(សិង្ហបុរី)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និង ឯកឧត្តម សេជិ ថាណាកា (Seiji Tanaka) អនុរដ្ឋមន្រ្តីក្រសួងសុខាភិបាល ការងារនិងសុខុមាលភាពនៃប្រទេសជប៉ុន បានជួបពិភាក្សាគ្នាជាលក្ខណៈទ្វេភាគី នាព្រឹកថ្ងៃទី៣១ ខែតុលា ឆ្នាំ២០២៤ អំឡុងពេលចូលរួមកិច្ចប្រជុំរដ្ឋមន្ត្រីការងារអាស៊ាន លើកទី២៨ និងកិច្ចប្រជុំពាក់ព័ន្ធ នៅក្នុងប្រទេសសិង្ហបុរី។ នៅក្នុងជំនួបទ្វេភាគីនេះ ឯកឧត្តមរដ្ឋមន្ត្រី បានវាយតម្លៃខ្ពស់ និងថ្លែងអំណរគុណភាគីជប៉ុនសម្រាប់កិច្ចសហប្រតិបត្តិការ និងការគាំទ្រផ្នែកបច្ចេកទេស និងហិរញ្ញវត្ថុកន្លងមក ពិសេសតាមរយៈជំនួយអភិវឌ្ឍរបស់ទីភ្នាក់ងារសហប្រតិបត្តិការអន្ដរជាតិជប៉ុន (JICA) និងការបញ្ជូនអ្នកជំនាញឯកទេសជនជាតិជប៉ុនមកកម្ពុជា លើវិស័យបណ្ដុះបណ្ដាលវិជ្ជាជីវៈ (TVET) និងសុវត្ថិភាព និងសុខភាពការងារ (OSH) ដែលជាកាតាលីករជំរុញយ៉ាងសំខាន់សម្រាប់ការអភិវឌ្ឍធនធានមនុស្សនៅកម្ពុជា។ បន្ថែមពីនេះ ឯកឧត្តមរដ្ឋមន្រ្តី ក៏បានលើកឡើងសារៈសំខាន់នៃកម្មវិធីការងារសម្រាប់ការអភិវឌ្ឍជំនាញ (Employment for Skill Development Program) ថ្មីរបស់ជប៉ុន ដែលនឹងត្រូវដាក់ឱ្យអនុវត្តជាផ្លូវការនៅឆ្នាំ២០២៧ ដោយកម្មវិធីនេះនឹងអាចជួយពង្រឹងបន្ថែមកិច្ចសហប្រតិបត្តិការ “ភាពជាដៃគូយុទ្ធសាស្រ្តគ្រប់ជ្រុងជ្រោយ” រវាងប្រទេសទាំងពីរ តាមរយៈការផ្ដល់អាទិភាព និងលើកទឹកចិត្តឱ្យកម្ពុជា ក៏ដូចជាប្រទេសបញ្ជូនដទៃទៀត បង្កើនការបញ្ជូនពលករជំនាញ (Skilled Workers) ទៅជប៉ុន ជាជាងការបញ្ជូនកម្មសិក្សាការីបច្ចេកទេស (Technical Intern Trainees)។ កម្មវិធីនេះមិនត្រឹមតែរួមចំណែកក្នុងការជួយបង្កើនកម្លាំងពលកម្មជំនាញ និងជំរុញកំណើនសេដ្ឋកិច្ចជប៉ុនប៉ុណ្ណោះទេ ថែមទាំងជួយដល់ការអភិវឌ្ឍធនធានមនុស្ស និងសង្គមសេដ្ឋកិច្ចរបស់កម្ពុជា ពិសេសក្រោយពលករជំនាញទាំងនោះវិលត្រឡប់មកកម្ពុជាវិញ។ជាការឆ្លើយតប ឯកឧត្តម សេជិ ថាណាកា បានសម្តែងការគាំទ្រចំពោះការលើកឡើងរបស់ឯកឧត្តមរដ្ឋមន្ត្រី និងបញ្ជាក់គោលជំហររបស់ប្រទេសជប៉ុន ក្នុងការជួយគាំទ្រ និងលើកកម្ពស់ប្រព័ន្ធកម្មសិក្សាការី និងពលករជំនាញដែលកំពុងអនុវត្តក្នុងពេលបច្ចុប្បន្នបន្ថែមទៀត ព្រមទាំងសង្ឃឹមថា កម្មវិធីបណ្ដុះបណ្ដាលការងារថ្មីរបស់ជប៉ុន នៅឆ្នាំ២០២៧ នឹងក្លាយជាយន្ដការមួយដ៏សំខាន់ក្នុងការចូលរួមចំណែកអភិវឌ្ឍធនធានមនុស្ស និងសេដ្ឋកិច្ចនៃប្រទេសទាំងពីរ។ឯកឧត្តមអនុរដ្ឋមន្រ្តី ក៏បានបង្ហាញពីការប្តេជ្ញាចិត្តខ្ពស់ ក្នុងការបន្តកិច្ចសហប្រតិបត្តិការជាមួយកម្ពុជា លើវិស័យបណ្ដុះបណ្ដាលវិជ្ជាជីវៈ ក្នុងគោលបំណងបង្កើនការបណ្តុះបណ្តាលជំនាញ បង្កើនសមត្ថភាព និងការផ្លាស់ប្តូរជំនាញ ដើម្បីបង្កើនផលិតភាពការងារដល់កម្លាំងពលកម្មរបស់កម្ពុជា ជាពិសេសសម្រាប់ពលករដែលធ្វើសមាហរណកម្មត្រឡប់មកមាតុភូមិវិញ ដើម្បីអាចទទួលបានការងារដែលមានស្ថេរភាព និងមានប្រាក់ចំណូលសមរម្យ។ ទន្ទឹមនឹងនេះ ឯកឧត្តម ក៏បានលើកឡើងពីអាទិភាពថ្មីមួយទៀតរបស់ជប៉ុនសម្រាប់កាលៈទេសៈក្រោយជំងឺរាតត្បាតកូវីដ-១៩ ក្នុងការចែករំលែកឧត្តមានុត្តន៍ និងបទពិសោធន៍ពាក់ព័ន្ធនឹងសុខភាពផ្លូវចិត្តនៅកន្លែងធ្វើការ តាមរយៈអង្គការអន្ដរជាតិខាងការងារ (ILO)។ជារួម ជំនួបពិភាក្សាការងារទ្វេភាគីនេះ បានប្រព្រឹត្តទៅប្រកបដោយភាពស្និទ្ធស្នាល និងមិត្តភាព៕

