លិខិតមិត្តអ្នកអាន៖ សម រង្ស៊ី បោកអ្នកគាំទ្រមិនចេះចប់ គឺបោកលុះក្ស័យ

(ភ្នំពេញ)៖ ថ្ងៃទី២១ ខែកុម្ភៈ ឆ្នាំ២០១៩នេះ គឺជាថ្ងៃផ្តាច់ព្រលឹងចំពោះអ្នកគាំទ្រ សម រង្ស៊ី ដែលខំរំពឹងថា បានឃើញ​បុរសរយពាន់សន្យារូបនេះ វិលមកប្រទេសវិញ តាមការសន្យា។ 

សម រង្ស៊ី ដែលពេលនេះ កំពុងជិះស្គីលេងយ៉ាងសប្បាយរីកថ្លើមនៅតំបន់ភ្នំ Chamonix-Mont Blanc ជាប់ព្រំដែនប្រទេសបារាំងជាមួយស្វីស បានផ្ញើសារតាមហ្វេសប៊ុកប្រាប់អ្នកគាំទ្រថា លាហើយពាក្យភ្នាល់ ឬពាក្យសម្បថ ដែលខ្លួនបានធ្វើ។ 

សម្រាប់អ្នកស្គាល់ សម រង្ស៊ី តែ មិនស្ថិតនៅក្នុងចង្កោមអ្នកគាំទ្រផ្កាប់មុខទាំងងងឹតងងុល គេបានឲ្យគូថតាំងពីឮ សម រង្ស៊ី ប្រកាសស្បថថា ចូលស្រុកវិញភ្លាមៗមកម៉្លេះពីព្រោះគេបានស្គាល់ក្រយៅ សម រង្ស៊ី ច្បាស់ដូចបាតដៃ។

សូម្បីសម្តេចតេជោនាយករដ្ឋមន្ត្រី ហ៊ុន សែន ក៏មិនជឿថា សម រង្ស៊ី ហ៊ានចូលខ្លួនមកឲ្យអាជ្ញាធរចាប់ដាក់គុកដែរ។ ដូច្នេះហើយបានជាគ្រាន់តែឮការប្រកាសរបស់ សម រង្ស៊ីភ្លាម សម្ក៏តេចតេជោប្រកាសតបវិញភ្លាមថា ទទួលយកការភ្នាល់នេះ ពីព្រោះតែចង់បកស្បែកមុខមនុស្សពូកែបោកតែប៉ុណ្ណោះ។ 

នៅស្រុកខ្មែរ តើអ្នកណាមួយមិនស្គាល់ សម រង្ស៊ី រឿងរត់លឿនជាងអាំងទែរណែត 5G ឬលឿនជាងសំឡេងទៀតនោះ។ ប៉ុន្តែមានតែក្រុមអ្នកគាំទ្រងងឹតងងុលមួយដំបរស្វាប៉ុណ្ណោះ ដែលនៅបន្តចាញ់បោក សម រង្ស៊ី ងើបមុខមិនទាន់រួច។ ម្តងនេះ ពួកគេប្រហែលជាបានភ្លឺភ្នែកខ្លះហើយ តែប្រសិនបើនៅតែបន្តងងឹតទៀត សូម្បីព្រះក៏មិនអាចជួយប្រោសបានដែរ។

រឿងប្រកាសភ្នាល់ក្តែងៗដោយយកសេរីភាព កឹម សុខា មកធ្វើជាល្បែងជារឿងគួរឲ្យហួសចិត្តមួយទៅហើយ ចុះម្តេចឡើយបានជាក្រោយមកស្រាប់តែមានសេចក្តីសម្រេចក្នុងអង្គប្រជុំ ហើយប្រកាសពីការរៀបចំដំណើរវិលមកវិញរបស់ សម រង្ស៊ី ក្នុងឆ្នាំ២០១៩ នេះធ្វើអីទៀត?

ហេតុអ្វីក៏ចាំបាច់ភូតកុហកអ្នកគាំទ្ររបស់ខ្លួនម្តងហើយម្តងទៀតយ៉ាងនេះ? ឬមួយ សម រង្ស៊ី យល់ឃើញថា ក្រុមអ្នកគាំទ្រគាត់សុទ្ធជាមនុស្សល្ងង់ងាយបោក ហើយចេះតែបន្តបោករហូតតទៅ? ពិតជាគួរឲ្យអនិច្ចាណាស់អ្នកគាំទ្រ សម រង្ស៊ី ទាំងឡាយអើយ។ 

