ក្រុមគ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី ចុះ​ពិនិត្យ ព្យាបាល​ជំងឺ និង​ផ្តល់​ថ្នាំពេទ្យ ជូន​ប្រជាពលរដ្ឋ​ដោយ​ឥតគិតថ្លៃ​ជិត ៤០០០​នាក់ នៅ​ស្រុក​បរសេដ្ឋ ខេត្តកំពង់ស្ពឺ

(​ខេត្តកំពង់ស្ពឺ​)៖ កាលពី​ថ្ងៃអាទិត្យ ទី​០៥ ខែឧសភា ឆ្នាំ​២០១៩ ក្រុមការងារ​គ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី ចំនួន ៣១៥ នាក់ បាន​ចុះ​ពិនិត្យ ព្យាបាល​ជំងឺ និង​ផ្តល់​អំណោយ​ថ្នាំពេទ្យ ជូន​ប្រជាពលរដ្ឋ​ឥតគិតថ្លៃ ចំនួន ៣៩៨៩ នាក់ ក្នុងនោះ មាន​ស្ត្រី ២៣៩៣ នាក់ នៅ​វត្ត​ធម្ម​មង្គល ភូមិ​តា​ធម្ម ឃុំ​ភា​រី​មានជ័យ ស្រុក​បរសេដ្ឋ ខេត្តកំពង់ស្ពឺ​។​

​របាយការណ៍​បង្ហាញថា ក្នុងចំណោម​ប្រជាពលរដ្ឋ ជា​អ្នកជំងឺ​សរុប ៣៩៨៩​នាក់ ដែល​បានមក​ពិនិត្យ ព្យាបាល និង​ទទួល​ថ្នាំ​ពី​ក្រុមគ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី គឺមាន​ស្ត្រី​ចំនួន ២៣៩៣​នាក់ ដោយ​ប្រភេទ​ជំងឺ​ចំនួន ១៥​មុខ រួមមាន​៖ ជំងឺ​កុមារ ជំងឺ​ស្ត្រី ជំងឺផ្លូវចិត្ត ជំងឺ​ឫសដូងបាត ជំងឺ​សន្លាក់ឆ្អឹង ជំងឺ​រលាក​សួត ជំងឺ​ត្រចៀក ច្រមុះ បំពង់ក ជំងឺ​ភ្នែក ជំងឺ​សើរ​ស្បែក ជំងឺ​ទឹកនោមផ្អែម ជំងឺ​មាត់​ធ្មេញ អេកូ​សាស្ត្រ ព្យាបាល​របួស និង​វះកាត់​តូច ជំងឺ​ទូទៅ និង​វិភាគឈាម បន្ទប់ពិសោធន៍​។​

​សូម​រម្លឹកថា ក្រុមការងារ​គ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី បាន​ចំណាយ​កម្លាំងកាយ​ចិត្ត និង​ពេលវេលា ក្នុងការ​ចុះជួយ​ពិនិត្យ និង​ព្យាបាល​ជំងឺ ជូន​ប្រជាពលរដ្ឋ​ដោយ​ឥតគិតថ្លៃ ដោយមាន​ផ្តល់​អំណោយ​ថ្នាំពេទ្យ​ផង ជូន​ដល់​ប្រជាពលរដ្ឋ ក្នុង​ខេត្ត​កែប កាលពី​ថ្ងៃអាទិត្យ ទី​២៨ ខែមេសា ឆ្នាំ​២០១៩ ដោយមាន​អ្នកជំងឺ​មក​ទទួល​សេវា​សរុប ចំនួន ២៩៨៩ នាក់ ក្នុងនោះ ស្ត្រី​មាន​ចំនួន ២០៦២ នាក់​។​

​សកម្មភាព​ពិនិត្យ និង​ព្យាបាល​ជំងឺ​ដោយ​ឥតគិតថ្លៃ​របស់​ក្រុមគ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី ជា​បេសកកម្ម​ប្រកបដោយ​ឆន្ទៈ​ស្រួចស្រាល និង​បង្ហាញ​ពី​ស្មារតី​ដ៏​ផូរផង់ សម្រាប់​ជា​គំរូ​ដល់​យុវជន​ជំនាន់​ក្រោយ ក្នុងការ​អភិវឌ្ឍ​ប្រទេសជាតិ ក្នុង​វិស័យ​សុខាភិបាល ដោយ​មិន​ប្រកាន់​បក្សពួក សាសនា ឬ​ពី​និន្នាការ​នយោបាយ​ណាមួយ​ឡើយ​។ សកម្មភាព​នេះ ក៏​សំដៅ​ចូលរួម​កាត់បន្ថយ​ភាពក្រីក្រ​របស់​ប្រជាពលរដ្ឋ​មួយចំណែក​ផងដែរ ស្របទៅតាម​គោលដៅ​ដើម្បី​អភិវឌ្ឍន៍​ប្រកបដោយ​ចីរភាព​របស់​រាជរដ្ឋាភិបាល​កម្ពុជា​។​