(អន្តរជាតិ)៖ យោធាកូរ៉េខាងត្បូងបាននិយាយថា កូរ៉េខាងជើង បានបាញ់សាកល្បងមីស៊ីលដ៏មានឥទ្ធិពល បំផុតមួយរបស់ខ្លួន ដែលជាការសាកល្បងអាវុធលើកដំបូងរបស់លោក គីម ជុងអ៊ុន ចាប់តាំងពីត្រូវបាន ចោទប្រកាន់ថាបានបញ្ជូនទាហានទៅកាន់ប្រទេសរុស្ស៊ី។យោធាកូរ៉េខាងត្បូងបានព្រមានមួយថ្ងៃមុនថា កូរ៉េខាងជើងកំពុងត្រៀមធ្វើតេស្តមីស៊ីលផ្លោងអន្តរទ្វីប (ICBM) មួយផ្សេងទៀត ឬសូម្បីតែធ្វើការសាកល្បងនុយក្លេអ៊ែរ ដែលអាចនៅមុនការបោះឆ្នោត អាមេរិកនៅសប្តាហ៍ក្រោយ។ការបាញ់បង្ហោះនេះបានធ្វើឡើងតែប៉ុន្មានម៉ោងបន្ទាប់ពីប្រមុខការពារជាតិអាមេរិក និងកូរ៉េខាងត្បូង បានអំពាវនាវឱ្យទីក្រុងព្យុងយ៉ាងដកកងទ័ពរបស់ខ្លួនចេញពីប្រទេសរុស្ស៊ី ដោយព្រមានថា ទាហានកូរ៉េខាងជើងក្នុងឯកសណ្ឋានរុស្ស៊ីកំពុងត្រូវបានដាក់ពង្រាយសម្រាប់សកម្មភាពដែលអាចកើតមានប្រឆាំងនឹងកងកម្លាំងអ៊ុយក្រែន៕

(សិង្ហបុរី)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និង ឯកឧត្តម សេជិ ថាណាកា (Seiji Tanaka) អនុរដ្ឋមន្រ្តីក្រសួងសុខាភិបាល ការងារនិងសុខុមាលភាពនៃប្រទេសជប៉ុន បានជួបពិភាក្សាគ្នាជាលក្ខណៈទ្វេភាគី នាព្រឹកថ្ងៃទី៣១ ខែតុលា ឆ្នាំ២០២៤ អំឡុងពេលចូលរួមកិច្ចប្រជុំរដ្ឋមន្ត្រីការងារអាស៊ាន លើកទី២៨ និងកិច្ចប្រជុំពាក់ព័ន្ធ នៅក្នុងប្រទេសសិង្ហបុរី។ នៅក្នុងជំនួបទ្វេភាគីនេះ ឯកឧត្តមរដ្ឋមន្ត្រី បានវាយតម្លៃខ្ពស់ និងថ្លែងអំណរគុណភាគីជប៉ុនសម្រាប់កិច្ចសហប្រតិបត្តិការ និងការគាំទ្រផ្នែកបច្ចេកទេស និងហិរញ្ញវត្ថុកន្លងមក ពិសេសតាមរយៈជំនួយអភិវឌ្ឍរបស់ទីភ្នាក់ងារសហប្រតិបត្តិការអន្ដរជាតិជប៉ុន (JICA) និងការបញ្ជូនអ្នកជំនាញឯកទេសជនជាតិជប៉ុនមកកម្ពុជា លើវិស័យបណ្ដុះបណ្ដាលវិជ្ជាជីវៈ (TVET) និងសុវត្ថិភាព និងសុខភាពការងារ (OSH) ដែលជាកាតាលីករជំរុញយ៉ាងសំខាន់សម្រាប់ការអភិវឌ្ឍធនធានមនុស្សនៅកម្ពុជា។ បន្ថែមពីនេះ ឯកឧត្តមរដ្ឋមន្រ្តី ក៏បានលើកឡើងសារៈសំខាន់នៃកម្មវិធីការងារសម្រាប់ការអភិវឌ្ឍជំនាញ (Employment for Skill Development Program) ថ្មីរបស់ជប៉ុន ដែលនឹងត្រូវដាក់ឱ្យអនុវត្តជាផ្លូវការនៅឆ្នាំ២០២៧ ដោយកម្មវិធីនេះនឹងអាចជួយពង្រឹងបន្ថែមកិច្ចសហប្រតិបត្តិការ “ភាពជាដៃគូយុទ្ធសាស្រ្តគ្រប់ជ្រុងជ្រោយ” រវាងប្រទេសទាំងពីរ តាមរយៈការផ្ដល់អាទិភាព និងលើកទឹកចិត្តឱ្យកម្ពុជា ក៏ដូចជាប្រទេសបញ្ជូនដទៃទៀត បង្កើនការបញ្ជូនពលករជំនាញ (Skilled Workers) ទៅជប៉ុន ជាជាងការបញ្ជូនកម្មសិក្សាការីបច្ចេកទេស (Technical Intern Trainees)។ កម្មវិធីនេះមិនត្រឹមតែរួមចំណែកក្នុងការជួយបង្កើនកម្លាំងពលកម្មជំនាញ និងជំរុញកំណើនសេដ្ឋកិច្ចជប៉ុនប៉ុណ្ណោះទេ ថែមទាំងជួយដល់ការអភិវឌ្ឍធនធានមនុស្ស និងសង្គមសេដ្ឋកិច្ចរបស់កម្ពុជា ពិសេសក្រោយពលករជំនាញទាំងនោះវិលត្រឡប់មកកម្ពុជាវិញ។ជាការឆ្លើយតប ឯកឧត្តម សេជិ ថាណាកា បានសម្តែងការគាំទ្រចំពោះការលើកឡើងរបស់ឯកឧត្តមរដ្ឋមន្ត្រី និងបញ្ជាក់គោលជំហររបស់ប្រទេសជប៉ុន ក្នុងការជួយគាំទ្រ និងលើកកម្ពស់ប្រព័ន្ធកម្មសិក្សាការី និងពលករជំនាញដែលកំពុងអនុវត្តក្នុងពេលបច្ចុប្បន្នបន្ថែមទៀត ព្រមទាំងសង្ឃឹមថា កម្មវិធីបណ្ដុះបណ្ដាលការងារថ្មីរបស់ជប៉ុន នៅឆ្នាំ២០២៧ នឹងក្លាយជាយន្ដការមួយដ៏សំខាន់ក្នុងការចូលរួមចំណែកអភិវឌ្ឍធនធានមនុស្ស និងសេដ្ឋកិច្ចនៃប្រទេសទាំងពីរ។ឯកឧត្តមអនុរដ្ឋមន្រ្តី ក៏បានបង្ហាញពីការប្តេជ្ញាចិត្តខ្ពស់ ក្នុងការបន្តកិច្ចសហប្រតិបត្តិការជាមួយកម្ពុជា លើវិស័យបណ្ដុះបណ្ដាលវិជ្ជាជីវៈ ក្នុងគោលបំណងបង្កើនការបណ្តុះបណ្តាលជំនាញ បង្កើនសមត្ថភាព និងការផ្លាស់ប្តូរជំនាញ ដើម្បីបង្កើនផលិតភាពការងារដល់កម្លាំងពលកម្មរបស់កម្ពុជា ជាពិសេសសម្រាប់ពលករដែលធ្វើសមាហរណកម្មត្រឡប់មកមាតុភូមិវិញ ដើម្បីអាចទទួលបានការងារដែលមានស្ថេរភាព និងមានប្រាក់ចំណូលសមរម្យ។ ទន្ទឹមនឹងនេះ ឯកឧត្តម ក៏បានលើកឡើងពីអាទិភាពថ្មីមួយទៀតរបស់ជប៉ុនសម្រាប់កាលៈទេសៈក្រោយជំងឺរាតត្បាតកូវីដ-១៩ ក្នុងការចែករំលែកឧត្តមានុត្តន៍ និងបទពិសោធន៍ពាក់ព័ន្ធនឹងសុខភាពផ្លូវចិត្តនៅកន្លែងធ្វើការ តាមរយៈអង្គការអន្ដរជាតិខាងការងារ (ILO)។ជារួម ជំនួបពិភាក្សាការងារទ្វេភាគីនេះ បានប្រព្រឹត្តទៅប្រកបដោយភាពស្និទ្ធស្នាល និងមិត្តភាព៕

