៉ាកល្បីៗជា ច្រើនរួមទាំង Huggies នេះបើយោងតាមការចុះផ្សាយរបស់អង្គការឃ្លាំមើល ទីផ្សាររបស់ទីក្រុងប៉េកាំងកាលពីថ្ងៃចន្ទ (ថ្ងៃទី 22 ខែមិថុនា)។របាយការណ៍មួយពីសារព័ត៌មានចិន Economic Information Daily កាលពីសប្តាហ៍មុនបាននិយាយថា កន្ទបទារកពី Huggies, Babycare និង Bibabebe បានធ្វើតេស្តវិជ្ជមានចំពោះសារធាតុ formamide ដែលជាសារធាតុពុលដែលអាចបណ្តាលឱ្យវិលមុខផងដែរ។ក្រុមហ៊ុនផលិតខោទឹកនោមកូនក្មេងទាំងបីបាននិយាយនៅក្នុងសេចក្តីថ្លែងការណ៍កាលពី ចុងសប្តាហ៍ថា មិនមានសារធាតុ formamide ត្រូវបានរកឃើញទេ បន្ទាប់ពីការធ្វើតេស្តឡើងវិញរបស់ភាគីទីបី។Huggies បាននិយាយថា ខ្លួនកំពុងចាត់វិធានការផ្លូវច្បាប់លើ "ព័ត៌មានមិនពិត បំភាន់ និងព្យាបាទមួយចំនួន ដែលបំផ្លាញម៉ាកយីហោ"។ការស៊ើបអង្កេតមួយត្រូវបានចាប់ផ្តើមជាមួយអាជ្ញាធរសុខភាពជាតិ រដ្ឋបាលរដ្ឋសម្រាប់បទប្បញ្ញត្តិទីផ្សា ររបស់ប្រទេសចិនបាននិយាយនៅក្នុងសេចក្តីថ្លែងការណ៍របស់ខ្លួន។អង្គការឃ្លាំមើលបាននិយាយថា "ព័ត៌មានពាក់ព័ន្ធនឹងត្រូវបានប្រកាសភ្លាមៗ" ដោយមិនបានបញ្ជាក់ ពេលវេលាសម្រាប់ការស៊ើបអង្កេតនោះទេ។វាមិនច្បាស់ទេថាតើខោទឹកនោមកូនក្មេងជាក់លាក់ដែលត្រូវបានចោទប្រកាន់ថាមានផ្ទុកសារធាតុ formamide ត្រូវបានលក់នៅបរទេសឬអត់។បញ្ហាពាក់ព័ន្ធនឹងកុមារ និងសុវត្ថិភាពអ្នកប្រើប្រាស់ គឺមានភាពរសើបជាពិសេសនៅក្នុងប្រទេសចិន ជាកន្លែង ដែលក្នុងឆ្នាំ ២០០៨ កុមារប្រហែល ៣០០០០០ នាក់បានធ្លាក់ខ្លួនឈឺដោយសារតែម្សៅទឹក ដោះគោ ដែលមានមេរោគ៕

(ភ្នំពេញ)៖ ក្រោយមានការវែកញែករឿងយកត្រីត្រោត មកបន្លំលក់ជាត្រីសាល់ម៉ុន ហាងចរណៃបាន សេចក្តីជូនដំណឹងជាថ្មីម្តងទៀត សូមអភ័យទោសចំពោះកំហុសឆ្គងនានា និងគោរពអរគុណដល់អតិថិជន ទាំងអស់ដែលបានគាំទ្រហាង។ ហាងចរណៃបានសរសេរលើហ្វេសប៊ុកផ្លូវការថា បើមិនមានអ្វីប្រែប្រួលនោះទេ ហាងចរណៃទាំងអស់ នឹងផ្អាកដំណើរការណ៏យ៉ាងយូរត្រឹមថ្ងៃទី ២២ សីហា ២០២៦ តទៅ។ យើងខ្ញុំទុករយៈពេលនេះ ដើម្បីបង្ហើយ ស្តុកដែលមានស្រាប់ ដើម្បីអោយបុគ្គលិកមានពេលវេលាគ្រប់គ្រាន់ទៅរកការងារថ្មីនៅទីតាំងដដែល ឬនៅស្រុកកំណើត និងទុកពេលអោយម្ចាស់ផ្ទះជួលអាចរកអ្នកជួលថ្មីបាន ។ល។ ហាងចរណៃក៏បានបញ្ជាក់ថា ហាងលក់តែត្រីសាម៉ុនអាតាឡង់តិចស្រស់ ដែលចិញ្ចឹមនៅប្រទេសន័រវែស (Norway) ឬ អូស្រ្តាលី និងត្រីត្រោត (trout) ដែលចិញ្ចឹមនៅប្រទេសន័រវែស។ ត្រីត្រោតស្រស់ (Fjord trout) នៅហាងចរណៃ គឺត្រីដែលគេចិញ្ចឹមនៅសមុទ្រទឹកជ្រៅ ក្នុងប្រទេសន័រវែ ហើយអាចហូបឆៅបានយ៉ាងមានសុវត្តិភាព។ យើងខ្ញុំមិនដែលលក់ត្រីត្រោតដែលរស់នៅតាមធម្មជាតិ ហើយក៏មិនដែលលក់ត្រីត្រោតដែលគេចិញ្ចឹមនៅប្រទេសណា ក្រៅពីប្រទេស ន័រវែស នោះដែរ។គួរបញ្ជាក់ថា រឿងត្រីសាល់ម៉ុន និងត្រីត្រោត បានក្លាយជាប្រធានបទក្តៅគគុក នាប៉ុន្មានថ្ងៃមកនេះ ក្រោយសាធារណះជននាំគ្នាវែកញែក។ ហាងចរណៃ ក៏បានបង្ហោះសារមួយដែលសរសេររៀបរាប់ថា ហាងមិនដែលមានចេតនាកេងចំណេញ តាមរយះ ការបន្លំ ប្រភេទត្រី ដែលមានតម្លៃទិញចូលស្ទើរតែ ដូចគ្នានោះទេ។ ចរណៃមិនដែលលក់ត្រីអន់គុណភាព ហើយក៏មិនដែលប្រើវិធីសាស្រ្តណាមួយ ក្នុងចេតនាកេងបន្លំអតិថិជន នោះដែរ។ យើងខ្ញុំតែងតែលក់ត្រីដែលមានគុណភាពខ្ពស់ ស្រស់ៗ រក្សាទុកដាក់បានល្អ មិនស៊ីគីឡូ៕  

(អន្តរជាតិ)៖ លោក Keir Starmer នាយករដ្ឋមន្ត្រី និងជាមេដឹកនាំគណបក្សពលកម្ម នឹងចុះចេញពីតំណែង បន្ទាប់ពីកាន់តំណែងបានត្រឹមតែពីរឆ្នាំប៉ុណ្ណោះ ។ការលាលែងតំណែងរ​បស់លោក Keir Starmer  ធ្វើឱ្យលោកក្លាយជានាយករដ្ឋមន្ត្រីទី 7 ក្នុងរយៈពេល ត្រឹមតែ 10 ឆ្នាំប៉ុណ្ណោះ។ខាងក្រោមនេះជាការវិភាគរហ័សអំពីអ្នកដែលលាលែងពីតំណែងមុនៗ និងមូលហេតុ៖- លោក David Cameron លាលែងតំណែងនៅឆ្នាំ2016 ក្រោយ កាន់តំណែងបាន429 ថ្ងៃលាលែងពីតំណែងបន្ទាប់ពីចាញ់ ការបោះឆ្នោតប្រជាមតិ Brexit។- លោកស្រី Theresa May កាន់តំណែង 1106 ថ្ងៃ បានចុះចេញពីតំណែង នៅឆ្នា2019 ក្រោយពីត្រូវបាន បណ្តេញ ចេញដោយ គណបក្សរបស់លោកស្រី