គួររំឭកឡើងវិញថា នៅថ្ងៃទី០៩ ខែវិច្ឆិកា ឆ្នាំ២០១៨ សម រង្ស៊ី ស្រាប់តែប្រកាសតាមហ្វេសប៊ុកថា កឹម សុខា នឹងត្រូវដោះលែងឲ្យមានសេរីភាពនៅថ្ងៃទី២៩ ខែកុម្ភៈ ឬយ៉ាងយូរថ្ងៃទី៣ ខែមីនា ឆ្នាំ២០១៩ ក្រោមសម្ពាធអន្តរជាតិ។ សម រង្ស៊ី ប្រកាសបបួលសម្តេចតេជោ ហ៊ុន សែន ភ្នាល់ជាសាធារណៈថា បើមិនដោះលែងតាមកាលបរិច្ឆេទនោះទេ សម រង្ស៊ី សុខចិត្តចាញ់ ហើយវិលមកឲ្យអាជ្ញាធរកម្ពុជាចាប់ដាក់គុក។ 

ប៉ុន្តែ បើសិនជាមានការដោះលែងដូចដែលគាត់លើកឡើងមែន គាត់ឲ្យសម្តេចតេជោ ហ៊ុន សែនចាញ់ហើយត្រូវចុះចេញពីតំណែង។ ភ្លាមៗនោះសម្តេចតេជោ ហ៊ុន សែន ក៏បានប្រកាសទទួលយកការភ្នាល់នេះ។ 

ឥឡូវនេះ ពេលវេលាថ្ងៃទី២៩ ខែកុម្ភៈ ជិតចូលមកដល់ តែគ្មានអ្នកណាជឿថា សម រង្ស៊ី គោរពសន្យាទេ។

ដោយដឹងពីចរិតរបស់ សម រង្ស៊ី ច្បាស់ដូចបាតដៃ កាលពីថ្មីៗនេះ សម្តេចតេជោ ហ៊ុន សែន បាននិពន្ធកំណាព្យមួយលើបណ្តាញសង្គមហ្វេសប៊ុកថា «ទទាយំឆ្លង ត្រយ៉ងបងអើយអត់ឆ្លើយ សង្សារបងអើយដល់ពេលហើយឬនៅ? ចិត្តអូនចិត្តដាច់ដោយសារចិត្តបងចិត្តខ្មៅ ស្ពានក៏បាក់ទឹកក៏ជ្រៅ ធ្វើម្តេចបានទៅតាមកិច្ចសន្យា»។ 

កំណាព្យនេះត្រូវបានគេយកទៅ ច្រៀងហើយបង្ហោះព្រោងព្រាតតាមបណ្តាញសង្គមហ្វេសប៊ុក យ៉ាងពេញនិយមដើម្បីឌឺ និងឌឺដងឲ្យ សម រង្ស៊ី។ 

ដូចការទស្សទាយមែន ថ្ងៃនេះ ទី២២ ខែកុម្ភៈ សម រង្ស៊ី បានប្រកាសតាមហ្វេសប៊ុកថា គាត់មិនមកតាមការសន្យាទេ។ ដោយ សម រង្ស៊ី មានសារជាតិជាមនុស្សខូច ក្រឡិចក្រឡុច បាតដៃជាខ្នងដៃ គាត់បែរជាក្រឡាស់ដោយឥតអៀនខ្មាសថា មកពីសម្តេចតេជោ ហ៊ុន សែន កែប្រែលក្ខខ័ណ្ឌតាមអំពើចិត្ត? 

ហាស ហា ! ពិតជាគួរឲ្យខ្មាសក្មេងមែន។ ហេតុអីបានជាស្រុកយើងមានអ្នកនយោបាយមហាកំសាក ឥតអៀនខ្មាស និងមហាក្រឡិចក្រឡុចបែបនេះ? អ្វីដែលគាត់លើកមកសម្អាងគឺជាល្បែងកូនក្មេងបៀមដៃសុទ្ធសាធ និងជាការប្រឌិត​ទាំងស្រុង។ 

ប៉ុន្តែ សម្រាប់អ្នកតាមដាននយោបាយតាមតុកាហ្វេដូចខ្ញុំ គឺខ្ញុំបានមើលឃើញយ៉ាងច្បាស់ក្រឡែតអំពីសេណារីយោ​រាក់កំផែលរបស់ សម រង្ស៊ី។ 

ការប្រកាសភ្នាល់នេះ សម រង្ស៊ី គិតឃើញត្រឹមតែថា ធ្វើម៉េចកុំឲ្យ កឹម សុខា មានសេរីភាពក្នុងអំឡុងពេលនេះ ពីព្រោះ សម រង្ស៊ី កំពុងរៀបចំផែនការធ្វើបក្សប្រហារដណ្តើមអំណាចពី កឹម សុខា មកវិញ។ 