​ជាការ​កត់សម្គាល់ថា ក្រុមការងារ​គ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី ដែល​សុទ្ធតែជា​វេជ្ជបណ្ឌិត​ជំនាញៗ មកពី​ក្រៅប្រទេស និង​ក្នុងប្រទេស ធ្វើការ​នៅតាម​មន្ទីរពេទ្យ​រដ្ឋ និង​ឯកជន មានបទពិសោធន៍​យូរ​ឆ្នាំ បាន​ចុះទៅពិនិត្យ និង​ព្យាបាល​ជំងឺ​ដោយ​ឥតគិតថ្លៃ ជូន​ប្រជាពលរដ្ឋ នៅ​រៀងរាល់​ថ្ងៃអាទិត្យ តាម​បណ្តា​ខេត្ត​នានា​។

​ការពិគ្រោះ ពិនិត្យ និង​ព្យាបាល​ជំងឺ​របស់​ក្រុមគ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី រួមមាន​៖ ជំងឺ​ទូទៅ ជំងឺផ្លូវចិត្ត ជំងឺ​ទូទៅ​ផ្នែក​កុមារ ជំងឺ​រោគ​ស្ត្រី ជំងឺ​ឫសដូងបាត ជំងឺ​សួត ក្រពះ ពោះវៀន ជំងឺ​ផ្លូវដង្ហើម ជំងឺ​ប្រដាប់​រំលាយ​អាហារ ជំងឺ​សើ​ស្បែក ជំងឺ​ព្រូន ជំងឺ​ស្លេកស្លាំង ជំងឺ​សន្លាក់ឆ្អឹង ជំងឺ​រលាក​ថ្លើម ជំងឺ​កាមរោគ ជំងឺគ្រុនចាញ់ ជំងឺគ្រុនឈាម ជំងឺ​ភ្នែក សុខភាព​មាត់​ធ្មេញ ជំងឺ​ទឹកនោមផ្អែម ជំងឺ​បេះដូង លើសឈាម ជំងឺ​ត្រចៀក ច្រមុះ បំពង់ក ជំងឺ​តម្រង់​នោម អេកូ​សាស្ត្រ ព្យាបាល​របួស និង​វះកាត់​តូច​…​។​ល​។​

​ក្រុមការងារ​គ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ា​នី បង្កើតឡើង កាលពី​ថ្ងៃទី​០២ ខែធ្នូ ឆ្នាំ​២០១២​។ គិត​ត្រឹម​ថ្ងៃទី​០២ ខែធ្នូ ឆ្នាំ​២០១៨ ពោលគឺ​រយៈពេល ៦​ឆ្នាំ ត្រូវជា ៧២ ខែ ក្រុមការងារ​គ្រូពេទ្យ​ស្ម័គ្រចិត្ត ឯកឧត្តម ហ៊ុន​ម៉ា​នី ចំនួន ៤២៧៥ នាក់ បាន​ចុះ​ព្យាបាល​ជូន​ប្រជាពលរដ្ឋ បាន​ចំនួន ១៦៣​លើក ដោយមាន​ប្រជាពលរដ្ឋ ចំនួន ៣៧៧ ៤៣៤ នាក់ ( សាប​សិប​ប្រាំ​ពីរម៉ឺន ប្រាំ​ពីរពាន់ បួន​រយ​សាមសិប​បួន នាក់ ) នៅក្នុង ១៦ រាជធានី​ខេត្ត​។ នេះ​បើតាម​របាយការណ៍​រប​ស់​ក្រុមការងារ​គ្រូពេទ្យ​ស្ម័គ្រចិត្ត ឯ​ឧ​ត្ត​ម ហ៊ុន ម៉ា​នី​៕​

អត្ថបទដែលជាប់ទាក់ទង