បន្ទាប់ពីបរាជ័យ ក្នុងការអនុម័តកិច្ចព្រមព្រៀង Brexit។- លោក Boris Johnson បានលាលែងតំណែងនៅឆ្នាំ 2022 ក្រោយកាន់តំណែងបាន 1,140ថ្ងៃ ត្រូវបានបង្ខំដោយគណៈរដ្ឋមន្ត្រីរបស់លោក បន្ទាប់ពីរឿងអាស្រូវ "Partygate" គឺជារឿងអាស្រូវនយោបាយ មួយនៅក្នុងចក្រភពអង់គ្លេស អំពីការជួបជុំរបស់បុគ្គលិករដ្ឋាភិបាល និងគណបក្សអភិរក្សនិយម ក្នុងអំឡុង ពេលមានជំងឺរាតត្បាតកូវីដ-១៩ ក្នុងឆ្នាំ ២០២០ និង ២០២១ នៅពេលដែលការរឹតបន្តឹងសុខភាពសាធារណៈ ហាមឃាត់ការជួបជុំភាគច្រើន។- លោកស្រី Liz Truss បានលាលែងពីតំណែងនៅឆ្នាំ 2022  បន្ទាប់ពី ៤៩ ថ្ងៃនៅពេលដែលផែនការ សេដ្ឋកិច្ចរបស់លោកស្រី បានធ្វើឱ្យប្រាក់ផោនធ្លាក់ចុះ។- លោក Rishi Sunak បានលាលែងពីតំណែងនៅឆ្នាំ 2024 បន្ទាប់ពីចាញ់ការបោះឆ្នោតទូទៅយ៉ាង ភ្លូកទឹកភ្លូកដី។- ជាចុងក្រោយគឺលោក Keir Starmer (2026): បានលាលែងពីតំណែងនៅថ្ងៃទី 22 ខែមិថុនា ឆ្នាំ2026បន្ទាប់ពីការធ្លាក់ចុះសេដ្ឋកិច្ច និងការបរាជ័យក្នុងការបោះឆ្នោតក្នុងស្រុក។ហេតុអ្វីបានជារឿងនេះបន្តកើតឡើង? នៅក្នុងប្រព័ន្ធចក្រភពអង់គ្លេស អ្នកបោះឆ្នោតជ្រើសរើស គណបក្សមួយ មិនមែនប្រធានាធិបតីទេ។ ប្រសិនបើនាយករដ្ឋមន្ត្រីក្លាយជាមនុស្សមិនមានប្រជាប្រិយភាព ឬបាត់បង់ការគាំទ្រពីសមាជិកសភា (MPS) របស់ពួកគេ គណបក្សនោះអាច ជំនួសពួកគេដោយស្របច្បាប់ ដោយផ្ទៃក្នុងដោយមិនចាំបាច់បង្កឱ្យមានការបោះឆ្នោតជាតិឡើយ។រួមផ្សំជាមួយនឹងផលវិបាកនៃ Brexit ដែលកំពុងបន្ត ការចំណាយខ្ពស់ក្នុងការរស់នៅ និងសម្ពាធ នយោបាយខ្លាំង មេដឹកនាំគណបក្សកំពុងត្រូវបានបង្ខំឱ្យចាកចេញលឿនជាងពេលណាៗទាំងអស់។មេដឹកនាំអង់គ្លេសភាគច្រើន សុទ្ធតែបានជួបប្រទះនឹងបញ្ហាកំណើនសេដ្ឋកិច្ចទាបជាប់លាប់របស់ ចក្រភពអង់គ្លេស។បន្ទាប់ពីការលាលែងពីតំណែងរបស់លោកនាយករដ្ឋមន្ត្រី Keir Starmer អ្នកនាំមុខគេក្នុងការក្លាយជា នាយករដ្ឋមន្ត្រីចក្រភពអង់គ្លេសបន្ទាប់ និងជាមេដឹកនាំគណបក្សពលកម្មគឺលោក Andy Burnham ដែលជាសមាជិកសភាដែលទើបជាប់ឆ្នោតសម្រាប់តំបន់ Makerfield និងជាអតីតអភិបាលក្រុង Greater Manchester៕

(សង្គម)៖ រឿងលក់ត្រីសាលម៉ុន(Salmon) បន្លំដាក់ត្រីត្រៅត៍(Trout) កំពុងបំផ្លាញទំនុកចិត្តលើទីផ្សារទាំងមូល បន្ទាប់ពីរឿងនាំទុរេនបរទេស បន្លំដាក់ឈ្មោះខ្មែរទើបស្ងាត់។យោងតាមរយៈផេកមួយដែលមានឈ្មោះថា “គំនិត” បានលើកឡើងយ៉ាងដូច្នេះថា៖ រឿងត្រីសាលម៉ុន និងត្រីត្រៅត៍ កំពុងបំផ្លាញទំនុកចិត្តលើទីផ្សារទាំងមូល។ វិបត្តិការយកត្រីត្រៅត៍ មកបន្លំលក់ជាត្រីសាលម៉ុន ពីសំណាក់ហាងលក់សាច់ល្បីៗ មិនមែនជាបញ្ហាបុគ្គលឡើយ ប៉ុន្តែវាបានលាតត្រដាងនូវ «ជំងឺមហារីក» ដ៏គ្រោះថ្នាក់មួយនៅក្នុងទីផ្សារសេរីរបស់កម្ពុជា៖ នោះគឺ ការប្រកួតប្រជែងដោយមិនស្មោះត្រង់ និងបំផ្លាញទំនុចចិត្តអតិថិជន។ វាមិនមែនតែរឿងត្រីនេះមួយនោះទេ រឿងទុរេនបរទេស ដែលបន្លំដាក់ស្លាកខ្មែរ រឿងបន្លែផ្លែឈើ រឿងគ្រឿងអាហាបំប៉នដែលមិនមានការពិនិត្យច្បាស់លាស់ វាកំពុងតែបំផ្លាញទំនុកចិត្តអ្នកប្រើប្រាស់ បំផ្លាញសុខភាព បំផ្លាញអនាគតកម្ពុជា និងទីផ្សារទាំងមូល។នៅក្នុងប្រទេសដែលងាយរងគ្រោះដោយសារតម្លៃ ការបន្លំគុណភាពទំនិញដើម្បីលក់ក្នុងតម្លៃទាប ហើយបន្លំថាជារបស់ល្អ ឬរបស់ថ្លៃ គឺជាល្បែងខុសច្បាប់ដែលធ្វើឱ្យសហគ្រិនមានសុភវិនិច្ឆ័យ និងរកស៊ីត្រឹមត្រូវ ត្រូវស្លាប់មុនគេ។ បើគ្មានទណ្ឌកម្មច្បាប់ និងការត្រួតពិនិត្យដ៏តឹងរ៉ឹងទេ វានឹងបង្កើតជាយុគសម័យអនាធិបតេយ្យនៃអាជីវកម្ម ដែលអ្នករកស៊ីថោកទាបជាអ្នកឈ្នះ ហើយអ្នករកស៊ីស្មោះត្រង់ជាអ្នកចាញ់ ចំណែកឯប្រជាពលរដ្ឋក្លាយជាជនរងគ្រោះទាំងបង់ប្រាក់ និងខូចសុខភាព។ផលប៉ះពាល់ពិតប្រាកដដែលយើងនឹងជួប- សម្លាប់អាជីវកម្មមានសុចរិតភាព: សហគ្រិនដែលនាំចូលត្រីសាល់ម៉ុនពិតប្រាកដ ឬរបស់ផ្សេងៗដែលមានគុណភាព មានថ្លៃដើមខ្ពស់។ នៅពេលអាជីវកម្មខូច យកត្រី ឬផលិតផ្សេងៗដែលមានតម្លៃធូរជាងមកបន្លំលក់ក្នុងតម្លៃទាប ពួកគេកំពុងបង្កើត «អន្ទាក់តម្លៃសិប្បនិម្មិត» ដែលធ្វើឱ្យអតិថិជនយល់ច្រឡំថា អាជីវកម្មដែលលក់ទំនិញពិតប្រាកដជាអ្នកកេងប្រវ័ញ្ចទៅវិញ។ នេះជាការបំផ្លាញលទ្ធភាពប្រកួតប្រជែងរបស់អាជីវកម្មល្អៗទាំងស្រុង។- វិបត្តិទំនុកចិត្តជាប្រព័ន្ធ: ផលវិបាកដ៏ធំបំផុតមិនមែននៅលើត្រីមួយក្បាលនោះទេ គឺនៅលើ «ប្រព័ន្ធ» ទាំងមូល។ នៅពេលរឿងនេះផ្ទុះឡើង អតិថិជននឹងលែងជឿជាក់លើឡាបែល ស្លាកសញ្ញា និងពាក្យសន្យារបស់ផ្សារទំនើបផ្សេងទៀត។ ពួកគេនឹងចាប់ផ្តើមសង្ស័យលើផលិតផលដទៃទៀត ដូចជាសាច់គោ សាច់ជ្រូក គ្រឿងសម្អាង ឬថ្នាំសង្កូវ ដែលបង្កជាផលប៉ះពាល់ដល់សេដ្ឋកិច្ចជាតិទាំងមូល។- មេរៀនពីច្បាប់ប្រកួតប្រជែងសកល: នៅបណ្តាប្រទេសជឿនលឿន ដូចជាសហរដ្ឋអាមេរិក (តាមរយៈ FTC) ឬសិង្ហបុរី (តាមរយៈ CCCS) ការបន្លំឈ្មោះផលិតផល ដើម្បីបង្អាប់ថ្លៃទីផ្សារ ត្រូវចាត់ទុកជាបទឧក្រិដ្ឋសេដ្ឋកិច្ចធ្ងន់ធ្ងរ។ គេមិនត្រឹមតែផាកពិន័យនោះទេ គឺមានយន្តការតម្រូវឱ្យអាជីវកម្មនោះបង់ប្រាក់សំណងទៅកាន់អតិថិជនគ្រប់រូបដែលបានទិញ រហូតដល់ក្ស័យធន ដើម្បីកុំឱ្យអាជីវកម្មដទៃទៀតហ៊ានយកគំរូតាម។*របត់ថ្មីដែលយើងត្រូវរួមគ្នាផ្លាស់ប្តូរ៖ដើម្បីកុំឱ្យទីផ្សារកម្ពុជាធ្លាក់ទៅក្នុងយុគសម័យ «ទំនិញក្លែងក្លាយដេញទំនិញពិត» យើងចាំបាច់ត្រូវមានការអនុវត្តទណ្ឌកម្ម និងការកែទម្រង់ជាបន្ទាន់៖១. យន្តការច្បាប់គំរូ: ស្ថាប័នរដ្ឋពាក់ព័ន្ធ ជាពិសេសអគ្គនាយកដ្ឋាន ក.ប.ប. ត្រូវតែមានចំណាត់ការច្បាប់ជាគំរូដ៏ចាស់ដៃមួយ មិនមែនត្រឹមតែការទទួលលិខិតសុំទោសជាលាយលក្ខណ៍អក្សរ និងការផាកពិន័យលាក់បាំងនោះទេ។ ត្រូវតែមានការប្រកាសទណ្ឌកម្មជាសាធារណៈ ដើម្បីបង្ហាញថា រដ្ឋាភិបាលការពារអាជីវកម្មស្មោះត្រង់ និងមិនអត់ឱនដាច់ខាតចំពោះការបោកប្រាស់អ្នកប្រើប្រាស់។២. ការរួបរួមនៃអាជីវកម្មមានភាពត្រឹមត្រូវ: សហគ្រិន និងអ្នកនាំចូលទំនិញពិតប្រាកដ គួរបង្កើតជាសមាគម ឬបណ្តាញខ្សែច្រវាក់ផ្គត់ផ្គង់ដែលមានស្តង់ដារត្រួតពិនិត្យច្បាស់លាស់ ដើម្បីផ្តល់សញ្ញា ទៅកាន់ទីផ្សារថា ទំនិញរបស់ខ្លួនមានប្រភពត្រឹមត្រូវ ទោះតម្លៃខ្ពស់ជាងបន្តិច ប៉ុន្តែជាគុណភាពពិត។៣. ការអប់រំទីផ្សារ: អាជីវកម្មដែលមានភាពស្មោះត្រង់ ត្រូវតែងាកមកប្រើប្រាស់ការធ្វើទីផ្សារបែបអប់រំ ដូចជាការបង្ហាញពីរបៀបបែងចែកសាច់ត្រីពិត និងក្លែងក្លាយ របៀបមើលប្រភពដើមផលិតផលផ្សេងៗដទៃទៀត ដើម្បីជួយឱ្យអតិថិជនមានអាវុធចំណេះដឹងក្នុងការជ្រើសរើស និងឈប់គាំទ្រអាជីវកម្មដែលភូតភរ។ប្រសិនបើស្ថាប័នរដ្ឋមិនមានចំណាត់ការច្បាប់តឹងរ៉ឹង និងជាគំរូទេ តើលោកអ្នកយល់ថា ទីផ្សារអាជីវកម្មនៅកម្ពុជានឹងទៅជាយ៉ាងណាក្នុងរយៈពេលប៉ុន្មានឆ្នាំខាងមុខ? ហើយក្នុងនាមជាម្ចាស់អាជីវកម្មដែលរកស៊ីត្រឹមត្រូវ និងស្មោះត្រង់តើយើងគួរមានយុទ្ធសាស្ត្រអ្វីខ្លះដើម្បីការពារខ្លួនពី «សង្គ្រាមតម្លៃខុសច្បាប់» បែបនេះ?សូមបញ្ចេញមតិ និងចែករំលែកទស្សនៈ ដើម្បីរួមគ្នាបង្កើតប្រព័ន្ធអេកូឡូស៊ីអាជីវកម្មដ៏ស្អាតស្អំមួយនៅកម្ពុជា៕

(ភ្នំពេញ)៖ ប៊ូសស្រ្តងបង្ហាញទឹកចិត្តល្អ ជួយគ្រួសារភៀសសឹករាប់ពាន់នាក់ ដោយរៀបចំប៊ូហ្វេអាហារឆ្ងាញ់ៗ និងផ្ដល់អំពូលសូឡាសម្រាប់ប្រើប្រាស់ក្នុងជីវភាពប្រចាំថ្ងៃ។ ព្រមទាំងមានសកម្មភាពផ្សេងៗជាច្រើនទៀតដូចជា ប្រដាល់គុនខ្មែរ ពិធីស្រង់ព្រះ និងការប្រកួតអៀវឪពុកឈ្នះម៉ូតូ ដែលធ្វើឡើងក្នុងឱកាសទិវាគុណឪពុក។ ក្នុងឳកាសនោះ លោកគ្រីស តំណាងក្រុមហ៊ុនប៊ូសស្រ្តង បានលើកឡើងនូវសារដាស់តឿនដល់កូនៗថា  ទោះរវល់ការងារច្រើនប៉ុណ្ណា ក៏មិនគួរភ្លេចគ្រួសារ ជាពិសេសឪពុកម្តាយឡើយ។ ការចំណាយពេលជាមួយពួកគាត់ ការបង្ហាញក្ដីស្រលាញ់ និងការដឹងគុណ គឺជារឿងសាមញ្ញៗ ប៉ុន្តែមានតម្លៃយ៉ាងខ្លាំងសម្រាប់គ្រួសារ។ មិនសរសើរមិនបាន ក្រុមហ៊ុនប៊ូសស្រ្តងមានទឹកចិត្តសប្បុរស តែងតែចូលរួមជួយទំនុកបម្រុងជាហូរហែរ និងនៅក្បែរបងប្អូនភៀសសឹកជានិច្ច ចាប់តាំងពីស្ងានភាពតានតឹងនៃជម្លោះព្រំដែន រហូតស្ថានភាពស្ងប់ស្ងាត់ឡើងវិញ។ បងប្អូនគាំទ្រប៊ូសស្រ្តង ដូចគាំទ្រអំពើល្អ! Super Boostrong, Super ជាតិ! 

(អន្តរជាតិ)៖ រលកកំដៅខ្លាំងពីបាតុភូតអែលនីញ៉ូគំរាមកំហែងដល់ការកាត់បន្ថយទិន្នផលកសិកម្ម និងដាក់សម្ពាធយ៉ាងខ្លាំង ទៅលើបណ្តាញអគ្គិសនីនៅក្នុងប្រទេសអាស៊ីជាច្រើន។ នៅសប្តាហ៍នេះ រដ្ឋបាលជាតិមហាសមុទ្រ និងបរិយាកាសសហរដ្ឋអាមេរិក (NOAA) និងទីភ្នាក់ងារអូស្ត្រាលីបានរួមគ្នាព្រមា នអំពីបាតុភូតអែលនីញ៉ូដ៏ខ្លាំងបំផុតមិនធ្លាប់មាន។ អង្គការទាំងនេះបានកត់សម្គាល់ថា បាតុភូតនេះជាធម្មតា បណ្តាលឱ្យមានការរំខាន ដល់អាកាសធាតុ ការកើនឡើងនៃទឹកភ្លៀងនៅអាមេរិក និងគ្រោះរាំងស្ងួតនៅអាស៊ី។របាយការណ៍មួយកាលពីសប្តាហ៍មុនដោយអង្គការអង្គការសហប្រជាជាតិបានបញ្ជាក់ថា បាតុភូតអែលនីណូនៅឆ្នាំ នេះគឺជា «ការវាយប្រហារទ្វេដង» ដល់តំបន់អាស៊ីប៉ាស៊ីហ្វិក ខណៈដែលតំបន់នេះកំពុង តស៊ូជាមួយនឹងការកើនឡើង នៃថ្លៃជី និងថាមពលដោយសារតែជម្លោះនៅមជ្ឈិមបូព៌ា។ប្រទេសថៃគឺជាឧទាហរណ៍ដ៏សំខាន់មួយនៃ វិបត្តិទ្វេភាគីរវាងវិបត្តិអាកាសធាតុ និងការលំបាកផ្នែកសេដ្ឋកិច្ច។ ពួកគេនាំចូលជីអាសូតចំនួន ៥២% របស់ពួកគេពីតំបន់ឈូងសមុទ្រ។ ទន្ទឹមនឹងនេះ ដំណាំស្រូវសំខាន់ៗរបស់ពួកគេ ចេញផ្កានៅខែកញ្ញាដល់ខែវិច្ឆិកា ដែលស្របពេលជាមួយនឹងបាតុភូត អែលនីញ៉ូដ៏អស្ចារ្យ នៅឆ្នាំនេះ ។ នេះមានន័យថា ផលិតកម្មអង្ករថៃ កំពុងប្រឈមមុខនឹងសម្ពាធពីការកើនឡើងនៃថ្លៃដើមវត្ថុធាតុដើម និងផលប៉ះពាល់នៃរលកកំដៅ និងកង្វះខាតទឹក។ស្រដៀងគ្នាទៅនឹងរយៈពេលឆ្នាំ ២០១៥-២០១៦ បាតុភូតអែលនីណូដ៏អស្ចារ្យនៅឆ្នាំនេះគំរាមកំហែងដល់ការកាត់ បន្ថយទិន្នផលដំណាំ និងជំរុញឱ្យតម្លៃស្បៀងអាហារកើនឡើង។ប្រទេសឥណ្ឌូនេស៊ី និងហ្វីលីពីនក៏រងផលប៉ះពាល់ យ៉ាងធ្ងន់ធ្ងរផងដែរ ដែលនាំឱ្យមានការធ្លាក់ចុះនៃអំណាចទិញរបស់គ្រួសារ និងការកើនឡើងនៃអតិផរណា។ នៅក្នុងប្រទេសហ្វីលីពីនតែមួយ អតិផរណាក្នុងខែមេសាបានឈានដល់ ៧,២% ដែលជាកម្រិតខ្ពស់បំផុតក្នុង រយៈពេលបីឆ្នាំ។ លោក Paul Teng អ្នកស្រាវជ្រាវជាន់ខ្ពស់នៅកម្មវិធីប្រែប្រួល អាកាសធាតុអាស៊ីអាគ្នេយ៍នៃវិទ្យាស្ថាន Yusof Ishak (ISEAS ក្នុងប្រទេសសិង្ហបុរី) បាននិយាយថា សូម្បីតែនៅក្នុងតំបន់ដាំដុះស្រូវដែលមានប្រព័ន្ធ ធារាសាស្រ្តក៏ដោយ កសិករនៅតែប្រឈមមុខនឹងកង្វះខាតទឹក ដោយសារតែកម្រិតទឹកធ្លាក់ចុះនៅក្នុងអាងស្តុកទឹក និងប្រព័ន្ធធារាសាស្រ្ត។ លោកបានព្យាករណ៍ថា ទីផ្សារដែលងាយរងគ្រោះដូចជាប្រទេសថៃ ហ្វីលីពីន ឥណ្ឌូនេស៊ី និងកម្ពុជា អាចឃើញផលិតកម្មស្រូវថយចុះពី 2-8% បើប្រៀបធៀបទៅនឹងឆ្នាំមុនៗ ជាមួយនឹងការខាតបង់ក្នុង ស្រុកកាន់តែច្រើនអាស្រ័យលើគំរូអាកាសធាតុក្នុងតំបន់។ប្រេងដូងក៏ជាមូលហេតុនៃការព្រួយបារម្ភផងដែរ ដោយសារប្រទេសឥណ្ឌូនេស៊ី និងម៉ាឡេស៊ីផ្គត់ផ្គង់រហូតដល់ 85% នៃការផ្គត់ផ្គង់ទូទាំងពិភពលោក។ មិនដូចអង្ករទេ ផលប៉ះពាល់លើដើមត្នោតអាចមានអារម្មណ៍បានលុះត្រាតែមាន ផ្លែស្រស់ៗ និងអត្រានៃការទាញយកប្រេងធ្លាក់ចុះ។ យោងតាមការវិភាគពីភ្នាក់ងារអង្គការសហប្រជាជាតិ ប្រទេសនានាក្នុងតំបន់អាងទន្លេមេគង្គ រួមទាំងកម្ពុជា ឡាវ និងវៀតណាម ខណៈពេលដែលរងផលប៉ះពាល់ ដោយការប្រែប្រួលអាកាសធាតុ និងសម្ពាធសេដ្ឋកិច្ច មិនមែនស្ថិតនៅក្នុងក្រុមដែលមានហានិភ័យខ្ពស់បំផុតដូច ប្រទេសថៃ និងឥណ្ឌូនេស៊ីនោះទេ។ រួមជាមួយនឹងតំបន់អាស៊ីអាគ្នេយ៍ ប្រទេសឥណ្ឌាក៏កំពុងប្រឈមមុខនឹង ការគំរាមកំហែងទ្វេដងពីបាតុភូតអែលនីញ៉ូ (El Niño) ផងដែរ។ កំដៅខ្លាំង និងរដូវវស្សាទាបបំផុតក្នុងរយៈពេល ១១ ឆ្នាំ បង្កើនហានិភ័យនៃការថយចុះទិន្នផលដំណាំ និងការកើនឡើងនៃតម្លៃអាហារ។ លើសពីនេះ បាតុភូត អែលនីញ៉ូដ៏អស្ចារ្យអាចបង្កឱ្យមានវិបត្តិថាមពលមួយផ្សេងទៀត ដោយសារកម្រិតទឹកនៅក្នុង អាងស្តុកទឹក វារីអគ្គិសនី ធ្លាក់ចុះយ៉ាងខ្លាំង។ យោងតាមការសិក្សាមួយពីសាកលវិទ្យាល័យ Dartmouth (ជាផ្នែកមួយនៃ Ivy League សហរដ្ឋអាមេរិក) ព្រឹត្តិការណ៍ El Niño ដ៏អស្ចារ្យបំផុតទាំងបីបានកើតឡើងក្នុងឆ្នាំ ១៩៩១-១៩៩២, ១៩៩៧-១៩៩៨ និង ២០១៥-២០១៦ ដែលបណ្តាលឱ្យខូចខាតរាប់ពាន់លានដុល្លារ។ ព្រឹត្តិការណ៍ឆ្នាំ ១៩៩៧-១៩៩៨ តែមួយបានធ្វើឱ្យសេដ្ឋកិច្ចខាតបង់ ៥,៧ ពាន់ពាន់លានដុល្លារ។ ជារួម ក្នុងរយៈពេលមួយសតវត្សរ៍កន្លងមកនេះ ពួកគេប៉ាន់ប្រមាណថា El Niño បានប៉ះពាល់ដល់សេដ្ឋកិច្ចចំនួន ៨៤ ពាន់ពាន់លានដុល្លារ។