(សង្គម)៖ ជារឿងមួយដែលចម្លែក និង មិននឹកស្មានដល់ ខណៈថ្មីៗនេះ មានបុរសម្នាក់ បានយកភ្លើងទៅ ដុតខោអាវចាស់ៗ ក្នុងន័យដើម្បីបណ្ដេញសត្វមូសចេញពីក្នុងផ្ទះ ប៉ុន្តែចង្រៃអីបែរជា ភ្លើងបានឆេះរាលដាល រហូតលេបត្របាក់យកផ្ទះមួយខ្នងទាំងស្រុង កាលពីព្រឹកថ្ងៃទី២៩ តុលា ឆ្នាំ២០២៤កន្លងទៅ ដែល ហេតុការណ៍ដ៏កម្របានប្រទះបែបនេះ បានកើតឡើង នៅភូមិស្ថាពរ២ ឃុំអំពិលប្រាំដើម ស្រុកបវេល ខេត្តបាត់ដំបង។ យ៉ាងណាមិញតាមការឱ្យដឹងពីសំណាក់ សមត្ថកិច្ចបានឱ្យដឹងថា ផ្ទះដែលត្រូវបានឆាបឆេះនោះ មានទំហំ៧ម៉គុណ៩ម៉ ធ្វើពីថ្មក្រោម ឈើលើ និងប្រក់ក្បឿង ដែលមានម្ចាស់ឈ្មោះ សុន ញ៉ាញ ភេទស្រី អាយុ៦៤ឆ្នាំ។ ចំណែកឯជនបង្ករ មានឈ្មោះ ឆុន ឈួង ភេទប្រុស អាយុ២៧ឆ្នាំ ត្រូវបានគេបញ្ជាក់ថា ជាមនុស្សកើតរោគសរសៃប្រសាទ ហើយ ត្រូវជាក្មួយរបស់ ម្ចាស់ផ្ទះផងដែរ ។លោកអធិការស្រុកបវេល បានឱ្យដឹងដែរថា មូលហេតុដែលធ្វើឱ្យជនបង្ករប្រព្រឹត្តសកម្មភាពនេះ គឺដោយសារម្ចាស់ផ្ទះ ដែលត្រូវជាមីងជនបង្ករ មិនសូវបានស្នាក់នៅក្នុងផ្ទះទេ ភាគច្រើនគាត់ទៅប្រកបមុខរបររកស៊ីនៅក្រុងប៉ោយប៉ែត ហើយក្មួយឈ្មោះ ឆុន ឈួន ដែលមានសតិមិនគ្រប់នេះ តែងតែចេញចូល និងស្នាក់នៅផ្ទះកើតហេតុនេះ តែភាគច្រើនផ្ទះចាក់សោរទុកចោល ។ លោកអធិការស្រុកបានបន្តទៀតថា នៅថ្ងៃកើតហេតុ គ្មាននរណាបានដឹង ឬបានឃើញផ្ទាល់ភ្នែក លុះអគ្គិភ័យឆាបឆេះ អណ្ដាតភ្លើងសន្ធោរសន្ធៅ ហើយ ទើបអ្នកភូមិមានការភ្ញាក់ផ្អើល នាំគ្នាជួយអន្តរាគមន៍ និងរាយការណ៍ទៅ សមត្ថកិច្ចតែម្តង។ទោះជាយ៉ាងណាក៏ដោយ នៅចំពោះមុខសមត្ថកិច្ច ជនមានសតិគ្រប់ ឈ្មោះ ឆុន ឈួន នេះបានសារភាព ថា ខ្លួនពិតជាអ្នកដុតផ្ទះនោះមែន ។ ជននេះ បានប្រាប់សមត្ថកិច្ចថា ដំបូងខ្លួនយកខោអាវចាស់ៗ មកគរដុតដើម្បីដេញមូសក្នុងផ្ទះ តែក៏ឆេះរាលដាល ឆេះទាំងផ្ទះខ្ទេចអស់តែម្ដង ។ ជុំវិញការខូចខាតនេះដែរ បើតាមរបាយការណ៍របស់សមត្ថកិច្ច បានឱ្យដឹងថា បើគិតជាទឹកប្រាក់អស់ប្រមាណ២៧លានរៀល ។ ចំណែកជនបង្ករ សមត្ថកិច្ចមិនធ្វើការឃាត់ខ្លួននោះទេ ដោយសារសតិមិនគ្រប់ និង ដោយយោងតាមសំណូមពរម្ចាស់ផ្ទះ ដែលត្រូវជាពូ ផងដែរ៕

(សង្គម)៖ មហាជននៅចាំអ្នកគ្រូបង្រៀនអក្ខរកម្មរូបនេះដែរទេ គាត់ជាបេក្ខជនប្រឡងបាក់ឌុប ដែលមានវ័យចំណាស់ជាងគេមួយរូប ដែលគាត់បានចូលប្រឡងសញ្ញាប័ត្រមធ្យមសិក្សាទុតិយភូមិតាំងពីឆ្នាំ ២០២២ រហូតមកដល់ឆ្នាំ២០២៤។អ្នកគ្រូ ហែម ស៊ីណាត អាយុ៥៨ឆ្នាំ ដើម្បីតាមចាប់ក្ដីស្រមៃ និងបំពេញគោលបំណងចង់ទទួលបាន សញ្ញាប័ត្រមធ្យមសិក្សាទុតិយភូមិ និងចង់សម្រេចក្ដីស្រមៃរបស់ខ្លួនក្លាយជាគ្រូបង្រៀនពេញសិទ្ធិនោះ បើទោះបីស្ថិតក្នុងវ័យជិត៦០ឆ្នាំក៏ដោយ ប៉ុន្តែបេក្ខជនវ័យចំណាស់ជាងគេរូបនេះ មិនដែលបោះបង់ចោល នូវការចូលសមរភូមិប្រឡងបាក់ឌុបម្ដងណាឡើង គិតមលដល់ឆ្នាំ២០២៤នេះ អ្នកគ្រូ ហែម ស៊ីណាត បានប្រឡងបាក់ឌុបជាលើកទី៣ នៅថ្ងៃទី០៨-០៩ ខែតុលា ឆ្នាំ២០២៤ ប៉ុន្តែគួរសោកស្ដាយទទួលបានលទ្ធផល បានធ្លាក់ដូចឆ្នាំមុនៗដដែល។ អ្នកស្រី ហែម ស៊ីណាត សព្វថ្ងៃជាគ្រូអក្ខរកម្ម បានបង្រៀនកូនសិស្សដែលមានវ័យចំណាស់អាយុចន្លោះពី ៥០ ដល់៧០ឆ្នាំ ដោយការបង្រៀនអក្សរនេះ កូនសិស្សវ័យចំណាស់របស់គាត់ទាំងអស់ រៀនអក្សរ ដើម្បីយកទៅមើលធម៌ អានសៀវភៅធម៌ និងសរសេរធម៌ ជាដើម។ សូមរំលឹកទៅដល់កាលប្រឡងសញ្ញាបត្រមធ្យមសិក្សាទុតិយភូមិ សម័យប្រឡងឆ្នាំ២០២២ និងជាឆ្នាំដំបូងដែលគាត់បានប្រឡងនោះ អ្នកស្រី ហែម ស៊ីណាត ជា បេក្ខជន១រូប ដែលទទួលបានការអាណិត និងកោតសររសើរជាខ្លាំង ពីសំណាក់មហាជន និយមលេងបណ្ដាញសង្គម ដោយសារតែ បេក្ខជនរូបនេះគឺមានអាយុក្បែរ៦០ឆ្នាំ ហើយ ពោលគឺមានវ័យចាស់ជាងគេបំផុតក្នុងចំណោមបេក្ខជន ប្រឡងនៅទូទាំងប្រទេស ដែលគាត់នៅតែមិនទាន់អាចធ្វើបានគោលការណ៍ «ចេះ គឺ ជាប់»។