ម្យ៉ាងទៀត សម រង្ស៊ី ដែលជាមនុស្ស «គិតមិន ដែលត្រូវយល់មិនដែលច្បាស់ និងធ្វើមិនដែលកើត» បានជឿទាំងការភាន់​ច្រឡំថា សហគមន៍អន្តរជាតិទំនងជាកំពុងដាក់សម្ពាធខ្លាំងលើរដ្ឋាភិបាលដឹកនាំដោយសម្តេចតេជោ ហ៊ុន សែន ដែលធ្វើឲ្យ​រដ្ឋាភិបាលនេះ ត្រូវដោះលែង កឹម សុខា តាមកាលបរិច្ឆេទដូចដែលគាត់បានលើកឡើង។ ទំនងជាមានបរទេសណាខ្សឹប​ប្រាប់​គាត់ថា អ៊ីចឹង ទើបម៉្លោះហើយគាត់ក៏លង់ជឿទៅ ហើយភ័យខ្លាច កឹម សុខា មានសេរីភាពក៏កើតគំនិតភ្នាល់តែម្តង ព្រោះខួរក្បាល សម រង្ស៊ី មិនដែលគិតឃើញរឿងល្អៗនោះឡើយ។

ដូចការគ្រោងទុក អំពើបក្សប្រហារ ក៏បានសម្រេចដូចបំណងកាលពីថ្ងៃទី ២ធ្នូ ឆ្នាំ ២០១៨ នៅអាត្លង់តា សហរដ្ឋអាមេរិក។ ប៉ុន្តែ វាមិនដូចការរំពឹងទុករបស់ សម រង្ស៊ី ឡើយ គ្មានបរទេសណាមកដាក់សម្ពាធលើ រដ្ឋាភិបាលដូចដែល សម រង្ស៊ី ស្រមៃនោះឡើយ។ ទីបំផុត សម រង្ស៊ី ក៏ធ្លាក់ខ្លួនក្នុងស្ថានភាព «ភូតច្រើនចាញ់អាត្មា» ម្តងទៀត។ តែម្តងនេះ ប្រហែល​ជាលើក​ចុងក្រោយ និងជាថ្ងៃអន្សាររបស់ សម រង្ស៊ី ហើយ។

កាលពីថ្មីៗនេះ សម រង្ស៊ី បាន ប្រកាសម្តងទៀតថា នឹងវិលចូលមកស្រុកវិញក្នុងឆ្នាំ ២០១៩ នេះ។ ការប្រកាសភ្នាល់​លើកមុន គឺដោយសារសម រង្ស៊ី ភាន់ច្រឡំថា រដ្ឋាភិបាលកម្ពុជាកំពុងរងសម្ពាធអន្តរជាតិ។ ប៉ុន្តែ​ការប្រកាស​ចុង​ក្រោយ​របស់ សម រង្ស៊ី អំពីផែនការវិលចូលស្រុកវិញក្នុងឆ្នាំ ២០១៩ នេះគឺដើម្បីប្រមូលលុយពីអ្នកគាំទ្រនៅក្រៅប្រទេសផង និងជាការផ្សងព្រេង​ដោយស្រមើស្រមៃពឹងលើសម្ពាធអន្តរជាតិម្តងទៀត។

ក្រោយមកដោយឃើញថា សម្ពាធអន្តរជាតិហាក់ដូចជាមិនសូវមានប្រសិទ្ធិភាពដូចដែលគាត់រំពឹងទុក រីឯសន្ទុះនៃការគាំទ្រ​ពីសកម្មជនខ្លួននៅក្នុងប្រទេសក៏មិនសូវមាន សម រង្ស៊ី បានក្រឡាស់សម្តីថា គាត់មិនភ្លើចូលមកឲ្យអាជ្ញាធរចាប់​ដាក់គុក​ឡើយ។ សម រង្ស៊ី ថែមទាំងបានប្រមាថ កឹម សុខា និងបណ្ឌិតកែម ឡីថា ការស្លាប់និងជាប់គុកបែបនេះ​គ្មានប្រយោជន៍​អ្វី​ឡើយ។

ដូច្នេះ ល្មមភ្លឺភ្នែកហើយ ក្រុមអ្នកធ្មេចភ្នែកគាំទ្រ សម រង្ស៊ីទាំងងងឹតងងុលព្រោះបើគេបោកចាប់ពី ៣ ឬ៤ដងបាននោះ​អាច​ចាត់ទុកថា អ្នកបោកនោះឆ្លាត។​ បើបណ្តោយឲ្យគេបោកបានមួយជីវិតបែបនេះ គេហៅថា ជាមនុស្សល្ងង់ហើយ។ ពិតជា​គួរឲ្យអនិច្ចាមែនអ្នកលង់ជឿតាមសម រង្ស៊ី៕

ដោយ៖ អ្នកតាមដាននយោបាយតុកាហ្វេ

 

អត្ថបទដែលជាប់ទាក់ទង