(អន្តរជាតិ)៖ ទីភ្នាក់ងារថាមពលអន្តរជាតិ (IEA) ជឿជាក់ថាទីផ្សារនឹងជួបប្រទះនឹងការផ្គត់ផ្គង់លើសកម្រិតគួរឱ្យកត់ សម្គាល់នៅឆ្នាំក្រោយដោយសារតែការបើកច្រកសមុទ្រ Hormuz ឡើងវិញ បន្ទាប់ពីជម្លោះនៅមជ្ឈិមបូព៌ាមានស្ថេរភាព។ប្រធានាធិបតីសហរដ្ឋអាមេរិក និងអ៊ីរ៉ង់ នៅថ្ងៃទី១៧ ខែមិថុនា បានចុះហត្ថលេខាលើកិច្ចព្រមព្រៀងមួយ ដើម្បីបញ្ចប់ជម្លោះរយៈពេលជិតបួនខែ។ លក្ខខណ្ឌទាំងនោះរួមមានការបើកច្រកសមុទ្រហ័រមូសឡើងវិញរបស់អ៊ីរ៉ង់ និងសហរដ្ឋអាមេរិកបញ្ចប់ការបិទផ្លូវកំពង់ផែអ៊ីរ៉ង់នេះអាចបញ្ចប់ការរំខានដល់ការផ្គត់ផ្គង់ប្រេងដ៏ធំបំផុតក្នុងប្រវត្តិសាស្ត្រ។ នៅក្នុងរបាយការណ៍ទីផ្សារខែមិថុនារបស់ខ្លួន ទីភ្នាក់ងារថាមពលអន្តរជាតិ (IEA) បានប៉ាន់ប្រមាណថា ជម្លោះនេះបានធ្វើឱ្យផលិតកម្មប្រេងនៅមជ្ឈិមបូព៌ាខាតបង់ជាង ១៤ លានបារ៉ែលក្នុងមួយថ្ងៃ។ទោះជាយ៉ាងណាក៏ដោយ នៅឆ្នាំក្រោយ ទីផ្សារអាចនឹងជួបប្រទះនឹងការផ្គត់ផ្គង់លើសកម្រិតគួរឱ្យកត់សម្គាល់។ ការផ្គត់ផ្គង់ត្រូវបានគេរំពឹងថានឹងកើនឡើង ៨ លានបារ៉ែលក្នុងមួយថ្ងៃ ខណៈដែលតម្រូវការត្រូវបានគេព្យាករថា នឹងកើនឡើងត្រឹមតែ ២ លានបារ៉ែល។ IEA បានបង្ហាញថា ការផ្គត់ផ្គង់លើសកម្រិតដ៏ច្រើននេះនៅឆ្នាំ ២០២៧ អាច «បង្កើតឱកាសសម្រាប់ប្រទេសនានាក្នុងការបំពេញស្តុកប្រេងដែលអស់ ឬបង្កើតទុនបម្រុងយុទ្ធសាស្ត្រថ្មី ខណៈដែលប្រទេសជាច្រើនកំពុងពិនិត្យឡើងវិញនូវយុទ្ធសាស្ត្រ និងគោលនយោបាយថាមពលរបស់ពួកគេ បន្ទាប់ពីវិបត្តិ»។ ទីភ្នាក់ងារថាមពលអន្តរជាតិ (IEA) បាននិយាយថា ប្រេងដែលឆ្លងកាត់ច្រកសមុទ្រ Hormuz បានស្ទុះងើបឡើងវិញចាប់តាំងពីដើមខែមិថុនា ដោយសារសកម្មភាពផ្ទេរប្រេងនៅឈូងសមុទ្រអូម៉ង់។ ការដឹកជញ្ជូនប្រេងសរុបពីមជ្ឈិមបូព៌ាបានឈានដល់ប្រហែល 12 លានបារ៉ែលក្នុងមួយថ្ងៃ កើនឡើងពីកម្រិតទាបបំផុត 9.6 លានបារ៉ែលដែលបានកត់ត្រាក្នុងខែឧសភា។IEA បានបញ្ជាក់ថា «ប្រសិនបើកិច្ចព្រមព្រៀងនេះត្រូវបានរក្សាទុក ការផលិតប្រេង និងការនាំចេញពីតំបន់ឈូងសមុទ្រ នឹងងើបឡើងវិញបន្តិចម្តងៗ។ ជាពិសេស ការនាំចេញប្រេងរបស់អ៊ីរ៉ង់អាចនឹងងើបឡើងវិញយ៉ាងពេញលេញ បន្ទាប់ពីសហរដ្ឋអាមេរិកលុបចោលការបិទផ្លូវ»។ យ៉ាងណាក៏ដោយ អង្គការនេះក៏បានព្រមានផងដែរថា ទស្សនវិស័យ សម្រាប់ការងើបឡើងវិញនៅមជ្ឈិមបូព៌ានៅតែប្រឈមមុខនឹងឧបសគ្គនយោបាយ និងប្រតិបត្តិការជាច្រើន ដូចជាដំណើរការអូសបន្លាយនៃការបោសសម្អាតមីនជាដើម។ នៅឆ្នាំនេះ ទីភ្នាក់ងារថាមពលអន្តរជាតិ (IEA) នៅតែព្យាករណ៍ថាការផ្គត់ផ្គង់ប្រេងនឹងធ្លាក់ចុះ ៣,៩ លានបារ៉ែលក្នុងមួយថ្ងៃ ដោយការកាត់បន្ថយផលិតកម្មនៅ មជ្ឈិមបូព៌ាមានការកើនឡើងច្រើនជាងនៅអាមេរិក។ នៅប្រទេសរុស្ស៊ី ទីភ្នាក់ងារថាមពលអន្តរជាតិបានរាយការណ៍ថា ការនាំចេញប្រេងឆៅ និងប្រេងឥន្ធនៈចម្រាញ់ក្នុងខែឧសភានៅតែមានស្ថេរភាពប្រហែល ៧,៤ លានបារ៉ែលក្នុងមួយថ្ងៃ ទោះបីជាមានការវាយប្រហារដោយយន្តហោះគ្មានមនុស្សបើករបស់អ៊ុយក្រែនលើរោងចក្រចម្រាញ់ប្រេងក៏ដោយ។ ទោះជាយ៉ាងណាក៏ដោយ ការវាយប្រហារទាំងនេះបានបង្ខំឱ្យទីក្រុងមូស្គូផ្តល់អាទិភាពដល់ការផ្គត់ផ្គង់ ប្រេងឥន្ធនៈក្នុងស្រុក និងជំរុញការនាំចេញប្រេងឆៅ។ តម្លៃប្រេងឆៅបានធ្លាក់ចុះក្នុងរយៈពេលប៉ុន្មានថ្ងៃថ្មីៗនេះ ដោយសារតែការវិវត្តនៅមជ្ឈិមបូព៌ា។

(សុខភាព)៖ វិធីសាស្ត្រមួយដែលរួមបញ្ចូលគ្នារវាងតែបៃតង និងកាហ្វេបានជួយគ្រូពេទ្យឯកទេសខាងអរម៉ូនវិទ្យាជប៉ុន ឱ្យស្រក ទម្ងន់ 25 គីឡូក្រាមក្នុងរយៈពេលជាង 10 ខែ ប៉ុន្តែអ្នកជំនាញណែនាំមិនឱ្យប្រើវិធីសាស្ត្រនេះ សម្រាប់មនុស្សមួយចំនួនទេ។ នៅឆ្នាំ ២០១៥ ដោយទទួលស្គាល់ថាការធ្វើឱ្យអ្នកជំងឺសម្រកទម្ងន់គឺជាបញ្ហាប្រឈម ដ៏គួរឱ្យភ័យខ្លាចមួយ លោកវេជ្ជបណ្ឌិត Kudo Takafumi អ្នកឯកទេសខាងជំងឺទឹកនោមផ្អែមនៅប្រទេសជប៉ុន បានប្រើប្រាស់គ្រឿងផ្សំប្រចាំថ្ងៃដែលធ្លាប់ស្គាល់ ដើម្បីបង្កើត "វិធីសាស្ត្រសម្រកទម្ងន់កាហ្វេ និងតែបៃតង"។បន្ទាប់ពីបានសាកល្បងខ្លួនឯងអស់រយៈពេលជិតមួយឆ្នាំ គាត់បានស្រកទម្ងន់ ៦៧ គីឡូក្រាមពី ៩២ គីឡូក្រាមដំបូងរបស់គាត់ក្នុងរយៈពេលជាង ១០ ខែដោយមិនឡើងទម្ងន់វិញទេ នេះ បើយោងតាមការចុះផ្សាយ របស់ China Press ។គាត់មិនមែនជាមនុស្សតែម្នាក់គត់នោះទេ។ អ្នកជំងឺដែលបានប្រើវិធីសាស្ត្រនេះក៏បានស្រកទម្ងន់ជាមធ្យម 6.2 គីឡូក្រាមក្នុងមួយខែផងដែរ។មនុស្សជាច្រើនមិនចាំបាច់កែសម្រួលរបបអាហារ ឬលំហាត់ប្រាណរបស់ពួកគេទេ។ អរគុណចំពោះភេសជ្ជៈនេះ ខ្លាញ់ពោះរបស់ពួកគេបានថយចុះគួរឱ្យកត់សម្គាល់។ យោងតាមអ្នកជំនាញ អាហារូបត្ថម្ភ ហុងកុង Cheung Chin-pang គន្លឹះនៃវិធីសាស្ត្រនេះស្ថិតនៅលើការប្រើប្រាស់ ការរួមបញ្ចូលគ្នានៃកាហ្វេអ៊ីន កាតេស៊ីននៅក្នុងតែបៃតង និងអាស៊ីតក្លរ៉ូជេនិកនៅក្នុងកាហ្វេ។អាស៊ីត Chlorogenic នៅក្នុងកាហ្វេអាចធ្វើឱ្យអង់ស៊ីម នៅក្នុងរាងកាយសកម្ម