(ព័ត៌មានជាតិ)៖ សម្ដេចតេជោ ហ៊ុន សែន បានសម្របសម្រួលបញ្ចប់ជម្លោះរវាង ណន សុខហេង និងថៅកែ ហើយបានឧបត្ថម្ភថវិកា ១០,០០០ដុល្លារនិង ៣៥លានរៀល ព្រមទាំងបានបង្កើតអាជីវកម្មឡដុតនំប៉័ងមួយនៅក្នុងក្រុងក្រចេះ ទៅកាន់បុគ្គល ណន សុខហេង ដើម្បីប្រកបរបរចញ្ចឹមគ្រួសារផងដែរ។ ជាក់ស្ដែងយោងតាមរយៈផេកផ្លូវការរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាំ នៅព្រឹកថ្ងៃទី ៣១ ខែតុលា ឆ្នាំ ២០២៤ នេះ បានឱ្យដឹងថា សម្តេចតេជោ បានអនុញ្ញាតឲ្យចៅ ណន សុខហេង អាយុ ២២ឆ្នាំ រស់នៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ ដែលមានជម្លោះជាមួយ ឈ្មោះ គា ចន្ធូ ម្ចាស់ក្រុមហ៊ុន «ស៊ាង ឡង មីងស៊ូ» លក់ និងផ្គត់ផ្គង់សម្ភារៈការពារជម្រាបទឹក ដែលមានទីតាំងនៅផ្លូវភ្នំពេញ ហាណូយ ភូមិឈ្មួញ សង្កាត់ឈ្មួញ ខណ្ឌសែនសុខ ចូលជួបដើម្បីសម្របសម្រួលបញ្ចប់ជម្លោះក្រៅប្រព័ន្ធតុលាការ ដោយមានការចូលរួមសម្របសម្រួលដោយ ប្រធានគណៈកម្មាធិការនីតិកម្មព្រឹទ្ធសភា ស្នងការនគរបាលរាជធានីភ្នំពេញ នៅវិមានព្រឹទ្ធសភា រាជធានីភ្នំពេញ។យ៉ាងណាមិញ នៅក្នុងការសម្របសម្រួលនេះ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានស្នើសុំអោយភាគីជម្លោះ និងបានណែនាំទៅ គណៈកម្មាធិការនីតិកម្មព្រឹទ្ធសភា ក្រុមមេធាវីស្ម័គ្រចិត្តសម្ដេច និងស្នងការនគរបាលរាជធានីភ្នំពេញ ធ្វើការសម្របសម្រួលបញ្ចប់ជម្លោះនេះនៅក្រៅប្រព័ន្ធតុលាការ ដោយកុំឲ្យបន្តដេញដោលរកខុសត្រូវអ្វីបន្ថែមទៀត ពិសេសកុំមានការគុំគួនគ្នា និងសុំឲ្យប្រព័ន្ធផ្សព្វផ្សាយសង្គមនានាបញ្ឈប់ការផ្សាយ អ្នកនេះខុស អ្នកនេះត្រូវបន្តទៀត។ បន្ទាប់ពីបញ្ចប់ សម្ដេចតេជោ បានអនុញ្ញាតឲ្យ ចៅ ណន សុខហេង បានថតរូបអនុស្សាវរីយ៍ និងបានឧបត្ថម្ភថវិកាចំនួន ១០,០០០ដុល្លារសហរដ្ឋអាមេរិក និង ៣៥លានរៀល ព្រមទាំងបានបង្កើតអាជីវកម្មឡដុតនំប៉័ងមួយនៅក្នុងក្រុងក្រចេះ ខេត្តក្រចេះ ដល់ចៅប្រុស ដើម្បីប្រកបរបរចញ្ចឹមគ្រួសារ លើសពីនេះ សម្ដេចតេជោ បានណែនាំចៅប្រុស ណន សុខហេង ត្រូវយកចិត្តទុកដាក់ក្នុងការប្រកបអាជីវកម្មដែល សម្ដេចបានផ្ដល់អោយពេលនេះ ពិសេសត្រូវចេះយកលុយបង្កើតលុយ ហាមលេងល្បែង និង ស្មោះត្រង់ជាមួយប្រពន្ធ ៕

(សង្គម)៖ ដូចដែលមហាជនគ្រប់គ្នាបានដឹងរួចមកហើយថា ក្រសួងអប់រំយុវវជននិងកីឡាបានចេញសេចក្ដីប្រកាសអំពីលទ្ធផលការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ឆ្នាំ ២០២៤ ដោយក្នុងនោះមានទាំងលទ្ធផលរបស់សិស្សនៅភ្នំពេញ និងសិស្សនៅតាមបណ្ដាខេត្តនានា។ យ៉ាងណាមិញក្រោយលទ្ធផលនៃសិស្សក្នុងខេត្ត ក្រចេះបានចេញហើយនោះ លោកគ្រូបង្រៀនម្នាក់បានបង្ហាញអារម្មណ៍រំភើបអបអរជាពន់ពេក ខណៈលើកទីមួយហើយដែលបង្រៀនប៉ះចំសិស្សកូនភ្លោះចំនួន៣គូ=៦នាក់ ហើយទទួលបាននិទ្ទេស A ទាំង៦នាក់។ជាក់ស្ដែង យោងតាម Facebook page ឈ្មោះ គីមីវិទ្យា ថ្នាក់ទី១២ បានធ្វើការបង្ហោះរូបភាពប៉ុន្មានសន្លឹក និងអមមកជាមួយសំណេរខ្លឹមសារយ៉ាងដូច្នេះថា «លេីកទី១ ហេីយសម្រាប់ខ្ញុំ ដែលមួយឆ្នាំសិក្សាបង្រៀនប៉ះសិស្សកូនភ្លោះ៣គូ=៦នាក់ ។ ហេីយអ្វីដែលពិសេសទៀតនោះ គឺគាត់ បាននិទ្ទេស A ទាំង៦ នាក់»។ តាមរយៈខ្លឹមសារខាងលើបានឱ្យបន្ថែមទៀតថា កូនភ្លោះគូរទីមួយនោះមានឈ្មោះ ខនរីដា និង ខន ម៉ាលីស ហើយកូនភ្លោះគូរទីពីរ គឺមានឈ្មោះ ចាន់ មួយគា និង ចាន់ មួយគីម ចំណែកឯកូនភ្លោះទី៣វិញនោះ ជាកូនភ្លោះប្រុសហើយមានឈ្មោះ បឿន ពិសិដ្ឋ និង បឿន ពិសី ដោយទាំង៦នាក់គឺសុទ្ធតែទទួលបាននូវលទ្ធិផលល្អដ៏គាប់ប្រសើរ។ដោយឡែក លទ្ធផលទូទាំងប្រទេសនៃ ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ឆ្នាំ ២០២៤ នេះផងដែរ សង្គេតឃើញថាបងប្អូនភ្លោះដែលទទួលបាននិទ្ទេស Aដូចគ្នានោះគឺពុំមែនមានតែបីគូរខាងលើដែលបានរៀបរាប់នោះឡើយ គឺមានច្រើនគូរឯទៀតដែលមកពីខេត្តផ្សេងៗនេះ ហើយបានប្រឡងទទួលនូវនិទ្ទេស Aដូចៗគ្នា ពោលគឺសមត្តភាពខ្លាំងពូកែស្មើៗដៃគ្នាតែម្ដង។ ទោះជាយ៉ាងណាក៏សូមអបអរសារទរ ទៅកាន់បេក្ខជនប្រឡងគ្រប់រូប ដែលបានខិតខំពុះពារឆ្លងកាត់នូវដំណាក់កាលមួយនេះ។គួរបញ្ជាក់ផងដែរថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៨ តុលា ២០២៤កាលពីកន្លងទៅនេះ ជាលទ្ធផល បេក្ខជនប្រឡងជាប់សរុប ១០៦ ៣៥១ នាក់ ត្រូវជា ៧៩.០០ ភាគរយនៃចំនួន បេក្ខជនមកប្រឡង។ បេក្ខជនជាប់និទ្ទេស A ចំនួន ២ ២១៦ នាក់, និទ្ទេស B ចំនួន ៩ ៧០១ នាក់, និទ្ទេស C ចំនួន ២២ ៦៧៥ នាក់, និទ្ទេស D ចំនួន ៣៦ ៦៨៣ នាក់, និងនិទ្ទេស E ចំនួន ៣៥ ០៧៦នាក់៕

(ភ្នំពេញ)៖ នៅព្រឹកថ្ងៃព្រហស្បតិ៍ ទី៣១ ខែតុលា ឆ្នាំ២០២៤នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឲ្យចៅ ណន សុខហេង អាយុ២២ឆ្នាំ រស់នៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ ដែលមានជម្លោះជាមួយ ឈ្មោះ គា ចន្ធូ ម្ចាស់ក្រុមហ៊ុន «ស៊ាង ឡង មីងស៊ូ» លក់ និងផ្គត់ផ្គង់សម្ភារៈការពារជម្រាបទឹក ដែលមានទីតាំងនៅផ្លូវភ្នំពេញ ហាណូយ ភូមិឃ្មួញ សង្កាត់ឃ្មួញ ខណ្ឌសែនសុខ ចូលជួបដើម្បីសម្របសម្រួលបញ្ចប់ជម្លោះក្រៅប្រព័ន្ធតុលាការ ដោយមានការចូលរួមសម្របសម្រួលដោយ ប្រធានគណៈកម្មាធិការនីតិកម្មព្រឹទ្ធសភា ស្នងការនគរបាលរាជធានីភ្នំពេញ នៅវិមានព្រឹទ្ធសភា រាជធានីភ្នំពេញ។ នៅក្នុងការសម្របសម្រួលនេះ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានស្នើសុំអោយភាគីជម្លោះ និងបានណែនាំទៅ គណៈកម្មាធិការនីតិកម្មព្រឹទ្ធសភា ក្រុមមេធាវីស្ម័គ្រចិត្តសម្ដេច និងស្នងការនគរបាលរាជធានីភ្នំពេញ ធ្វើការសម្របសម្រួលបញ្ចប់ជម្លោះនេះនៅក្រៅប្រព័ន្ធតុលាការ ដោយកុំឲ្យបន្តដេញដោលរកខុសត្រូវអ្វីបន្ថែមទៀត ពិសេសកុំមានការគុំគួនគ្នា និងសុំឲ្យប្រព័ន្ធផ្សព្វផ្សាយសង្គមនានាបញ្ឈប់ការផ្សាយ អ្នកនេះខុស អ្នកនេះត្រូវបន្តទៀត។ បន្ទាប់ពីបញ្ចប់ សម្ដេចតេជោ បានអនុញ្ញាតឲ្យចៅ ណន សុខហេង បានថតរូបអនុស្សាវរីយ៍ និងបានឧបត្ថម្ភថវិកាចំនួន ១០,០០០ដុល្លារសហរដ្ឋអាមេរិក និង ៣៥លានរៀល ព្រមទាំងបានបង្កើតអាជីវកម្មឡដុតនំប៉័ងមួយនៅក្នុងក្រុងក្រចេះ ខេត្តក្រចេះ ដល់ចៅប្រុស ដើម្បីប្រកបរបរចញ្ចឹមគ្រួសារ លើសពីនេះ សម្ដេចតេជោ បានណែនាំចៅប្រុស ណន សុខហេង ត្រូវយកចិត្តទុកដាក់ក្នុងការប្រកបអាជីវកម្មដែល សម្ដេចបានផ្ដល់អោយពេលនេះ ពិសេសត្រូវចេះយកលុយបង្កើតលុយ ហាមលេងល្បែង និង ស្មោះត្រង់ជាមួយប្រពន្ធ៕

(អន្តរជាតិ)៖ អ្នកលក់បន្ត ដែលមានការអនុញ្ញាតរបស់ក្រុមហ៊ុន Apple នៅក្នុងប្រទេសវៀតណាម បានទម្លាក់តម្លៃ iPhone 16 ពី 4 ទៅ 6% រយៈពេលបួនសប្តាហ៍បន្ទាប់ពីការចេញលក់ម៉ូដែលក្រោយ បង្អស់។iPhone 16 128 GB ឥឡូវនេះត្រូវបានលក់ក្នុងតម្លៃ 22 លានដុងស្មើនឹងជាង868ដុល្លារ ដែលធ្លាក់ចុះពី 23 លានដុង ស្មើនឹង 908ដុល្លារ នៅថ្ងៃទី 27 ខែកញ្ញា នៅពេលដែលម៉ូដែលឆ្នាំនេះត្រូវបានដាក់ឱ្យ ដំណើរការ។កំណែ 512 GB ធ្លាក់ចុះ 6% មកនៅក្រោម 30 លានដុង។ ប៉ុន្តែមិនមានការផ្លាស់ប្តូរតម្លៃចំពោះត្រកូល ដែលនៅសល់ដែលរួមមាន Plus, Pro និង Pro Max ដែលជាជម្រើសពីរចុងក្រោយនៅក្នុងប្រទេស វៀតណាម។ ទិន្នន័យ​ពី​អ្នក​លក់​បន្ត​បង្ហាញ​ថា ​ម៉ូដែលទាំងហ​ពីរ​មាន​ចំនួន 70-90% នៃ​ការ​លក់។លោក Nguyen Lac Huy អ្នកតំណាងប្រព័ន្ធផ្សព្វផ្សាយនៅក្រុមហ៊ុន Apple ដែលមានការអនុញ្ញាតជាអ្នក លក់បន្ត CellphoneS បាននិយាយថា ការបញ្ចុះតម្លៃលើ iPhone 16 ដូច្នេះគឺចង់បង្កើនតម្រូវការសម្រាប់ ម៉ូដែលនេះ។លោកបានបន្ថែមថា កាលពីឆ្នាំមុន កំណែស្តង់ដារ iPhone 15 បានឃើញតម្លៃធ្លាក់ចុះ 4 សប្តាហ៍បន្ទាប់ ពីការចេញលក់ ហើយការលក់របស់វាបានកើនឡើង 25% ។ហាងលក់រាយ Di Dong Viet ឃើញមានការកើនឡើងបន្តិចនៃតម្រូវការសម្រាប់ iPhone 16 បន្ទាប់ពី បានប្រកាសពីការបញ្ចុះតម្លៃ។ ឥឡូវនេះវាមានចំនួន 14% នៃការលក់របស់ខ្លួន ខណៈដែលអ្នកលក់ដ៏ធំ បំផុតដែលមានចំណែក 70% នៅតែជា Pro Max ។នៅក្នុងទីផ្សារពិភពលោក Apple ត្រូវបានគេរាយការណ៍ថា បានស្នើសុំអ្នកផ្គត់ផ្គង់របស់ខ្លួនឱ្យកាត់បន្ថយ ការផលិត iPhone 16 ចំនួន 13 លានគ្រឿង ដែលភាគច្រើនជាម៉ូដែលស្តង់ដារ និងបូក ចំពេលមានតម្រូវការ ទាបសម្រាប់ពួកគេ៕

(អន្តរជាតិ)៖ វៀតណាមបានទិញទំនិញក្នុងតម្លៃ 25.3 ពាន់ពាន់លានដុង (1 ពាន់លានដុល្លារ) ក្នុងមួយខែ ជាមធ្យមនៅលើវេទិកាពាណិជ្ជកម្មអេឡិចត្រូនិកសំខាន់ៗចំនួន 5 ក្នុងរយៈពេល 9 ខែដំបូងនៃឆ្នាំនេះ។Shopee, TikTok Shop, Lazada, Tiki និង Sendo បានរាយការណ៍ពីការកើនឡើង 38% ពីមួយឆ្នាំទៅ មួយឆ្នាំនៃបរិមាណទំនិញសរុប ក្នុងអំឡុងពេលនេះរហូតដល់ 227.70 ពាន់ពាន់លានដុង នេះបើយោង តាមរបាយការណ៍របស់អ្នកផ្តល់ទិន្នន័យពាណិជ្ជកម្មអេឡិចត្រូនិក Metric ។TikTok ដែលគ្រប់គ្រងដោយប្រទេសចិន បានផ្តោតលើការបញ្ចូលគ្នានូវការទិញទំនិញ និងការកម្សាន្ត តាមរយៈការផ្សាយផ្ទាល់ និងផ្តល់ជូននូវតម្លៃទាប។វៀតណាមឥឡូវនេះស្ថិតក្នុងចំណោមទីផ្សារពាណិជ្ជកម្មឡាយផ្ទាល់ដ៏ធំបំផុតនៅលើពិភពលោក ដោយ សារកំណើនប្រជាជនខ្ពស់ និងជំនាន់វ័យក្មេងដែលចេះបច្ចេកវិទ្យា។ ផលិតផលដែលមានតម្លៃក្រោម ២សែនដុងសម្រាប់ច្រើនជាងពាក់កណ្តាលនៃការលក់ e-commerce ទាំងអស់ ។ការកើនឡើងនេះ ឆ្លុះបញ្ចាំងពីការទាក់ទាញយ៉ាងខ្លាំងនៃផលិតផលដែលមានតម្លៃសមរម្យ ដល់អ្នក ប្រើប្រាស់ ដែលបង្ហាញពីនិន្នាការទិញទំនិញឆ្លាតវៃ ចំពេលមានភាពមិនប្រាកដប្រជានៃសេដ្ឋកិច្ចដែល កំពុងបន្ត។Metric រំពឹងថាវេទិកាទាំងប្រាំនឹងកត់ត្រា 80.6 ពាន់ពាន់លានដុងនៅក្នុង GMV នៅក្នុងត្រីមាសចុងក្រោយ នៃឆ្នាំនេះ ដោយប្រភេទសំខាន់ៗគឺភាពស្រស់ស្អាត ម៉ូដ និងគ្រួសារ។វាបាននិយាយថាការកើនឡើងប្រជាប្រិយភាពនៃ Temu និងវេទិការបស់ចិនផ្សេងទៀតដូចជា 1688 និង Taobao នឹងបង្កើនការប្រកួតប្រជែងនៅក្នុងប្រទេសវៀតណាម៕

(អន្តរជាតិ)៖ ប្រទេសចិនមានអ្នកមានបំផុតថ្មី ជាសហគ្រិននៅពីក្រោយកម្មវិធី TikTok ដែលពេញនិយម និងចម្រូងចម្រាស។លោក Zhang Yiming អាយុ 41 ឆ្នាំ ជាសហស្ថាបនិកក្រុមហ៊ុនមេរបស់ TikTok គឺByteDance បានឈរ នៅកំពូលតារាង Hurun China Rich List ឆ្នាំ 2024 ដែលបានចេញផ្សាយកាលពីថ្ងៃអង្គារ ទី​២៩ ខែតុលា ឆ្នាំ២០២៤។ ទ្រព្យសម្បត្តិរបស់គាត់បានកើនឡើងដល់ 49.3 ពាន់លានដុល្លារ តាមការវាយតម្លៃដោយ ក្រុមស្រាវជ្រាវ ប្រព័ន្ធផ្សព្វផ្សាយ និងវិនិយោគ Hurun Inc ដែលបោះពុម្ពផ្សាយចំណាត់ថ្នាក់នៃអ្នកមាន បំផុត របស់ប្រទេស។បញ្ជីHurun បាននិយាយថា ការកើនឡើងទ្រព្យសម្បត្តិរបស់លោក Zhang កើតឡើងបន្ទាប់ពីប្រាក់ ចំណូលសកលរបស់ ByteDance បានកើនឡើង 30% កាលពីឆ្នាំមុន ដល់ 110 