ដែលជំរុញការដុតបំផ្លាញជាតិខ្លាញ់។ សារធាតុ Catechins នៅក្នុងតែបៃតងជួយគាំទ្រដល់ការរំលាយអាហារ lipid ដោយបង្កើនល្បឿននៃការបំបែកជាតិខ្លាញ់លើស។ សមាសធាតុទាំងពីរមានប្រសិទ្ធភាពបញ្ចុះទឹកនោម និងបន្សាបជាតិពុល។ប្រសិទ្ធភាពសហការនៃគ្រឿងផ្សំសកម្មទាំងនេះបង្កើនប្រសិទ្ធភាពដុតបំផ្លាញជាតិខ្លាញ់អតិបរមា ខណៈពេលដែលគ្រប់គ្រងកម្រិតជាតិស្ករក្នុងឈាមក្រោយអាហារបានយ៉ាងមានប្រសិទ្ធភាព ជាជម្រើសដ៏ល្អសម្រាប់អ្នក ដែលកំពុងព្យាយាមសម្រកទម្ងន់។ដើម្បីទទួលបានលទ្ធផលល្អបំផុត និងដើម្បីជៀសវាងការថយចុះប្រសិទ្ធភាព អ្នកដែលកំពុងព្យាយាមសម្រកទម្ងន់ត្រូវតែ ប្រើតែ បៃតងគ្មានជាតិស្ករ និងកាហ្វេខ្មៅសុទ្ធ ដោយមិនបន្ថែមស្ករ ទឹកដោះគោ ឬក្រែមឡើយ។ អ្នកអាចទិញតែបៃតង ដបគ្មានជាតិស្ករ ឬប្រើថង់តែជំនួសបាន។ គ្រឿងផ្សំ ៖ តែបៃតង ១៥០ មីលីលីត្រ, កាហ្វេ ១៥០ មីលីលីត្រ។ តែបៃតង និងកាហ្វេត្រូវបានលាយបញ្ចូលគ្នាក្នុងសមាមាត្រ 1:1។ កូរគ្រឿងផ្សំទាំងពីរចូលគ្នាដើម្បីផឹក ឬផឹកដោយឡែកពីគ្នា។ហើយផឹកមួយកែវ (ប្រហែល 250-300 មីលីលីត្រ) មុនពេលអាហារនីមួយៗ។ លើសពីនេះ ការរក្សាទម្លាប់ថ្លឹងទម្ងន់ខ្លួនឯងជារៀងរាល់ព្រឹកនឹងជួយអ្នកតាមដានការផ្លាស់ប្តូរយ៉ាងដិតដល់។ ទម្លាប់ទាំងមូលនេះជួយគ្រប់គ្រងចំណង់អាហារ បង្កើនល្បឿនការរំលាយអាហារជាតិខ្លាញ់ និងធ្វើឱ្យដំណើរសម្រកទម្ងន់កាន់តែងាយស្រួល។វិធីសាស្ត្រនេះត្រូវបានគេចាត់ទុកថាមានប្រសិទ្ធភាពជាពិសេសសម្រាប់ក្រុមមនុស្សបីក្រុមដូចខាងក្រោម៖សម្រាប់មនុស្សដែលមមាញឹក អ្នកដែលញ៉ាំអាហារនៅខាងក្រៅញឹកញាប់ ឬបុគ្គលិកការិយាល័យ វិធីសាស្ត្រនេះមិនតម្រូវឱ្យមានការហាត់ប្រាណ ឬរបបអាហារតឹងរ៉ឹងទេ។ គ្រាន់តែផឹកវាមុនពេលញ៉ាំអាហារ។ ដូច្នេះ វាជាអ្នកសង្គ្រោះជីវិតសម្រាប់អ្នកដែលមិនមានពេលគ្រប់គ្រងអាហារ ឬទៅកន្លែងហាត់ប្រាណ។សម្រាប់អ្នកដែលមានចង្កេះធំ និងខ្លាញ់ពោះការរួមបញ្ចូលគ្នានៃ catechins (តែបៃតង) និងអាស៊ីត chlorogenic (កាហ្វេ) មានឥទ្ធិពលខ្លាំងលើការជំរុញការដុតបំផ្លាញជាតិខ្លាញ់ ជាពិសេសមានប្រសិទ្ធភាពសម្រាប់ខ្លាញ់ពោះ។អ្នកដែលតែងតែមានភាពតានតឹងអាចញ៉ាំច្រើនពេក សារធាតុ theanine នៅក្នុងតែបៃតងជួយបំបាត់ភាពតានតឹង គ្រប់គ្រងចំណង់អាហារ និងកំណត់ការញ៉ាំច្រើនពេកដែលបណ្តាលមកពីការប្រែប្រួលផ្លូវចិត្តប្រកបដោយប្រសិទ្ធភាព។ផ្ទុយទៅវិញ សម្រាប់អ្នកដែលមានប្រព័ន្ធរំលាយអាហារ ខ្សោយ ស្ត្រីមានផ្ទៃពោះ ឬអ្នកជំងឺទឹកនោមផ្អែម ឬជំងឺលើសឈាម វិធីសាស្ត្រនេះអាចបង្កផលផ្ទុយ និងបង្កគ្រោះថ្នាក់ដល់សុខភាពរបស់ពួកគេ។ អ្នកដែលមានរាងកាយសើម-ក្តៅ ងាយនឹងកើតអាស៊ីតក្រពះច្រើន ការផឹកកាហ្វេអាចបណ្តាល ឱ្យច្រាលក្រពះពោះវៀន បានយ៉ាងងាយ ។ អ្នកដែលមានភាពស្លេកស្លាំង ឬងាយប្រតិកម្មនឹងកាហ្វេអ៊ីនក៏គួរតែប្រុងប្រយ័ត្នខ្ពស់ផងដែរ។អ្នកជំងឺទឹកនោមផ្អែម និងជំងឺលើសឈាម អ្នកជំងឺទឹកនោមផ្អែមគួរតែប្តូរទៅផឹកកាហ្វេដែលគ្មានជាតិកាហ្វេអ៊ីន។ ទន្ទឹមនឹងនេះ អ្នកដែលមាន ជំងឺលើសឈាម គួរតែជៀសវាងការផឹកកាហ្វេភ្លាមៗបន្ទាប់ពីភ្ញាក់ពីគេងនៅពេលព្រឹក ដើម្បីការពារការកើនឡើងសម្ពាធឈាមភ្លាមៗ។ ស្ត្រីមានផ្ទៃពោះ កុំផឹកកាហ្វេលាយតែបៃតងនេះលើសពី ២ពែងក្នុងមួយថ្ងៃ។ ការប្រើប្រាស់លើសកម្រិតនេះអាចបង្កើនហានិភ័យនៃការរលូតកូន ការកើតមិនគ្រប់ខែ។

(សុខភាព)៖ ថ្មីៗរឿងអាស្រូវក្នុងបណ្ដាញសង្គមពាក់ព័ន្ធនឹងអតិថិជនជាច្រើនចូលចិត្តទទួលត្រីសាលម៉ុនបាស៊ីហ្វិក គោលដៅទិញត្រីសាលម៉ុន ប៉ុន្តែបែរជាបានត្រីត្រោតអស់រយៈពេលជាច្រើនឆ្នាំទើបបែកធ្លាយ ដែលបង្កឱ្យមានការខកចិត្ត និងខឹងសម្បារជាខ្លាំង។ យ៉ាងណាមិញ ចំពោះអតិថិជនភាគច្រើនដែលបានទទួលត្រី «ត្រីត្រោត» ឆៅដែលមិនស្គាល់ប្រភពអស់រយៈពេលយូរ គួរពិចារណាទៅពិនិត្យសុខភាពចេញ ដើម្បីស្វែងរកមេរោគ និងពពួកបាក់តេរីក្នុងរាងកាយ។ ការញ៉ាំត្រីត្រោតឆៅដែលមិនបានឆ្លងកាត់ការត្រួតពិនិត្យ ឬការបង្កកសម្លាប់មេរោគត្រឹមត្រូវ (Sashimi Grade) ក្នុងរយៈពេលយូរ អាចបង្កផលប៉ះពាល់ និងគ្រោះថ្នាក់ខ្លាំងមែនទែនដល់សុខភាពរាងកាយ។ ហានិភ័យចម្បងៗដែលនឹងកើតមានឡើងចំពោះរាងកាយរួមមាន៖ការកកើត និងញាស់កូនចៅនៃ «ព្រូនខ្សែញួរទឹកសាប» នេះជាផលប៉ះពាល់ធ្ងន់ធ្ងរ និងញឹកញាប់បំផុតពីការញ៉ាំត្រីទឹកសាបឆៅ។ ព្រូនប្រភេទ *Diphyllobothrium latum* អាចចូលទៅរស់នៅក្នុងពោះវៀនមនុស្ស ហើយវាអាចលូតលាស់រហូតដល់ប្រវែង ៩ ទៅ ១៥ ម៉ែត្រ នៅក្នុងពោះវៀនរបស់អ្នក ហើយវានឹងចេញរោគសញ្ញារយៈពេលវែងដូចជាធ្វើឱ្យហើមពោះ ឈឺពោះរមួលៗជារឿយៗ ចង្អោរ ស្រកទម្ងន់ខុសធម្មតា និងមានអារម្មណ៍អស់កម្លាំងល្ហិតល្ហៃជានិច្ច។វិបត្តិខ្វះឈាមស្រួចស្រាល់ និងប្រព័ន្ធប្រសាទ (Vitamin B12 Deficiency) ពពួកព្រូនខ្សែញួរដែលរស់នៅក្នុងពោះវៀនវាមិនមែនគ្រាន់តែរស់នៅធម្មតានោះទេ ប៉ុន្តែវាមានសមត្ថភាព ជញ្ជក់យកវីតាមីន B12 ពីអាហារដែលអ្នកញ៉ាំស្ទើរតែទាំងអស់ (វាអាចស្រូបយក B12 រហូតដល់ ៨០% ទៅ ១០០%)។ ពេលរាងកាយខ្វះវីតាមីន B12 រយៈពេលយូរ វានឹងបង្កជាជំងឺខ្វះឈាម ដែលធ្វើឱ្យប៉ះពាល់ដល់ប្រព័ន្ធប្រសាទ ដូចជាមានអារម្មណ៍ស្រពាប់ស្រពោន ស្ពឹកដៃជើង វង្វេងវង្វាន់ និងខ្សោយការចងចាំ។ការរលាក និងខូចខាតផ្លូវអាហាររ៉ាំរ៉ៃ ការរស់នៅជាមួយបាក់តេរីកាចៗ (ដូចជា *Aeromonas* ឬ *Listeria*) និងពងព្រូននៅក្នុងក្រពះពោះវៀនរយៈពេលយូរ អាចធ្វើឱ្ស ភ្នាសពោះវៀនរងការរលាករ៉ាំរ៉ៃ បង្កជាបញ្ហារាករូសរ៉ាំរ៉ៃ ឬទល់លាមកផ្លាស់ប្តូរគ្នា ដែលធ្វើឱ្យប្រព័ន្ធស្រូបសារធាតុចិញ្ចឹមរបស់រាងកាយចុះខ្សោយខ្លាំង។ក្នុងករណីខ្លះ កូនព្រូនតូចៗ ឬបាក់តេរីអាចធ្លាយចេញពីជញ្ជាំងពោះវៀន រួចធ្វើដំណើរតាមចរន្តឈាមទៅកាន់សរីរាង្គផ្សេងទៀតដូចជា ថ្លើម៖ អាចបង្កជាបូសថ្លើម ឬរលាកថ្លើម សួត និងខួរក្បាល ទោះបីជាកម្រតែក៏អាចកើតមានឡើង ដែលវាបង្កគ្រោះថ្នាក់ដល់ជីវិត ប្រសិនបើកូនព្រូនទៅបង្កើតជាគីសនៅក្នុងខួរក្បាល។ប្រសិនបើការញ៉ាំត្រីឆៅដែលគ្មានសុវត្ថិភាពម្ដងម្កាល អាចបង្កត្រឹមការពុលអាហារភ្លាមៗ (ក្អួត រាក អស់កម្លាំង) ប៉ុន្តែ ការញ៉ាំរយៈពេលយូរ គឺស្មើនឹងការចិញ្ចឹមព្រូន និងមេរោគនៅក្នុងខ្លួន ដែលវានឹងបំផ្លាញសុខភាពរបស់អ្នកបន្តិចម្តងៗពីខាងក្នុង។ ប្រសិនបើអ្នកធ្លាប់បានញ៉ាំត្រីត្រោតឆៅដែលមិនច្បាស់លាស់បែបនេះអស់រយៈពេលយូរមកហើយ ហើយមានរោគសញ្ញាដូចជា ស្រកទម្ងន់ខុសធម្មតាវិលមុខអស់កម្លាំង ឬស្លេកស្លាំង អ្នកគួរតែទៅជួបវេជ្ជបណ្ឌិត ដើម្បីពិនិត្យឈាម និងពិនិត្យលាមករកពងព្រូន ហើយ លេបថ្នាំទម្លាក់ព្រូន តាមវេជ្ជបញ្ជា។ ទោះបីជាយ៉ាងណា ត្រីត្រោតដែលដាក់លក់បន្លំថាជាត្រីសាល់ម៉ុនត្រូវបានមនុស្សភាគច្រើនទទួលទានចូលរាងកាយ អស់រយៈពេលជាយូរមកហើយមិនអាចប្រកែកបានឡើយ ហើយនេះជាមេរៀន និងបទពិសោធ៍ដ៏ធំសម្រាប់ មនុស្សគ្រប់រូបត្រូវបង្កើនការប្រុងប្រយ័ត្នក្នុងការទិញ ស្វែងរកហាងលក់ ឬផ្គត់ផ្គង់ណាមួយដែលគួរឱ្យទុកចិត្តបានបំផុត។ ចំណែក ម្ចាស់អាជីវកម្មទាំងឡាយត្រូវប្រកាន់ភាពស្មោះត្រង់ លក់ដូរសុច្ចរិត លក់ត្រីត្រោតប្រាប់ថា ត្រោត លក់ត្រីសាល់មុនប្រាប់ថា សាល់ម៉ុនពិត កុំក្លែងបន្លំដាច់ខាត មិនត្រឹមតែប៉ុណ្ណោះប្រសិនបើលក់ត្រីត្រោត គឺជាត្រីដែលមានគុណភាពខ្ពស់ត្រូវឆ្លងកាត់ការត្រួតពិនិត្យដែលបញ្ជាក់ថា ត្រីត្រោតនេះមានសុវត្ថិភាពទទួលទានឆៅ បាន១០០ភាគរយ ចៀសវាងកេរ្តិ៍ឈ្មោះដែលអ្នកខំកសាងមករាប់សិបឆ្នាំមានអតិថិជនរាប៉ម៉ឺននាក់ទូទាំងប្រទេសគាំទ្រ ត្រូវរលាយបាត់ត្រឹមមួយពព្រឹចភ្នែកដូចជាករណីហាង «ចរណៃ» ដែលកំពុងល្បីក្នុងបណ្ដាញសង្គមនាពេលបច្ចុប្បន្ននេះ។

(ភ្នំពេញ)៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយ ស.ស.យ.ក នៃវិស័យការងារ សន្តិសុខសង្គម និងវិជ្ជាជីវៈ ព្រមទាំងសាកលវិទ្យាល័យជាតិគ្រប់គ្រង (NUM) នឹងរៀបចំវេទិកាការងារ និងឱកាសកម្មសិក្សាការងារ នៅថ្ងៃទី២៦ ខែមិថុនា ខាងមុខនេះ ដោយនាំយកឱកាសការងារសរុបចំនួន ៤,១២២ កន្លែង ដើម្បីផ្ដល់ជូនដល់យុវជន សិស្ស និស្សិត និងអ្នកកំពុងស្វែងរកការងារ។កម្មវិធីនេះនឹងប្រព្រឹត្តទៅនៅក្នុងបរិវេណសាកលវិទ្យាល័យជាតិគ្រប់គ្រង ចាប់ពីម៉ោង ៨:០០ ព្រឹក រហូតដល់ម៉ោង ៥:០០ល្ងាច។ អ្នកចូលរួមនឹងមានឱកាសដាក់ពាក្យស្នើសុំការងារ និងកម្មសិក្សាការងារ ព្រមទាំងសម្ភាសន៍ដោយផ្ទាល់ជាមួយក្រុមហ៊ុនធំៗជាច្រើនដែលចូលរួមតាំងបង្ហាញឱកាសការងារ។លោក ស៊ុន មេសា អ្នកនាំពាក្យនៃក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា៖«វេទិកាការងារ និងឱកាសកម្មសិក្សាការងារនេះ គឺជាឱកាសដ៏ល្អសម្រាប់យុវជន និងអ្នកស្វែងរកការងារ ក្នុងការជួបផ្ទាល់ជាមួយនិយោជក ស្វែងយល់ពីតម្រូវការទីផ្សារការងារ និងដាក់ពាក្យសម្ភាសន៍ភ្លាមៗ ដើម្បីបង្កើនឱកាសទទួលបានការងារសមរម្យ»។លោកបានបន្ថែមថា វេទិកានេះក៏ជាផ្នែកមួយក្នុងការសម្របសម្រួល និងភ្ជាប់ទំនាក់ទំនងរវាងនិយោជក និងអ្នកស្វែងរកការងារ ដើម្បីឆ្លើយតបទៅនឹងតម្រូវការកម្លាំងពលកម្មរបស់ទីផ្សារការងារបច្ចុប្បន្ន។យុវជន សិស្ស និស្សិត និងសាធារណជនដែលមានចំណាប់អារម្មណ៍ អាចចូលរួមដោយសេរី និងទាក់ទងសាកសួរព័ត៌មានបន្ថែមតាមរយៈលេខទូរស័ព្ទ ០៧៧ ២៣២ ៣៧៨ និងតេលេក្រាម ០១៦ ៧៨៦ ៦៥៥ ឬតាមរយៈគេ nea.gov.kh និងទំព័រ Facebook NEA Khmer។