ពាន់លានដុល្លារ។ចាប់តាំងពីការបើកដំណើរការជាផ្លូវការនៅក្នុងខែឧសភា ឆ្នាំ 2017 TikTok ត្រូវបានទាក់ទាញ ប្រជាប្រិយ ភាព នៅទូទាំងពិភពលោក ក៏ដូចជាក្លាយជាវេទិកាប្រព័ន្ធផ្សព្វផ្សាយសង្គម ដែលកំណត់សម័យកាល ដែយុវវ័យជាច្រើននៅជុំវិញពិភពលោកប្រើប្រាសើ និងជាគំរូដ៏គួរឱ្យទាក់ទាញសម្រាប់ក្រុមហ៊ុនចិន ផ្សេងទៀត ដែលចង់ទម្លាយចូលសហរដ្ឋអាមេរិក និង ទីផ្សារពិភពលោក។ប៉ុន្តែឥឡូវនេះវាក៏កំពុងប្រឈមមុខនឹងការប្រយុទ្ធផ្នែកច្បាប់ដែលកំពុងកើនឡើងនៅក្នុងសហរដ្ឋអាមេរិក ដែលយោងទៅតាម Hurun វាមានអ្នកប្រើប្រាស់ជិត 200 លាននាក់។ នៅទីនោះ TikTok កំពុងតស៊ូ បណ្តឹងរដ្ឋ និងសហព័ន្ធទាក់ទងនឹងការបរាជ័យ ក្នុងការការពារកុមារដោយប្រើកម្មវិធី ខណៈពេលដែលវា និង ByteDance កំពុងប្រយុទ្ធប្រឆាំងនឹងច្បាប់ដែលអាចបង្ខំឱ្យមានការហាមឃាត់កម្មវិធីទូទាំងប្រទេស ប្រសិនបើ TikTok មិនដំណើរការប្រតិបត្តិការនៅសហរដ្ឋអាមេរិក។លោក Zhang កាន់កាប់ 20% នៃ ByteDance ដែលគាត់បានសហការបង្កើតជាមួយមិត្តរួមបន្ទប់ នៅមហាវិទ្យាល័យ Liang Rubo ក្នុងទីក្រុងប៉េកាំងក្នុងឆ្នាំ 2012។ ByteDance ក៏កាន់កម្មវិធីព័ត៌មាន ដ៏ពេញនិយមរបស់ប្រទេសចិនដូចជ Toutiao និង Douyin ដែលជាកម្មវិធីសម្ព័ន្ធរបស់ TikTok នៅក្នុង ប្រទេសចិនផងដែរ។ ការកើនឡើងទ្រព្យសម្បត្តិរបស់ Zhang ដល់កំពូលនៃបញ្ជីអ្នកមាន បានទម្លាក់ លោក Zhong Shanshan ចេញពីតំណែងនាំមុខជាលើកដំបូងក្នុងរយៈពេល 3 ឆ្នាំ ទោះបីជាគាត់នៅតែ ស្ថិតនៅលេខពីរក៏ដោយ៕ 

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញ ចូលរួមពិធីបើកការប្រកួតកីឡាជាតិលើកទី៤ និងកីឡាជាតិជនពិការលើកទី២ ដែលបានប្រព្រឹត្តទៅនៅពហុកីឡដ្ឋានជាតិអូឡាំពិក នាល្ងាចថ្ងៃទី៣០ ខែតុលា ឆ្នាំ២០២៤ ម្សិលមិញនេះ។ក្នុងពិធីដ៏មហោទ្បារិកនោះ សម្តេចបវរធិបតី បានលើកឡើងថា ការរៀបចំការប្រកួតកីឡាជាតិលើកទី ៤ និងកីឡាជាតិជនពិការលើកទី២នេះ ជាឱកាសថ្មីមួយទៀត ដែលបានបង្ហាញអំពីការរីកចម្រើន និងការអភិវឌ្ឍវិស័យកីឡានៅកម្ពុជា និងជាការត្រៀមខ្លួនរួចរាល់សម្រាប់ការរៀបចំការប្រកួតកីឡាយុវជនអាស៊ីលើកទី៥ និងយុវជនអាស៊ីប៉ារ៉ាហ្គេមលើកទី៦ នៅឆ្នាំ ២០២៩។ ម៉្យាងវិញទៀត ការរៀបចំព្រឹត្តិការណ៍កីឡាបានផ្តល់អត្ថប្រយោជន៍ជាច្រើនដល់សង្គម ក៏ដូចជា នយោបាយ ការទូត សេដ្ឋកិច្ច វប្បធម៌ ការលើកកម្ពស់មុខមាត់ជាតិ ទីផ្សារ ពាណិជ្ជកម្ម និងការទាក់ទាញភ្ញៀវទេសចរណ៍ ជាដើម ដែលនេះគឺជាការខិតខំប្រឹងប្រែងរបស់កម្ពុជាមួយជំហានទៀតក្នុងការបង្ហាញឱ្យឃើញនូវកម្លាំងសាមគ្គីភាពជាតិ និងកម្លាំងសេដ្ឋកិច្ច កម្ពុជា។សម្តេចបវរធិបតី បានបញ្ជាក់ថាកម្ពុជានឹងធ្វើជាម្ចាស់ផ្ទះក្នុងការរៀបចំការប្រកួតកីឡាយុវជនអាស៊ីនៅឆ្នាំ ២០២៩ ហើយការសម្រេចធ្វើជាម្ចាស់ផ្ទះនេះអាចប្រព្រឹត្តទៅបាន គឺអាស្រ័យលើសមត្ថភាពពេញលេញ និងការកៀរគរធនធានចាំបាច់ និង គ្រប់គ្រាន់ សម្រាប់រៀបចំការប្រកួតកីឡាថ្នាក់តំបន់អាស៊ីដ៏ធំនេះឱ្យបានល្អ និងរលូនប្រកបដោយស្មារតីទទួលខុសត្រូវខ្ពស់។ ហើយក្នុងនាមជាម្ចាស់ផ្ទះ សម្រាប់ការប្រកួតកីឡា យុវជនអាស៊ីឆ្នាំ ២០២៩ កម្ពុជា មានមហិច្ឆតារៀបចំទទួលស្វាគមន៍ភ្ញៀវជាតិ និងអន្តរជាតិ ប្រកបដោយភាពកក់ក្តៅ បដិសណ្ឋារកិច្ចល្អ និងសេវាល្អ សម្រាប់គ្រប់ប្រតិភូកីឡា និងភ្ញៀវជាតិ-អន្តរជាតិ ឱ្យទទួលបានបទពិសោធល្អក្នុងការចូលរួមការប្រកួតកីឡាយុវជនអាស៊ីឆ្នាំ ២០២៩ នៅព្រះរាជាណាចក្រកម្ពុជា៕

(ភ្នំពេញ)៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញបន្តដឹកនាំកិច្ចប្រជុំពេញអង្គព្រឹទ្ធសភាលើកទី ២ នីតិកាលទី ៥ ជាបន្តទៀត នៅវិមានព្រឹទ្ធសភា បន្ទាប់ពីបានអញ្ជើញដឹកនាំកិច្ចប្រជុំ គណៈកម្មាធិការអចិន្ត្រៃយ៍ព្រឹទ្ធសភា រួចរាល់នៅព្រឹកថ្ងៃព្រហស្បតិ៍ ទី៣១ ខែតុលា ឆ្នាំ២០២៤នេះ៕