(ជប៉ុន)៖ វប្បធម៌ខ្មែរបានក្លាយជាចំណុចសំខាន់នៅសាកលវិទ្យាល័យ Ritsumeikan Asia Pacific University (APU) ខណៈដែលកម្មវិធី «សប្តាហ៍កម្ពុជា ២០២៦» (Cambodian Week 2026) បានរៀបចំឡើងយ៉ាងអស្ចារ្យ និងទទួលបានជោគជ័យយ៉ាងត្រចះត្រចង់ តាមរយៈការសម្តែងសិល្បៈប្រពៃណី ម្ហូបអាហារខ្មែរ ល្បែងប្រជាប្រិយ និងកម្មវិធី Grand Show ព្រឹត្តិការណ៍នេះបានធ្វើឱ្យអ្នកចូលរួម បានស្វែងយល់ និងទទួលស្គាល់ពីសម្រស់នៃវប្បធម៌ អរិយធម៌ និងអត្តសញ្ញាណជាតិខ្មែរ។កម្មវិធីឆ្នាំនេះមានអត្ថន័យយ៉ាងខ្លាំង បន្ទាប់ពីអវត្តមានអស់រយៈពេល ៨ ឆ្នាំ។ អ្វីដែលគួរឱ្យកោតសរសើរ សហគមន៍និស្សិតខ្មែរ មានចំនួនត្រឹម ២០នាក់ប៉ុណ្ណោះ បានប្តេជ្ញាចិត្ត និងដឹកនាំប្រកបដោយចក្ខុវិស័យ ក្នុងការប្រមូលផ្តុំសមាជិកគណៈកម្មការ និងអ្នកស្ម័គ្រចិត្តជាង ១២០ នាក់ មកពីជាង ១៣ ប្រទេស ដើម្បីរួមគ្នាបង្កើតព្រឹត្តិការណ៍ដ៏អស្ចារ្យនេះឱ្យក្លាយជាការពិត។ ក្រុមការងារបានត្រៀមអស់រយៈពេលជាងមួយឆ្នាំកន្លះ ដោយការយកចិត្តទុកដាក់គ្រប់ផ្នែកទាំងអស់ ដើម្បីធានាថាវប្បធម៌ខ្មែរត្រូវបានបង្ហាញយ៉ាងត្រឹមត្រូវ និងស្រស់ស្អាតបំផុត។កម្មវិធីបានចាប់ផ្តើមជាផ្លូវការនៅ រសៀលថ្ងៃចន្ទ ទី១៥ ខែមិថុនា ឆ្នាំ២០២៦ជាមួយនឹងក្បួនដង្ហែវប្បធម៌ដ៏រស់រវើក។ ការសម្តែងរបាំត្រុដិ និងរបាំគោះត្រឡោក ព្រមទាំងរបាំកម្សាន្តផ្សេងៗទៀត បានធ្វើឱ្យបរិវេណសាកលវិទ្យាល័យពោរពេញដោយភាពរីករាយ។ នៅថ្ងៃអង្គារ និងថ្ងៃព្រហស្បតិ៍ អ្នកចូលរួមមានឱកាសស្វែងយល់ពីរសជាតិម្ហូបខ្មែរ នៃសម្លការីនំបញ្ចុក ដែលម្ហូបនេះមានការគាំទ្រ និងការចាប់អារម្មណ៍យ៉ាងខ្លាំង។ ព្រមទាំងមានការលែងល្បែងប្រជាប្រិយខ្មែរដូចជា ទាញព្រ័ត្រ កូនកំលោះកូនក្រមុំ ចាប់ស្លឹកឈើ និងលាក់កន្សែង ដែលបានទាក់ទាញអ្នកចូលរួមជាច្រើនផងដែរ។ សកម្មភាពទាំងនេះបានបង្កើតបរិយាកាសនៃភាពសប្បាយរីករាយ មិត្តភាព និងការយល់ដឹងកាន់តែស៊ីជម្រៅអំពីវប្បធម៌ខ្មែរ។ចំណុចសំខាន់នៃកម្មវិធី «សប្តាហ៍កម្ពុជា ២០២៦» គឺកម្មវិធី Grand Show ដែលបានប្រព្រឹត្តទៅនៅថ្ងៃសុក្រ ទី១៩ ខែមិថុនា។ កម្មវិធីនេះត្រូវបានរៀបចំនៅក្នុងសាល ដែលមានចំណុះ ២០០កៅអី និងទទួលបានការចាប់អារម្មណ៍យ៉ាងខ្លាំងពីសំណាក់ទស្សនិកជនដែលមកទស្សនាដោយផ្ទាល់។ការសម្តែងដ៏លេចធ្លោនៃរឿងព្រេង «ព្រះថោងនាងនាគ» ដែលជានិមិត្តរូបនៃប្រភពកំណើតជាតិខ្មែរ បាននាំអារម្មណ៍ទស្សនិកជនធ្វើដំណើរឆ្លងកាត់រឿងរ៉ាវដ៏សំខាន់មួយនៃប្រវត្តិសាស្ត្រខ្មែរ។ ក្រៅពីនេះ កម្មវិធីក៏មានការសម្តែងរបាំជូនពរ របាំនេសាទ ការបង្ហាញសម្លៀកបំពាក់តំណាងឱ្យយុគសម័យសំខាន់ៗចំនួន ៧ នៃប្រវត្តិសាស្ត្រកម្ពុជា ដែលបានបង្ហាញពីជីវភាពរស់នៅ ប្រពៃណី និងទំនៀមទម្លាប់របស់ប្រជាជនខ្មែរ។ លោកស្រី សួន អេរីសា និស្សិតឆ្នាំទី៣ ជំនាញទំនាក់ទំនងអន្តរជាតិ នៃសាកលវិទ្យាល័យ Ritsumeikan Asia Pacific University (APU) ប្រធានគណៈកម្មការរៀបចំកម្មវិធីនេះ មានប្រសាសន៍ថា៖ «ការនាំយកកម្មវិធី «សប្តាហ៍កម្ពុជា ២០២៦» ត្រឡប់មកវិញក្រោយអវត្តមាន ៨ ឆ្នាំ មិនមែនជារឿងងាយស្រួលនោះទេ។ ប៉ុន្តែយើងជឿជាក់ថា កម្ពុជាសមនឹងទទួលបានឱកាសក្នុងការបង្ហាញអត្តសញ្ញាណ និងវប្បធម៌របស់ខ្លួននៅលើឆាកអន្តរជាតិម្តងទៀត។»ភាពជោគជ័យនេះ មិនត្រឹមតែជាជោគជ័យរបស់និស្សិតខ្មែរនៅ APU ប៉ុណ្ណោះទេ ប៉ុន្តែជាជោគជ័យរួមរបស់និស្សិតអន្តរជាតិជាង ១២០នាក់ ដែលបានរួមគ្នាបង្កើតស្ពាននៃការយល់ដឹង និងមិត្តភាពតាមរយៈវប្បធម៌។ ក្រោយការបាត់វត្តមានរយៈពេល ៨ឆ្នាំ កម្មវិធី «សប្តាហ៍កម្ពុជា ២០២៦» បានវិលត្រឡប់មកវិញយ៉ាងអស្ចារ្យ ដែលបង្ហាញឱ្យពិភពលោកឃើញថា ទោះបីជាសហគមន៍ខ្មែរមានទំហំតូចក៏ដោយ ក៏អាចបង្កើតសមិទ្ធផលដ៏ធំធេង និងបន្សល់ទុកនូវមោទនភាពជាតិដ៏អស្ចារ្យបានដែរ៕

(ភ្នំពេញ)៖ ផ្ទុះការរិះគន់ជាថ្មីម្ដងទៀតពីមហាជនរឿង «ធ្វើផ្លូវរួច ទើបដាក់លូ» បន្ទាប់ពី វិថីថ្មីស្រឡាងលេខ៩៣ ឬផ្លូវរថភ្លើងចាស់ ស្ថិតក្នុងសង្កាត់ឫស្សីកែវ ខណ្ឌឫស្សីកែវ​ រាជធានីភ្នំពេញ ទើបតែធ្វើរួចមិនទាន់បាត់ធំក្លិនបេតុងផង ពេលនេះត្រូវបានជីកកាយខ្ទេចមួយចំហៀងផ្លូវ ដើម្បីដាក់ប្រព័ន្ធលូបង្ហូរ។មហាជនបានលើកឡើងថា ការដែលធ្វើផ្លូវរួច ទើបជីកផ្លូវដាក់លូតាមក្រោយនេះ គឺជាការខ្ជះខ្ជាយថវិការជាតិជាខ្លាំង។យ៉ាងណាមិញ មហាជនសង្ឃឹមថា លើកក្រោយរាល់គម្រោងផ្លូវនឹងបន្ស៊ីគ្នាជាមួយគម្រោងប្រព័ន្ធលូ ដើម្បីជាការជួយសន្សំថវិកាជាតិមួយផ្នែក និងមិនរំខានដល់ប្រជាពលរដ្ឋច្រើនដង ដែលរស់នៅ ប្រកបរបរ និងធ្វើដំណើរ៕