(ភ្នំពេញ)៖ នៅព្រឹកថ្ងៃព្រហស្បតិ៍ ទី៣១ ខែតុលា ឆ្នាំ២០២៤នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បាននិងកំពុង អញ្ជើញដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នៅវិមានព្រឹទ្ធសភា ដើម្បីពិនិត្យ និងសម្រេចលើរបៀបវារៈចំនួន០៣។របៀបវារៈនៃកិច្ចប្រជុំមានដូចខាងក្រោម៖១- ពិនិត្យ និងសម្រេចលើរបាយការណ៍សង្ខេបស្តីពីលទ្ធផល និងសកម្មភាពការងាររបស់ព្រឹទ្ធសភានៅចន្លោះសម័យប្រជុំលើកទី១ និងលើកទី២ នីតិកាលទី៥។២- កំណត់កាលបរិច្ឆេទ របៀបវារៈ និងសមាសភាពលេខាធិការសម័យប្រជុំព្រឹទ្ធសភា លើកទី២ នីតិកាលទី៥។៣-ផ្សេងៗ៕

(សិង្ហបុរី)៖ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានដឹកនាំប្រតិភូកម្ពុជាចូលរួមកិច្ចប្រជុំរដ្ឋមន្រ្តីការងារអាស៊ានលើកទី២៨ (28th ASEAN Labour Ministers' Meeting - ALMM) និងកិច្ចប្រជុំពាក់ព័ន្ធ ក្រោមមូលបទ "ការពង្រឹងភាពធន់ និងការលើកកម្ពស់នវានុវត្តន៍" នាថ្ងៃទី៣០-៣១ ខែតុលា ឆ្នាំ២០២៤ នៅក្នុងប្រទេសសិង្ហបុរី ដែលដឹកនាំដោយរដ្ឋមន្រ្តីក្រសួងហត្ថពលកម្មសិង្ហបុរី និងមានការចូលរួមពីរដ្ឋមន្ត្រី/ប្រធានប្រតិភូក្រសួងការងារនៃរដ្ឋជាសមាជិកអាស៊ាន, រដ្ឋមន្រ្ដីការងារទីម័រឡេស្ដេ ក្នុងឋានៈជាអ្នកសង្កេតការណ៍ និងឯកឧត្តមអគ្គលេខាធិការអាស៊ាន។ នៅក្នុងកិច្ចប្រជុំនេះ ឯកឧត្តម ហេង សួរ បានជម្រាបជូនអង្គប្រជុំពីវឌ្ឍនភាពនៃគោលការណ៍ណែនាំអាស៊ាន ស្តីពីចល័តភាពនៃអត្ថប្រយោជន៍របបសន្តិសុខសង្គមសម្រាប់ទេសន្តរប្រវេសករ ក្នុងតំបន់អាស៊ាន ដែលត្រូវបានប្រមុខដឹកនាំអាស៊ានកត់សម្គាល់នៅក្នុងកិច្ចប្រជុំកំពូលអាស៊ានលើកទី៤៤ និង៤៥ និងកិច្ចប្រជុំកំពូលពាក់ព័ន្ធ នៅប្រទេសឡាវ។ ទន្ទឹមនឹងនេះ ឯកឧត្តមរដ្ឋមន្រ្តី ក៏បានបង្ហាញពីការប្តេជ្ញាចិត្តរបស់កម្ពុជា ក្នុងការសហការជាមួយរដ្ឋជាសមាជិកអាស៊ានទាំងអស់ ដើម្បីផ្តល់ជូនពលករទេសន្តរប្រវេសន៍នៃបណ្ដាប្រទេសអាស៊ាន នូវលទ្ធភាពទទួលបានអត្ថប្រយោជន៍នៃរបបសន្តិសុខសង្គម ដោយមិនគិតពីការបម្លាស់ទីនៅក្នុងតំបន់ ដែលស្របនឹងមូលបទរបស់ប្រទេសសិង្ហបុរីឆ្នាំនេះ គឺ “ការពង្រឹងភាពធន់ និងការលើកកម្ពស់នវានុវត្តន៍”។ គំនិតផ្ដួចផ្ដើមនេះ មិនត្រឹមតែជួយពង្រឹងសាមគ្គីភាព និងបរិយាប័នរបស់អាស៊ានប៉ុណ្ណោះទេ ប៉ុន្តែថែមទាំងបញ្ជាក់ពីភាពជាអ្នកដឹកនាំរបស់អាស៊ាននៅលើឆាកអន្ដរជាតិ ពិសេសក្នុងការលើកកម្ពស់ស្តង់ដាការងារប្រកបដោយសុខុមាលភាពនៅក្នុងតំបន់ផងដែរ។ នៅក្នុងកិច្ចប្រជុំដ៏សំខាន់នេះដែរ រដ្ឋមន្រ្តី/តំណាងប្រតិភូការងារមកពីបណ្ដាប្រទេសជាសមាជិកអាស៊ាន ក៏បានបង្ហាញពីការប្ដេជ្ញាចិត្តយ៉ាងមុតមាំរបស់ខ្លួនក្នុងការអនុវត្តនូវគោលការណ៍ណែនាំអាស៊ាន ស្តីពីចល័តភាពនៃអត្ថប្រយោជន៍របបសន្តិសុខសង្គមសម្រាប់ទេសន្តរប្រវេសករ ក្នុងតំបន់អាស៊ាន ដោយបានកំណត់ទិសដៅឱ្យឧត្តមមន្រ្ដីការងារអាស៊ាន (SLOM) ធ្វើការពិភាក្សាលម្អិតលើយន្ដការក្នុងការអនុវត្តបានយ៉ាងពេញលេញនូវគោលការណ៍ណែនាំអាស៊ាននេះ ដូចមាននៅក្នុងសេចក្តីថ្លែងការណ៍រួម (Joint Communique) នៃកិច្ចប្រជុំរដ្ឋមន្រ្តីការងារអាស៊ានលើកទី២៨ និងកិច្ចប្រជុំពាក់ព័ន្ធ ឆ្នាំនេះ។គួរបញ្ជាក់ផងដែរថា ជាលទ្ធផលនៃកិច្ចប្រជុំនេះ រដ្ឋមន្រ្តីការងារនៃបណ្ដាប្រទេសអាស៊ានទាំងអស់ បានអនុម័តនូវ "សេចក្តីថ្លែងការណ៍រួម (Joint Communique) នៃកិច្ចប្រជុំរដ្ឋមន្រ្តីការងារអាស៊ានលើកទី២៨ និងកិច្ចប្រជុំពាក់ព័ន្ធ" ដែលជាឯកសារគោលក្នុងការអនុវត្តការងារបន្ដក្នុងរយៈពេល ២ឆ្នាំទៅមុខ៕